JEREMIA 6 - PATHIAN LEKHABU IRTHIANG C.L. Bible (BSI)

Râlhaiin Jerusalem an irhual

¹ Benjamina mihaio, zôkna zongin intân ta roi; Jerusalem ata rot ta roi! Tekoa khuaa bekul tum unglân, Beth Hakerem-a irthokin inhriat theina mei inchok roi. Hmâr tianga irthokin intakna le siatchit theina a hong itung hrang a ni.

² Zion khopui chu enhoi tak a nia, khannisian insiat la ni a ti;

³ rênghai chu an sipai pâlhai leh kha khan la riak an ta, khopui irkulin an puan inhai zâr an ta, an laia mi tukhom an nuamna taka la riak an ti.

⁴ Jerusalem doi hrangin irsiam roi! irtûng unglân, sûn laitaka ei idoi hrang a ni! la ti an ti. Khannisian, “An hnung hrai tâk, sûn a hek hrang tâk kêng, khohloia irhlîm a hong isei tâk kêng.

⁵ Zâna doi ei ta; khopui kulhai insiatchit ei ti,” ti sa an ti.

⁶ Rengpa itinrêng thotheiin, “Ki rênghai chu Jerusalem an lâk theina hrangin, thing phûra a lût theina hrang leidâk do hrangin thu a pêk tâka. Irhnuaisiana sip a ni sikin, hi khopui hi dûk ki itho hrang a ni.

⁷ Tuikuangin tui thar a irting mai ngai angin, Jerusalem khomin a thil saloi a lan thartir maia. Nakhrât sintho le pop iliam vai ki ihmu a ni.

⁸ Jerusalem mihaio, hi buaina hi nin irdînna hrangin irningna thil tung ri se, khano’nchu nangni ki imâksan hrang kêng. Nin khopui hi ramchârin siam ki ta; tûte zel om thei no ih,” a tia.

Israelhai tehel an zong

⁹ Rengpa itinrêng thotheiin ki kuang, “Grep irhuan chu a thei rahai irhmal zoi hnunga a ronga a iom ngai ang khan, Israel chu a korongin sia ni a ti. Khasikin zoro a la om sûnga hin nin thei dôrin tukhom nin isansuakhai ngêt hrang a ni,” a tia.

¹⁰ Keima’n, “An kuang ti pehai khom inlân, tu mo a ni irngai pe rêk hranga? Tukullian le ni thu chu irngai nuam loi an nia, hril pehai hranga ni nih iti hi an minui vai a inza pehai a ni.

¹¹ Rengpa’n an chunga ni ninginmurna chu keima khom a ni kâng saa, ki ituang zoi loi a ni ta. Khanchu, Rengpa’n ki kuang, Ki ninginmurna chu nâipang kholâi chaihai laia le ruatharte irbukkhômhai laia insum ki ta, pasal le nupanghai hruaiin om an ta, a tarhai khom lêkhai no ni.

¹² An inhai khom mi dang pe ni a ta, an loi le an dôngmahai khom khaang dên khan hi rama mihai hi dûk ki ithohai hrang a ni.

¹³ Mi tukhom a chîn a lian dik loitaka sum hlo suak an itum a nia; deipuhai le ochaihai khomin mipui an huanghaia.

¹⁴ Ki mihai sâbe tuang uksakhai loiin, ‘A dam ta,’ an tia, la dam loihai khom kha,

¹⁵ hi thil intiromhai an tho sika khan an inzak ma ni? Inzak mahai; an zak dân lua an inhriat loi a ni. Khasik taka khan mi dang an rîl tâkhai angin inrîl an ta, dûk ki thohai ni taka chu an mongna ni a ti,” keima Rengpa’n ki iti a ni.

Israelhaiin Pathian nuamlam an hnôl

¹⁶ Rengpa’n a mihai kuang, “Lamsuamhaia ngîr unglân, hei thîr hi roi, tianlaia lampui dik omna irdonhai roi. Kha khan fe unglân, irtharngam takin lêng roi,” a tia.

¹⁷ Khanchu Rengpa’n irningna hrang bekul irhâi irngai hrangin râl hrungtu a siahaia. Khannisian anni khan, “Irngai no ni ung,” an tia.

¹⁸ Khasika khan Rengpa’n a iti a ni, “Namhaio, irngaitua roi, ki mihai chunga thil zuang tung hrang hi len hre roi.

¹⁹ O irnêng irngai ro, hi mihai chunga hin siatna ki intung hrang a ni. Ki thu irngai mahaia, ki dânhai khom an hnôl sikin le an irngaituana sual sikin.

²⁰ Seba ram ata irthokin bero mirimhoihai mo, ram hlataka thil namhoitak an ni hong ichôi pehai hi, keima hrangin imo a hlutna om? An thilinhlanhai pom pehai no ninga, an irbôlnahai khom lôm ual no ning.

²¹ Khasikin hi mihai hi masanhai ki ta, inrîl an ti. Pahai le nâipasalhai thi an ta, khaang ngêt khan sa pâl sahai le an tualbômhai khom,” tiin.

Hmâr tianga irthoka a doihai

²² Rengpa’n a ti, “Hmâr tiang ata mi an zuanga, ram hlataka nam roiinpui chu râl doi hrangin an irsiam mai ta a ni.

²³ An phohai le khandaihai a inlang thiai a ni tâka, mi nunter le khonza nei loi an ni. Tuipui irhâi angin sakora an chuanga, an intân irhâi chu a ni. Jerusalem doi hrangin an irsiam diam a ni ta,” a tia.

²⁴ Jerusalem mihaiin, “Thuthang kha kin len hriatin chu kin kuthai a kima, nupang nâiha isê angin lungzîngna le natna’n a ni idê tâk a ni.

²⁵ Ram hla khom fe ngam ta mak me, lampuihai khom fe ngam ta ma ung, kin râlhai chu râltukfama irvo sai an nia, chitna irkhêlin an ni irhual a ni,” an tia.

²⁶ Rengpa’n a mihai kuang, “Bora puan sil unglân, irvut kâra inhlum roi. Nâipasal nei sûn ang takin mitrithi sômin chap roi, nangni doi hranga hong khan nangni an siat zêl hrang tâk sikin.

²⁷ Chalnia irthît infâi hrang angin, ki mihai fiahaiin lân, imo an iang hmu suak roh.

²⁸ An rêngin tukullian tehelzong hrât an ni, dârsen le thîr anga ngar an ni. An rêngin dik loi thu chanlamboia irthekindarhai an ni.

²⁹ Rêng mei chu ar al insa bâka. Khan, thîr êk chu zôi thei loiin a chai dial ngai. Ki mihai irthît infâi tum mai hi ar fêna boi a ni, mi saloihai chu thon pai an ni sikin.

³⁰ Anni chu lûtna nei loi, thîr êk tia bê ni an ti. Keima Rengpa ngêtin anni chu ki ihnôlhai tâk a ni sikin,” a tia.