JEREMIA 41 - PATHIAN LEKHABU IRTHIANG C.L. Bible (BSI)

¹ Kha kum a tha sarina khan Nethania nâipa Ismaela, Elisama tupa rêng irchia rêng mi lianhai laia inkhat chu mi sômkhat le Mizpa khuaa Gedalia hmu hrangin a fea. An rêngin hmunkhatin bu an nêk laiin,

² Ismaela le a kuanga mi sômkhathai khan an khandaihai kêlsuain Gedalia chu an that tâka.

³ Ismaela khan Israelhai an rêngin Gedalia kuanga om murdi le Babulon ram sipai, khataka omhai kha a thathai vinga.

⁴ Zîng nôka tûte’n Gedalia thi an inhriat mân,

⁵ mi sômriat Sekem, Silo le Samaria irthokin an honga. An hnerkamulhai an voi vinga, an puanhai inpotthêrin an taksahai an ât inphopa. Tempila inhlan hrangin bai le mirimhoi an hong chôia.

⁶ Khaang khan Ismaela chu chap pumin anni donhai hrangin Mizpa khuaa irthokin a fea, anni a va phâkhaiin chu, “Ngaihoi takin Gedalia hmu hrangin hong roi,” a tia.

⁷ Khopui sûnga an lûtin chu Ismaela le a mihai khan anni chu an thathaia, an ruakhai kha tui laia an inthâkhaia.

⁸ Khan an laia mi senkhat la omin, Ismaela kuang khan, “Ngaihoi takin ni that no ro! Buhai, barlihai, hriakhai le khuaihlutui, loia kin ithup a om ti ni isôn loi ma ni?,” an tia. Khanchu anni kha a lan zôkhaia, an rualhai kâra khan a ithathai loi a ni.

⁹ Ismaela’n a ithathai ruak a ipaina tuikuang kha a liana, Israel rêng Baasa a doi laia rêng Asa ichoi a ni. Ismaela’n tuikuang kha mi ruakin an siptira.

¹⁰ Khan, rêng nâinuhai le mi dang Mizpa-a om, sipai hruaitu Nebuzaradana’n Gedalia enkolna hnuaia a isiahai, an rêngin intângna ina intângin a siamhai tâka. Ismaela’n anni chu mi intânga hruaiin Amon ram hualna tiang a fe tâka.

¹¹ Johanana le sipai hruaituhai a kuanga omhai an rêngin Ismaela’n thil a itho insual kha an inhriat tâka.

¹² Khaangin a hnunga a mihai leh an irzûla, Gibeon dîl kôla an va phâka.

¹³ Ismaela mi intânghai khan Johanana le a kuanga sipai hruaituhai kha an hmu’n chu an lôma,

¹⁴ an kîra anni tiang an intâna.

¹⁵ Khan Ismaela le a mi kiriathai chu Johanana kuta irthokin zôkin Amon ram tiang an intân ta.

¹⁶ Johanana le sipai hruaituhai khan, Ismaela’n Gedalia sipaihai, nupanghai le Thainuzelhai a that zoia, Mizpa khuaa irthokin mi intâng a ihruai mipuihai kha an hruai kîrhai vinga.

^17-18 Babulon ram rêngin ram optu hranga a isiam Gedalia kha Ismaela’n a that sika khan, Babulonhai chu an ichi a ni. Khasikin Babulon-haia irthokin zôk hrangin Aigupta tianga panin an fe suak tâka. Lam laia khan Bethlehem kôla Chimham irngam hmuna khan an irngam tâk a ni.