JEREMIA 44 - PATHIAN LEKHABU IRTHIANG C.L. Bible (BSI)

Aigupta rama Israel omhai kuanga Pathian chongbe

¹ Rengpa’n Israel mi murdi Aigupta rama khopui Migdol, Tahfanes le Nof le sim tianga omhai chungchânga a ni chongpuia.

² Rengpa Itinrêngthothei, Israelhai Pathianin a iti a ni, “Nangni ngêtin Jerusalem le Judai ram khopui danghai siat chitna ki intungtir kha nin ihmu a ni. Atûn ten khom hin an la iram mai a nia, tûte a sûnga la om mahai.

³ A sûnga mihaiin thil saloi an thoa, ki ning an inmurtir sikin, anni mo, nangni le nin irchibulhaiin chubai an imûk ngai loi pathianhai kuang irbôlnahai inhlanin pathian danghai sin an itho pehai a ni.

⁴ Zoro sôt ok loiin a ni zui, ki deipuhai nin kuang ki hong tîra, hi thil porinche ki ihnôl tho loi hranga nangni ki inhril a ni.

⁵ Khan irngai loiin, uksak nuam loiin nin oma. Nin sual sintho pathian danghai kuang irbôlna masan nuam mak chêia.

⁶ Khasika khan ki ningmurna chu Judai ram khuahaia le Jerusalem kotsuahaia ki bukhai ta, mei leh ki ihâl a ni ta. Anni chu ramin le en intak takin a vuana an iom ang hin ki imâksanhai a ni ta.

⁷ “Khaangin atûn hin keima Rengpa Itinrêngthothei, Israelhai Pathianin nin ta hrangin, i lo hranga khaanga thil saloi kha nin itho ti hi nangni ki irdon a ni. Pasalhai, nupanghai, nâipanghai le nâitehai chunga siat chitna intung nin ni, tûte hôi loia an iom hrang hi nin inuam ma ni?

⁸ I lo hranga millimhai chubai mûkin le pathian danghai kuanga irbôla om hrangin nin izuangna Aigupta hin ningmur nin ni irlâktir? Rammuala nam tinin nangni hmusita nin irhming khomâksâma om hranga nin binga siat chitna nin itho mai?

⁹ Judai ram le Jerusalem kotsuahaia nin irchibulhai, Juda rênghai le an khopuihai an dôngmahai, nangni le nin dôngmahai, thilsual nin ithohai kha nin irnghil mo a ini tâk?

¹⁰ A vuan sûn ten hin nin la irhnuai nuam loi hi. Ni chôiirsâng nuam mak chêia, nangni le nin irchibulhai dân ki ipêk murdi zôm mak chêia.

¹¹ “Khasika khan keima Rengpa Itinrêngthothei, Israelhai Pathianin nin ta hranga saloi thil, Judahai irhmangna hrang ki intungtir hrang a ni.

¹² Juda mi a la dam sunhai Aigupta rama fea om tumhai kai chu, an irhmang ving ti ki ieninfel hrang a ni. An rêngin a chîn a lian Aigupta rama, khandaiin aninole châmin mani thi an ti. Enintak tak ni an ta, mihaiin hmusithaiin intuangtirhai an ta, an irhminghai khomâksâmna’n hmang an ti.

¹³ Jerusalema omhai dûk ki ithohai lam takin Aigupta rama omhai khom khandai hai, châm hai, hri le hrâiin dûk ki ithohai hrang a ni.

¹⁴ Tukhom Juda mi a la dam sunhai Aigupta rama om hranga zuang chu, zôkin dam suak thei no nihai. Inkhat lua khomin om nôk hranga an inuam Judai rama khan kîr nôk thei no ni. Mi tômte irtansuakhai ti no chu tûte kîr no nihai,” a tia.

¹⁵ Aigupta rama Pathros hmuna Juda om murdi, an dôngmahaiin pathian danghai kuang mirimhoi an inhlan ngai ti inhriata pasalhai le an laia nupang omhai murdi’n, mipui tamtaka irbûmhai khan ki kuang,

¹⁶ “Rengpa irhminga kin kuanga thu nin insîr kha, irngai no ni ung.

