JEREMIA 50 - PATHIAN LEKHABU IRTHIANG C.L. Bible (BSI)

Babulon chela om hrang thu

¹ Babulon khopui le a mihai chungthua Rengpa chongbe a ni ipêk chu hi hi a ni:

² “Namhai kuang thurchihai chu hril roi! inpuang roi! Puanzâr târ unglân, thurchihai chu hril roi! Thilirthup sia no roi! Babulon chu an rîl tâka! A pathian Marduka chu a milung an hnâng pe ta, Babulon millim chu mualphoi an irlâk tâka. An pathian dik loihai chu an milung an hnâng pehai ta!

³ “Babulon doi hrangin hmâr tianga nam inkhat a hon ding tâka, ramchârin a isiam hrang a ni. Mihriamhai le sahai rot ving an ta, tûte kha khan om ta no nihai,” tiin.

Israelhai hong kîr nôk hrang thu

⁴ Khan Rengpa’n, “Kha nikhua kha a hong tungin chu, an ruaiin Israel le Juda chu chap pumin hong an ta, an pathian ni zong an ti.

⁵ Zion panna lampui irdon an ta, kha tiang pan an ti. Keima leh kumtuang thuthung siam an ta, siat ta no ni.

⁶ “Ki mihai chu belra enkoltuhaiin a binga an insuaa chaninvâi ang a ni. Belrahai angin tâng inkhat ata tâng danga irthonin, an in omna an irnghil ngai a ni.

⁷ An rêngin anni chu an idoihai a ni. An râlhaiin, Rengpa chunga an tho’nchâia, ei thil tho hin ite a sualna om mah. An irchibulhaiin Rengpa chunga an irnghat ngita, anni khomin, ‘ama ta hrangin iamomin an iom hrang kêng a ini,’ an tia.

⁸ “Israel mihaio, Babulon ram ata rot roi! ram kha masan ta roi! A mâk masa tiang chang roi!

⁹ Hmâr tianga nam hrâthai senkhat inthorhai ki ta, anni chu Babulon ram ki indoitir hrang a ni. A doi hrangin irtâng an ta, an irûn hrang a ni. Râl doi thei tak an nia, an thal kâphai khan tok loiin om ngai mah.

¹⁰ Babulon ram chu inmokin om a ta, an moktuhaiin an inunuam la an ti. Keima Rengpa’n ki iti a ni,” a tia.

Babulon dokna thu

¹¹ Khan Rengpa’n, “Babulon rama mihai, ki nam nin insiata, lômna le râifânna’n nin sipa, sepui buchîl angin le sakor inhrâm angin nin irvêl thût thûta.

¹² Khanchu nin khopui roiinpui ngêt kha mualphoi le hmâimôkin om a ti. Babulon ram chu nam tin laia a poimo tak ni a ta; ramchâr chang ta a ti.

¹³ Ki ningmurna sikin Babulon-a tûte om ta no nihaia; inramin masan ni a ta, a theng inlôihaiin inlâiin an irngai irkhêl a ti.

¹⁴ “Thal kâp mihai, Babulon doi hrangin irtâng unglân irhual roi. Rengpa’n keima chunga a tho’nsual sikin nin thalhai leh khan Babulon kâp roi.

¹⁵ Khopui irhualin irdoi hrangin tânginsam roi. Babulon chu ar pêk tâka, a kulbang chu a koi tâka, a ichim a ni ta. Babulon-hai chunga phuba ki ilâk a ni. Khaangin an chunga hin phuba la unglân, mi danghai an isoisak lam ang takin anni khom soisakhai roi.

¹⁶ Kha rama khan chichôi khom phal pehai no roi. Kha hmuna ram dang mi a omhaiin a hong doi sipai pâlhai kha chihai an ta, an in tiang kîr nôk an ti,” a tia.

Israelhai kîr nôkna

¹⁷ Khan Rengpa’n, “Israel mihai chu belra pâl, kâmkeibakneihaiin an irzûla an irthekchit ang hi an ni. A phut taka Assuria rêngin a doia, kha hnung Babulon rama rêng Nebukadnezara’n an ruhai an rêt pehai nôka.

¹⁸ Hi sika hin keima Rengpa Itinrêngthothei, Israelhai Pathianin rêng Nebukadnezara le a ram chu dûk ki itho hrang a nia, Assuria rêng dûk ki itho anga khan,

¹⁹ Israel mihai chu an ram ngêta inomtirhai ki ta, Karmel tâng le Basan vêla an fâk invânghai nêk an ti.

²⁰ Kha zoro kha a hong tungin chu, Israel rama sual sin hmu ni ta no nia, Judai rama tho’nchâina hmu ni ta no ni, an hringna ki inzôk pehai kha ki ngaidam hrang tâk sikin, keima Rengpa’n ki iti a ni,” a tia.

Babulon rama Pathian roirêlna

²¹ Khan Rengpa’n, “Merathaim ram le a mihai le Pekod-ah omhai chu doi roi. Thathai unglân, irhmangtirhai roi. Thu nangni ki ipêk ang tak hin tho roi. Keima Rengpa’n ki iti tâk a ni.

²² Irdoina irhâi chu ram sûnga a’rhâi inhriat a nia, siatna irkhêl kha a iom a ni.

²³ Babulon ramin rammual pumpui hi sekchôi leh a suk chita, atûn chu kha sekchôi kha a siat tâk! Kha ram chunga thil tung kha nam tinin an ilôi a ni.

