JEREMIA 51 - PATHIAN LEKHABU IRTHIANG C.L. Bible (BSI)

Babulon chunga roirêlna la fe mai

¹ Khan Rengpa’n, “Babulon rama mihai doi hrangin phâivua saloi ki hong inthotir hrang a ni.

² Phâivua’n fapôl a isêm inlêng anga khan, Babulon ram insiatchit hrang ram dang mihai tîr ki ti. Kha irhmang ni sûn kha a phâkin chu, kil tina irthokin doi an ta, ram chu a korongin om a ti.

³ A sipaihai kha an thal kâpna zoro pehai no roi, an thîr songkol khom innghâk irman no ri sehai. Ruathartehai khom hôihai no unglân, sipai pâl thatpaihai ving roi!

⁴ An khopui kotsuahaia, popin thi an ti.

⁵ Israel le Juda chu, Israel mi irthiang, ki chunga hin sual khomsian, keima Rengpa Pathian Itinrêngthotheiin ki intha loi a ni.

⁶ Babulon ram ata rot ta roi! Nin hringna inzôk hrangin intân ta roi! Babulon ram sualna sikin thatin om no roi. Ki phuba ki lâkin ar hoi lam takin dûk tho ki ti.

⁷ Babulon ram chu ki kuta rângachak khilât ang a nia, rammual pumpui ki in intir hrang a ni. Nam tinin uain an ina, an invêt zoi ta.

⁸ Babulon ram chu irhnot takin an rîla, a isiat tâk a ni. Ama chu châ ta roi! A sâbehai hrangin hloi zong pe unglân, a la dam khom a ni thei.

⁹ Ram dang mi khataka omhaiin, ‘Babulon ram chu changpui hrang ei nuama, khannisian an hnung hrai tâk. Tho ama chu masan ei ta, in sûng tiang lei fe ta rei. Pathianin ar nakhrât murdi’n Babulon chu a insiatchit a ni tâk hi,’ ti an ti,” a tia.

¹⁰ Khan Rengpa’n, “Hi mihai an khêkin, ‘Rengpa’n ei dikzia a târinlang tâk. Tho! Jerusalema fe ei ta, Rengpa ei Pathian sintho hi mihai inhrilhai ei ti,’ an tia,” a tia.

¹¹ Rengpa’n Babulon ram chu insiatchit a tum sikin, Media rênghai a intorhai dîm a ni ta, hiang hin a nia, tempil siatna kha phuba a lâk hrang dân chu. A doitu sipai ulianhai khan thu an pêka, “Nin thalhai intât inngaih unglân, nin phohai siam diam ta roi.

¹² Babulon kulbang inset hrangin inhriatna pe suak ta roi. A hrungtu intamtirhai ualin lân, enirchiktu sehai ro! a len ruang hrang mi se roi!” an tia. Rengpa’n Babulon ram mihai chunga tho hrang a iti chu a itho zoi hrang a ni.

¹³ Kha rama khan ivadung tamtak le sum le puan a inei ok a nia, a zoro a hekin, a hringna hrui chu insatin a om tâk.

¹⁴ Rengpa Itinrêngthotheiin, ama hringna sâmin, khâi fapôl puang angin mi tamtak Babulon ram doi hrangin hong hruai hrangin chong ar khâma, anni khan zoina tâng an insam hrang a ni.

Pathian inpâkna hla

¹⁵ Rengpa’n a sinthotheina leh irnêng a siama, a vârna’n rammual an ngîrtira, an hriatna leh irvân a kaiinphar a ni.

¹⁶ A thupêkin irvân chunga tuihai an irhâi inringin, kôlkunga irthokin sûmhai a hong zînga, rotho kâra kôl a’rtêka, a bukkhômna hmun ata phâivua a tîrsuak ngai.

¹⁷ Hi hi mi tinin an hmu’n chu, mihriamhai invêtin inhriatna nei loiin an oma, millim siamtuhai chu an inzaka, an isin pathianhai kha a dûr, hringna nei loi an ni sikin.

¹⁸ Hlutna nei loi an nia, hmusit zât an ni. Anni ngaitua hranga Rengpa a zuang tika chu, anni chu insiatchit ni an ti.

¹⁹ Jakoba Pathian chu anni ang kha ni maka; anni chu chi tinrênga siamtu kha a ni, ama mihai ni hrangin Israelhai a inthanghai a ni. Rengpa Itinrêngthothei chu ar hming a ni.

Rengpa sekchôi

²⁰ Khan Rengpa’n, “Babulon ram, nangma chu ki sekchôi ki’rdoina râltukfam ni ni. Namhai le rêng ramhai ki isuk irnôina ram ni nia,

²¹ sakorhai le a chunga chuanghai nôi hrangin, sakor tâli le a chalaituhai nôi hrangin,

²² pasalhai le nupanghai that hrangin, tarhai le vânglaihai nôi hrangin, ruathartehai le dôngmatehai that hrangin,

²³ belrapuhai le belrahai that zuak hrangin, âlkaituhai le hruaituhai nôi hrangin,” a tia.

