JEREMIA 7 - PATHIAN LEKHABU IRTHIANG C.L. Bible (BSI)

Jeremia’n tempila thu a hril

^1-3 Rengpa’n tempil mikot, Judahaiin chubai mûkna hranga an lûtna ngai khan a ni tîra. Kha khan ngîra Rengpa itinrêng thotheitu Israel Pathianin a kuanga ti hrang a inei kha inpuang hrangin a ni hrila, “Nin innun dân danglamin nin sinthohai indanglamtir unglân, khanchu hi hmuna hin nangni inomtir mai ki ti.

⁴ ‘Ei zôkna! hi hi Rengpa Tempil a ni, hi hi Rengpa tempil kêng a ini, hi hi Rengpa tempil a ni!’ tia irhuangna tonghai iamhai mai ta no roi.

⁵ Nin innun dân indanglamin nin sinthohai masan ta roi. Nin ir-enkol dân satakin irngîk roi.

⁶ Ram dang mihai, farahai le meithâihai hnuaisia ma unglân, hi rama thilsual tho loihai that ma ta roi. Nangni an siat hrang sikin pathian danghai chubai mûk kha ma ta roi.

⁷ Nin innun dân nin thûlin chu, nin ilua mai hrang nin irchibulhai kuanga ki ipêk ram hin nangni inlêngtir ki ti.

⁸ En ta roi irhmangna thu hin nin irnghata.

⁹ Inrû nin thoa, tual nin thata, nin uirea, khomâkirsâmin minlak nin thoa, Baal kuang irbôlna nin inhlana, nin laia inhriat ngai loi pathianhai chubai nin mûk ngai.

¹⁰ Hi hi ki thil thohai nin hnôla, khanchu ki makunga ki biak ina hong ngîrin, ‘Ei zôk ta,’ nin ti ngai.

¹¹ Ki in hi inrûhai irbîkna hmun nin isôn ma ni? Nin thil tho ki lei ihmu a ni.

¹² Ki’rhming irlamna hrang hmun ki inthang masatak Silo khuaa fe unglân, ki mi Israelhai sualna sikin an chunga ki sintho va en roi.

¹³ Hi sualnahai murdi hi nin itho a nia, vêl tamtak nangni ki hril khomin irngai nuam mak chêi. Nangni ki koi zoro’n nin ni isâm ngai loi a ni.

¹⁴ Khasikin Silo chunga ki itho ang khan, hi ki tempil nin iiam chunga hin ki itho hrang a ni. Hi hmun hi nin irchibulhai le nangni ki ipêk chunga; Silo chunga ki itho ang takin tho ki ti.

¹⁵ Nin sûngsuak Israelhai ki inhnotsuak ang takin ki mithmu ata nangni inhnotsuak ki ti,” keima Rengpa’n ki iti a ni.

Mipui thuzôm loina

¹⁶ Rengpa’n “Jeremia, hi mihai ta hrangin chongchai pehai no ro, chap no ro, an irthûlin chongchai no ro, nang an irngai pe ual loi hrang sikin, ni ngên no roh.

¹⁷ Juda khopui le Jerusalem kotsuahaia an sin thohai ni ihmu loi mo?

¹⁸ Nâipanghaiin thing an bûma, pasalhaiin mei an sêma, nupanghaiin irvân rêngnu ta hranga bai siam hrangin baidi an inhmet a ni. Nin natir hrangin uain thilpêkhai pathian danghai ta hrangin an ibunthuan ngai a ni.

¹⁹ Khannisian an bingin an irsiat irhlôm sikin, mualphoina an chunga a itung a ni.

²⁰ Hi sika hin keima Rengpa Pathian hin ki ningmurna tak hi tempil chunga hin bun ki ti. Mihriamhai le sahai chunga ir-angnatin bun ki ta, thing le chîmuhai chunga khom; ki ningmur chu tûte’n an ithat thei loi, mei ang ni a ti.

²¹ “Ki mihaio, irbôlna senkhat chu maichâma a pumin nin hâlpai ngaia, senkhat chu fa hrangin iphal nin ni. Khan keima Rengpa’n ki iti chu an rêngin fa ving ta roi.

²² Nin irchibulhai Aigupta ata ki hruaisuak lai khan hâlirvôm irbôlna mo, an irbôlnahai inhlan hrangin thu pehai ma ung.

²³ Khan, an Pathian ki nia, ki mihai an ni theina hrangin le ki thu zôm thei hrangin chu, thu ki ipêk an ni. Khante an ta hranga thil a fe insa mai theina hrangin ki thupêk ang taka, innun hrangin ki ihrilhai an ni.

²⁴ Khannisianlân zôm nuam loiin uksak ta maka. Kha nêkin an lungrîl insêtin tho loi hrang ti an tho nuam ual tâka, sa ual nêkin an isiat ual tâk a ni.

²⁵ Nin irchibulhai Aigupta ata an suak nia irthokin hi nikhua dên dapin, a ni zui deipuhai nin laia ki tîrhai ngai.

²⁶ Aniachu, tukhomin irngaiin uksak nuam ngai mahaia. Kha nêkin nin tukul nin inliantir ual ngai, nin irchibulhai nêkin tehel nin ihrât ual a ni.

²⁷ Khasikin, Jeremia hi thuhai hi ki mihai kuang hril ni ta, khan nang irngai pe no nihaia, koi ni ta, khan nang sâm no ni.

²⁸ An kuang, “Hi nam hi Rengpa an Pathian irhâi irngaitua laia, sepna dong loi nam an ni hi,” ti ni ta, thudik ar hmang ta, an bâi ata paiirhmang a ni ta. Iamomna chu a boi tâka, sâmin om ta ngai mah.

Hinom irhôra thilsual thohai

²⁹ “Châ roi, O Jerusalem mipuihai, Nin sam ep inkol unglân pâi roi; Tâng sîphaia mithi chûl hla sak roi. Keima Rengpa chu ki ning an mura, ki mihai ki hnôl tâk sikin.

³⁰ “Juda mipuihaiin thil saloi an itho tâk a ni.

³¹ Hinom irhôra an nâipasalhai le nupanghaiin mei leh hâlin an irbôl theina hrangin maichâm ‘Tofet,’ iti an siama. Hi tho hranga hin thu pe ma unga, ki irngaituana lua a ilût phâk loi a ni.

³² Khasika khan, Tofet mo, Hinom irhôr tia koi ta loia, ‘Irthatna irhôr,’ tia koi ni ta a ti. Hmun dang irphûmna hrang a om no sikin mithihai kha khan an iphûm ni a ti.

³³ Mithi ruakhai chu vatehai le sahai hrangin bu chang a ta, tûte annihai irzûl hrang om no ni.

³⁴ Ram chu ramchâr inchang a ta, Juda khopuihai le Jerusalem kholâihaia raifân le lômin hri inboitir ki ta, irneina hruaithe irhâi hoihai ten lua inmongtir ki ti,” a tia.