²⁴ Babulon ram, ni ni doia, ni inhriat loina khan châng nang ki kam pea, ni ikhit tâk a ni hi.

²⁵ Ki râltukfam siana hmun chu ki inhong a nia, ki ningmur hraiin ki râltukfam ki ilâksuak a ni. Keima Rengpa Itinrêngthothei ngei hin, Babulon ram sûnga sintho hrang ki nei sikin.

²⁶ Kil tina irthokin doi unglân, a bu siana hmunhai kha inhong unglân! Râllâk thilhai chu bupông angin inpông unglân; ram kha insiatchit roi, ite zel hôi no roi!

²⁷ Sipaihai chu that ving unglân, irchan paihai roi! Babulon ram mihai chung chu intak pehai a ti, anni dûk tho zoro a hong tung tâk sikin,” a tia.

²⁸ (Babulon rama irthokin râl chia intâna zôkin Jerusalema an honga, tempil chunga an thiltho sikin Rengpa kin Pathianin Babulon-hai chunga phuba a lâk dânhai an sîra.)

²⁹ Khan Rengpa’n, “Babulon doi hrangin inhril roi. Mi tukhom thal hmang dân inhriat tâk kai chu tîrsuak roi. Khopui kha irhual khak unglân, tûte inzôk no roi. A thil thohai kha thuan nôk unglân, mi a ilôhai lam takin thohai roi, Israel mi irthiang ki chunga irpâkna’n a tho sikin.

³⁰ Khasikin a ruathartehai chu khopui kotsuahaia that ni an ta, a sipaihai khom that ni an ti. Keima Rengpa’n ki iti a ni.

³¹ “Babulon ram, nang chu irpâkna sip ni nia, khasika khan keima Rengpa Itinrêngthothei, Pathianin nang ki idoi a ni. Dûk nang tho zoro a hong itung a ni ta.

³² Ni nam irpâkna chu irthîn a ta, inrîl a ti, tûte an dingtir nôk hrangin nang san no nihai. Ni khopui chu hâl ki ta, a kôlvêla om murdi kânghai ving a ti,” a tia.

³³ Khan Rengpa Itinrêngthotheiin hiang hin a ti, “Israel mihai le Juda mihai chu sirbea om an nia, a cheltuhaiin satakin an hrunga, insua nuam ta mahai.

³⁴ Anni inzôktir hrang chu mi hrât a nia, ar hming chu Rengpa Itinrêngthothei a ni. Anni chu thophai mai a ta, irnênga irngeina inlêng a ta, Babulon ram mihai chunga rêk chu buaina intungtir a ti,” a tia.

³⁵ Khan Rengpa’n, “Khandai chu Kaldaihai chunga, Babulon mihai chunga, a roirêltu vârhai chunga a inlang chian a ni.

³⁶ Khandai chu deipu pâlhai chunga an lang chian a nia, a len tohai rêk chu! Khandai chu sipaihai chunga an lang chian a ni, an milung a zîng dân chu!

³⁷ A sakorhai chu tâlihai chunga khandai a oma, nam dang sipai a hruaihai chunga khom an irzal zoi tâka! A’rchonhai insiat unglân, inru unglân, râllâk thilhai la roi.

³⁸ A ram chunga khua hâl pe unglân, a ivadunghai inchâr pehai roi. Babulon ram chu millim irkhêl tamna a nia, khahai khan mihai invêtin a isiamhai a ni.

³⁹ “Khasikin Babulon chu khohrihai le irtha saloihai irfangin le ramchâra simbu omna ni a ti. Kha khan mi om nôk ta ngai no nihai, zoro la hong om hranga khom tûte lêng thei no nihai.

⁴⁰ Sodom le Gomora le a kôlvêla khuahai kin siat lai ang khan thil a itung nôk hrang a ni. Khatak khan mi om nôk thei no nihai. Keima Rengpa’n ki iti a ni.

⁴¹ Mi hmâr tiang rama irthokin an zuanga, nam hrât tak ram hlataka irthokin; rêng tamtak irdoina hmuna fe hrangin an irsiam ta.

⁴² An thalhai le khandaihai chôia; nunter le khonzâna nei loi an ni. An irhâi chu tuipui irsok irhâi inring ang kha a nia, an sakorhai chunga an hong chuang lai khan Babulon ram doi hrangin an irsiam diam tâk a ni.

⁴³ Babulon rama rêngin an thurchi a len hriata, a kuthai chu a’rzal zoi tâka. Lungzîngna’n a dea, nupang nâiha isê angin natna khan a chela.

⁴⁴ “Kâmkeibaknei rampui sêt ata Jordan dung hong zuia sûlhring hmun dêna hong angin, keima Rengpa hi hong ki ta, Babulon-hai chu inrang takin an khopui ata inhnotsuakhai ki ti. Khanchu hruaitu ki inthang khan nam chunga roirêl a ti. Keima le ni hrilirkhi thei tu mo om? Tu mo a ni sêl ngam hrang? Tu roirêltu’n mo ni sêl ngam hrang?

⁴⁵ Khasikin Babulon khopui doia ki thiltum le a mihai chunga ki itho hrang hi irngai roi. An nâihai tena lua kaiphîthaiin, mi tinin an ichi hrang a ni.

⁴⁶ Babulon an rîl tika chu, irhâi irkhêl tak om a ta, irnêng pumpui inhnîng a ta, chitnain khêk irhâi chu nam danghaiin inhria an ti,” a tia.