Babulon ram dûk thôna

²⁴ Khan Rengpa’n, “Jerusalem chunga thil a itho insualhai sika khan Babulon ram le a mihaiin ki toi lai ni hmu an ti.

²⁵ Babulon ram, nang chu rammual pumpui insiattu mual ang kha ni nia, khan keima Rengpa hi ni râl ki ni. Ki kut leh nang indom ki ta, hnuaia nan zâltir ki ta, irvâmchit ni ti.

²⁶ Ni hmun ram ata lung intângna in sinna hmang hrangin lâk thei ni no nia. Ramchâr angin om mai ta ni ti. Keima Rengpa’n ki iti a ni.

²⁷ “Irdoi hrangin inhriattirna pe roi! Namhaiin an inhriat theina hrangin bekul tum roi! Babulon ram ta hrangin namhai chu irvôtir unglân, Ararat, Mini le Askenaza ramhai, ama doi hrangin inhrilhai roi. A doi hranga hruaitu’n mi bê unglân, khâi puang anga tamin sakor bûmhai roi.

²⁸ Babulon ram doi hrangin namhai chu irvôhai unglân, Media rênghai, ram optuhai, an hruaituhai le an ram ophai sûnga sipai pâl murdi koibûmhai roi.

²⁹ Babulon chu ramchâr, mi tûte om loina hmun sin hranga Rengpa’n a thiltum a chuk tâk sikin, irnêng chu an thingin a irnok a ni.

³⁰ Babulon rama sipaihai chu irsual an monga, an kulpui sûnga an om chian tâk, thâiindôpin nupang angin an om tâk. Khopui dâi mikothai chu a siata, inhai chu a kâng tâk.

³¹ A khopui chu kil tina a chim tâk ti Babulon rama rêng hril hrangin thurchi chôitu an fe mai tâka.

³² Râlhaiin ivadung irkânna chu an lâka, khopuihai chu an hâl tâk. Babulon hmun chu an lâka, kulpuihai chu an hâl tâk. Babulon ram sipaihai chu an chi ta taka.

³³ Zoro sôtnote sûngin râlhaiin anni chu sâtpaihai an ta, buchîl ang hin an isirpolhai hrang a ni. Keima Rengpa Itinrêngthothei, Israelhai Pathianin ki iti a ni,” a tia.

³⁴ Babulon ram rêngin Jerusalem ar chan india, a ifâk a ni. Khopui chu bêl angin a rongin an omtira, rûlpui angin a invol a ni. A inuam murdi a chôia, a danghai chu a ipai a ni.

³⁵ Zion mihaiin, “Ei chunga nuamninga lôna a itung hi Babulon ram chu mô inpêltir ni ri se!” ti ri sehai. Jerusalem mihaiin, “Ei ituang hi Babulon ram chu a mophurtu ni ri se!” ti ri sehai.

Rengpa’n Israelhai changpui a ti

³⁶ Khaangin Rengpa’n Jerusalem mihai kuang a iti a ni, “Nin thubuai hi ngaitua ki ta, nin râlhai chu nin chunga an sintho kha intuamtirhai ki ti. Babulon rama tuihnârhai inchâr ki ta, ivadunghai inkangtir pehai ki ti.

³⁷ Kha ram kha hmun ram, rama sahai lêngna chang a ti. En irkhêl tak chang a ta; kha khan tûte om no nihaia; mi tin a hmuhaiin a sate’n chi an ti.

³⁸ Babulon-hai chu an rêngin kâmkeibaknei angin an inhrâma, kâmkeibaknei tehai angin ngor ngor zel ti an ti.

³⁹ an ihuatirham mo a ini? Hruaithe, anni hrang irfûk pehai ki ta, inrui le raifânin siamhai ki ti. In hrangin fe an ta, har thei ta no nihai.

⁴⁰ Belratehai, kêlhai le belrachalhai angin that hrangin anni chu hruaihai ki ta, keima Rengpa’n ki iti a ni,” a tia.

Babulon la tong hrang

⁴¹ Rengpa’n Babulon chungthu a hrila, “Khopui rammual pumpui inpâk ngai chu chelin a om tâka! Namhai ta hrangin Babulon chu i dôra enirkhêl mo a hong ichang tâk!

⁴² Tuipui chu Babulon chunga a hong luanga, a’rsok khan a hor khu zoi tâk.

⁴³ A khuahai chu en intak, tui boina, ramchâr, mi tûte om loi inzin loina hmun ang kha a ni.

⁴⁴ Babulon rama pathian bêl chu dûk tho ki ta, a inlem tâk kha inluak suak nôk ki ta, namhaiin chubai mûk ta no nihai. “Babulon kulbanghai chu a chim tâka.

