JEREMIA 52 - PATHIAN LEKHABU IRTHIANG C.L. Bible (BSI)

Jerusalem siatna thu

¹ Kum sômhni inkhat a ni le Zedekia chu an lala, Jerusalema kum sômhleikhat roi a rêla. A nu irhming chu Hamutali a ni, Libna khuaa om Jeremia nâinu a ni.

² Jehoiakima angin Zedekia chu Rengpa mithmua thilsual a tho ngaia,

³ Rengpa chu Jerusalem le Judai rama mihai chunga a ning an mur hrai sikin, a mithmu ngêtin a itîrsuak a ni. Zedekia chu Babulon rama rêng chunga tehel a zong pea,

⁴ Zedekia an lal kum kuak tha sôm le sûn sôm nî chu, Babulon rama rêng Nebukadnezara chu sipai murdi leh Jerusalem doi hrangin a hong irthoka, khopui pên tiang riak hmun an sina, an omna irhualin bang an sunga,

⁵ Zedekia inlal kum sômhleikhatna dênin an irhual mai a ni.

⁶ Châmpui intak tak a oma, tha minli le sûn kuak nî tena chu ite fa hrang nei ta mahaia.

⁷ Khopui kulbanghai kha an inseta, sipai pâlhai chu zâna an rot zoi tâka. Babulon-hai khan, khopui irhual zoi hnungin rêng irhuan kôl bang inhni kâr lampuia khan an fea, Jordan phâi tiang panin an intâna.

⁸ Khan, Babulon sipai pâlhai khan an irzûla, Zedekia chu Jeriko kôl phâia an phâka, a sipaihai khan an imâksan ving a ni.

⁹ Khanchu Zedekia chu Hamath ram huala om Ribla khan rêng Nebukadnezara omna khan an hruaia, kha khan Nebukadnezara’n a chungthu a rêla.

¹⁰ Ribla khan Zedekia hmu pumin a nâipasalhai a that pea, Juda milianhai leh khan.

¹¹ Kha irzoiin Zedekia khom a mitru an kêlter pea, thîrhrui leh an khita, Babulon tiang an hruai tâka. A thi nî dênin Zedekia chu intângna ina a om mai ta a ni.

Tempil siat thu

¹² Babulon rama rêng Nebukadnezara inlal kum sômhleikuak tha ringa le sûn sôm nî’n Nebukadnezara rêng lungvâr sak ngaitu le sipai hruaitu lian tak chu Jerusalema an hong lûta.

¹³ Rengpa in le rêng in a hâla; Jerusalema in murdi le in poimohai a hâl insiat pe vinga;

¹⁴ a sipaihai khan khopui kulbanghai an insima.

¹⁵ Khanchu Nebuzaradana khan mipui khopuia la omhai, mi kut sintheihai a la omhai, Babulon ram rêng kuta irpêkhai kha suak hrangin a hruaihaia.

¹⁶ Khan Judai rama inriang hai, ite zel nei loihai kha a mâksana, grep irhuan le loia sin an inthotirhai a ni.

¹⁷ Babulon-hai khan tempila dâr chopuihai, tôlna rêlhai le dâr tuipanghai an inkhoi chita, dârsenhai khom Babulon-a an chôi vinga.

¹⁸ Belcha hai, maichâm infâina irvut luakna hai, meiser that hmun hai, irbôlna sa thisen siana khêng inthûk hai, mirimhoi hâlna khuri hai, a dang dârsen biakbuka irhmang zoroa hmang ngaihai kha an lâk saa.

¹⁹ Rângachaka siam chu i zât thil khom an lâkpaia. Khuri, chemte hai, meiri-al chôina hmun khêng a chelna om hai, irbôlna sa thisen siana khêng inthûk hai, irvut siana hai, meiser siana hmun hai, mirimhoi inhlanna khêngte hai, uain thilinhlanhai bunthuanna hranga ihmang ngai.

²⁰ Tempila hranga Solomona isin dârsen chopui inhni, tôlna rêlhai, tuipang lian le a toina sehrâtchal sômhleihnihai chu a rik hraia varh zoi zât ni maka.

²¹ Chopui inhnihai chu an irsâng dân mûk sômhleiriat an nia, a lian lam chu mûk sômhleihnia irkual a ni. A sûng ir-ôngin ar sa dân chu bel minli vêl a ni.

²² A chopui sîp tina khan an bôk mûk ringa irsâng dârsena sin a oma, ar hîlin dârsena siam dalim dûra irvôtir a ni.

²³ A chopui panga khan khom dalim irzakhat a om sa chita, an laia sômkuak le kirukhai chu hnuaia irthoka hmu thei ving an ni.

Juda mihai Babulon rama hruai an ni

²⁴ Sipai hruaitu lian tak Nebuzaradana khan ochai inlal tak Seraia, a hnuai zela mi ochai Zefania le a dang biak ina milianhai inthum khom mi intângna khan a hruai saa.

²⁵ Khopuia la om sipaihai hruaitu, rêng lungvâr sakhai ngai mi sarihai, sipai hruaitu hnuai zela mi sipai thurchi irziakna vongtu le mi dang sômruk mi poimohai khom a hruai saa.

²⁶ Nebuzaradana khan Babulon rama rêng kuang,

²⁷ Hamath ram hual sûnga om Ribla khuaa khan a fepuia, kha khan rêngin anni chu dûk a thoa, a that tâka. Khaangin Juda mihai chu sala intâng hranga hruaiin an om tâka.

²⁸ Hi hi Nebukadnezara’n mipui sala a ihruai intamhai chu an ni. A rêng chang kum sarina khan mi sângthum sômhni inthum a hruaia.

²⁹ A kum sômhleiriatna an lal kumin Jerusalema irthokin mi irzariat sômthum inhni a hruaia.

³⁰ An lal kum sômhni inthumna khan mi irzasari sômminli ringa, Nebuzaradana’n a ihruai a ni. A rêngin mi sângminli irzaruk sala hruaiin an oma.

³¹ Juda rêng Jehoiakina chu kum sômthum sari, tha sômhleihni, kha tha sûn sôminhni sûn ringa nî taka khan Evil-merodaka chu Babulon rama inlal ar phuta. Juda rêng Jehoakina chu intângna ina irthokin an sua tâka.

³² Evil-merodaka chu a chunga sain Babulon rama sala a intângpui rêng danghai nêkin chôiindômin lian ualna a pêka.

³³ Khaang khan Jehoiakina chu a intângna in irvônahai thûl hrang le a hring kongkâra rêng dokânga khalâi irhîl hrangin phal a nia.

³⁴ A sûn tina thil nanghai chu Babulon rêng khan a pêk ngaia, khaangin a hring kârka chu a thi nî dênin satakin a ienkol a ni.