¹⁷ Tho hranga kin iti kai chu tho hrang a ni. Irvân rêngnu kin pathiannu kuang irbôlna inhlan kin ta, uain thilinhlan a ta hrangin bunthuan kin ti, keini le kin irchibulhai kin rênghai le kin hruaituhaiin Judai ram khopuihai le Jerusalem kotsuahaia kin itho ngai ang khan. Kha laia khan bu nêk hrang kin nei hluka, vâng kin saka, ite buaina tong ngai ma ung.

¹⁸ Khan irvân rêngnu kuang irbôl le a ta hranga uain thilinhlan kin mâk nia irthokin, ite zel nei ta ma unga, kin mihai chu khandai le châmin an ithi a ni ta,” an tia.

¹⁹ Khanchu nupanghaiin, “Irvân rêngnu irlim baiin kin siama, irbôlnahai a kuang kin inhlana, uain thilinhlanhai a makunga kin ibunthuan khan, kin ithohai kha kin pasalhaiin a sa an iti a ni,” an tia.

²⁰ Khan keiin hianga ni dontu pasal le nupanghai laia hiang hin an kuang,

²¹ “Rengpa’n Judai ram khopuihaia, Jerusalem kotsuahaia, nangni le nin irchibulhai nin rênghai le nin hruaituhai ram sûnga mi tinin irbôlna nin inhlan kha inhre loiin mo, a irnghil tâk nin isôn ma ni?

²² A vuan sûn ten hin ni ram chu inramin a la oma, a sûnga tûte la om mahai. En intak tak a hong nia, mihaiin a’rhming chu khomâksâmnain an hmanga, Rengpa’n nin pualoina le tho’nsualnahai kha a tuangdiar ta no sikin.

²³ Atûn vânduaina irkhêl nin chunga a zuang itung nasan chu, pathian danghai kuang irbôlna nin inhlana, a thupêkhai zôm loia Rengpa chunga sualna nin sin sika a ni,” ki tia.

^24-25 Rengpa Itinrêngthothei Israelhai Pathianin Aigupta rama Juda mi omhai kuang, a bîk takin nupanghai kuanga hril hranga a ni itihai chu hiang hin ki hrila, “Nangni le nin dôngmahai irrualin irvân rêngnu kuang chonginkungna det tak nin siam tâka. Ama kuang irbôlnahai inhlana, a ta hrangin uain thilinhlanhai inhlan suak hrangin chong nin inkung tâka. Khaangin nin chonginkung chu nin indet mai a nia, nin sintho khomin nin inlangtira ni’n te, a sa! Nin chonginkung chu indet roi! nin chong irkhâmna chu la suak roi!

²⁶ Khan atûn hin Judai rama irthokin Aigupta rama omhmun det takhai Rengpa iti hi irngai roi. Chong irkhâmna neia, ‘Pathian hring irhmingin ki irkhâm a ni,’ tia ki’rhming nin ihmang hrang chu itiklai khomin phal ta ngai no ning.

²⁷ Vângsak loia nin tei chitna ni hrangin ki irngaitua hrang a ni. Inkhatte lua hôi loiin nin om mâka chu, khandaiin aninole hri le hrâiin nin ithi ving hrang a ni.

²⁸ Khan a tômte chu thina ata zôk nin ta, Aigupta rama irthokin Judai rama kîr nôk nin ti. Khanchu a la dam suakhai khan, ki chong mo a dik, anni chong mo a dik ti inhre thei ta an ti.

²⁹ Keima Rengpa, hi hmuna dûk nangni ki lei itho hrang le nangni insiat chit hranga ki chonginkung hong tung indik a tih ti inhriat theina hrang, nangni pe ki ti.

³⁰ Aigupta rêng Hofra Faroa chu ama that tumtu, a râlhai kuta pe ki ti. Juda rêng Zedekia that tumtu Babulon rama rêng Nebukadnezara kuta ki ipêk ang tak khan,” tiin.