⁴⁵ Israel mihai khataka irthokin rot ta roi! Nin hringna inzôk hrangin ki ningmur irkhêl tak ata hi rot roi.

⁴⁶ Chong papai nin iam sika hin thâiindôpin om no roi. A kum tin ram buaina in mani, aninole rêng dang idoi tia chong vuang inthang a indarh ngai.

⁴⁷ Khaangin Babulon ram millim dûk ki itho hrang zoro a hong itung thiai a ni. A ram pumpui hmâimôkna sin ni a ta, a mihai chu that ni ving an ti.

⁴⁸ Hmâr tianga irthokin mi a se hranga honghai kuta Babulon ram a dok tena chu, irnêng le irvâna thil tinrêng raifânin pâi an ti.

⁴⁹ Babulon ram chu a rammual pumpuia mi tamtak thina intungtirtu a nia, atûn hin Israel mihai tamtak thina sikin Babulon ram chu a idok hrang a ni ta. Keima Rengpa’n ki iti a ni,” a tia.

Babulon rama Israelhai kuanga Pathian thu tung

⁵⁰ Rengpa’n Babulon rama a mihai kuanga a iti pehai chu, “Thina nin zôk tâka, atûn fe unglân nghâk ta no roi. In sûng ata hlataka om mai unglân, nin Rengpa hi nin sâp mai ngai unglân, Jerusalem khom inhre mai roi.

⁵¹ Nangni’n, ‘Mualphoi irsak le inzak nir hmutir kin nia; ram dang mihaiin tempila hmun irthianghai an lua zoi tâk sikin, changpui irngaiin kin inhriat suak a ni ta,’ nin tia.

⁵² Khasikin ki iti a ni, Babulon millimhai dûk ki itho hrang zoro chu a hong itung thiai a ni ta. A ram pumpuiin a pophai chu inrung vung an ta;

⁵³ Babulon chu irvâna luiin, kha khan kulpui det hong sinhai khom sian, an siat hrangin mi la tîr pehai ki ti. Keima Rengpa’n ki iti a ni,” a tia.

Babulon siatna thu la fe mai

⁵⁴ Khan Rengpa’n a hrila, “Babulon sûnga chap irhâi le siatchitna sika a ram sûnga inrung irhâi chu irngai roi.

⁵⁵ Babulon chu insiatchitin inthimvalin ki isia hrang a ni. Sipaihai chu tuiirsôn irkhêl tak angin hong lûtin khêk vungin an idoi a ni.

⁵⁶ Babulon insiatchit hranga hong an nia; a sipaihai chu chelin an om tâka. An sâihlihai inkhiak pehai an ta, kei chu sual dûk intho ngai Pathian ki nia, Babulon chu ar hoipui lam takin intuangtir ki ti.

⁵⁷ A roirêltuhai, vârna nei mihai, hruaituhai le sipai inruitirhai ki ta, in an ta, har thei ta no nihai. Keima, rêngin ki iti a ni tâka, keima hi Rengpa itinrêngthothei.

⁵⁸ Babulon kulbang irsa tak chu irnênga ipai ni a ta, a dâi mikot irsânghai chu hâlirvôm ni a ti. Namhai sintho chu a korong a nia, an sinsôlnahai chu meichok a ichang hrang a ni. Keima Rengpa Itinrêngthotheiin ki iti a ni,” a tia.

Jeremia chongbe chu Babulon rama thon a ni

⁵⁹ Reng Zedekia’n a ihmang ngai chu Seraia Neria nâi Maaseia tupa a ni. Juda rêng Zedekia an lal kum minlina Babulon-a a fe laiin Seraia chu a kuang a fe saa, ama kha thudik ki pêka.

⁶⁰ Babulon ram chunga siatchitna a tung hranghai le Babulon ram chungchâng thu lekhabua ki’rziaka.

⁶¹ Seraia chu kin hrila, “Babulon ni tung tika, hi irziaka om murdi hi mihai kuang inring takin ni tep ngêt a nih ti inhrenfel roh.

⁶² Khanchu chongchaiin lân, ‘Rengpa, hi hmun hi insiatchit ni itum thu ni len sîr tâka, khasikin thilhring ite mihriam mo, ramsa mo, om no nihaia, ramchâr angin ni mai ta a ti,’ ti roh.

⁶³ Seraia, “Hi lekhabu hi mipuihai inhriata ni tep zoiin chu, lung leh khit irbopin lân, Eufrates ivadunga paiin lân,

⁶⁴ Babulon chu hiang hin ngîm a ta, thoi ta no ni. A chunga Rengpa’n siatchitna an tungtir hrang sikin,” tiin insîr roh. Jeremia thu’nsîrhai chu hi hin a imong a ni ta.