JEREMIA 4 - PATHIAN LEKHABU IRTHIANG C.L. Bible (BSI)

Irlet hranga fialna

¹ Rengpa’n, “Israel mihaio, a kîr nôk nin nuama ni’n chu, keima kuang hong kîr roi. Millim ki ihnôlhai nin khâipaia, keima hrangin iamomin nin oma ni’n chu,

² ki’rhming chonginkungna nin inei hrang kha, thil dik ni a ti. Khaang khan a ni’n chu nam tinrênghaiin satvur hrangin ni ngên an ta, ni chôiirsâng an ti,” a tia.

³ Rengpa’n Judai ram mihai le Jerusalema mihai laia a iti pehai chu, “Nin irnêng âlkai loinahai kha kai unglân; nin chîmu ruhai khom ilhling bila inthek no roi.

⁴ Nangni Judai rama mihai le Jerusalem mihai, keima nin Rengpa leh nin Thuthung kha vong indet roi, ki kuang inhlan roi. Nin inhlan no’n chu thil saloi nin ithohai sika khan ki ninginmur chu mei angin a ichok hrang a ni. Chok a ta, a that thei tûte om no nihai,” a tia.

Judai ram chu rûn hranga insî a ni

⁵ Bekul chu ram pumpuia tum unglân, inring tak le fel takin inpuang roi! Judai rama mihai le Jerusalem mihai chu kul nei khopuihaia intâna lût hrangin hrilhai roi.

⁶ Zion enin irsinsiana târ roi! Zôk hrangin intân unglân, ir-ial ta no roi! Rengpa’n vânduaina irkhêl tak hmâr tiang ata irhmang vingna irkhêl tak a hong itung hrang kêng!

⁷ Kâmkeibaknei a khur ata a hong isuak angin, nam tinhai insiatchit hrang chu a hong irthok a ni ta. Judai ram insiat hrang le a hong tâk Judai ram khopuihai chu irfangin om an ta, an laia tûte irleng no nihai.

⁸ Khasikin bora puan sil unglân, chapin inrung ta roi, Rengpa ningmur ichiom tak khan; Judai ram chu hnung a la isongsan loi a ni sikin.

⁹ Rengpa khan, “Kha ni khan rênghai le mi lianhai chu an thâiindôp a ta, ochaihai buai an ta, deipuhai milung zîng a ti,” a tia.

¹⁰ Khanchu keima’n, “Rengpa Pathian, Jerusalem mihai hi ni ihuanghai kêng a ni hi te! Lungirngamna om a ti, ni lei tia. Khannisian khandaiin kêng an ring a isun pehai chian a ni ta,” ki tia.

¹¹ Ramchâra irthokin phâivua saloi a hong ilût a ni, itia Jerusalem mihai ihril kha an om hrang zoro chu a hong inâi thiai a ni. Thil chînte’n a sêm invuanga om ngai ang kha a ni.

¹² Rengpa thupêka hong phâivua chu kha nêka hrât ual ni a ti. A mihai chungthu rêltu chu ama Rengpa ngêt a ni.

Judai ram Israelhai irhual

¹³ En ta, sûmphâi angin râl an hong so. Irdoina tâlihai chu phâivua angin mipuihai nêkin sakorhai so intân an hrât ual. Ei hrangin intak a ti! ei isiat zoi a ni ta.

¹⁴ Jerusalem ni lungrîla irthokin sual infâi ro, khanchu saninzôkin om ni ti. Idôr mo ni ngaituana sual hi a la iom hrang?

¹⁵ Dan khopui ata le Efraima tâng ata irthokin thurchi hong chôituhaiin thurchi saloi an inpuang mai. Namhai le Jerusalem kuanga ram hlataka irthokin râlhai an ihong a nih ti hril hranga hong an ni. Hi râlhai hin Judai ram khopuihai doi tumin khêk an ta,

¹⁶ Namhai inhrilhai unglân, Jerusalema inpuang roi. Ram hlatak ata irhual hrangin an honga, Juda ram khopuihai rûn hrangin an ikhêk a ni.

¹⁷ Jerusalem chu mi’n loi an ihrung ngai angin, hrung an ta, a mihaiin Rengpa chunga an tehel sikin Rengpa’n a iti a ni.

¹⁸ Judai rama ni omdân le ni thil thohaiin ni chunga a ichum a ni ta. Ni sualna’n ni tuanga; ni milung taka nang a isun a ni ta.

A mihai ta hranga Jeremia lungnatna

¹⁹ A na! tuang zoi ta ma ung, a na! Ki milung a na hraia a nin buai zoi ta! ki idâihrek thei ta loi a ni hi; bekul tum irhâi le irdoina khêk irhâi kin hriat tâk sikin.

²⁰ Vânduaina irkhêl tak an tungtir baka; Ram pumpui a isiat zoi a ni ta. Mitkhap kârin kin puan inhai a siat zoia; an puanzârhai ite om zoi ta mah.

²¹ Idôra sôt mo irdoi hi ki la ihmu maiin, Bekul tum irhâi ki la inhriat hrang?

²² Rengpa’n a tia, “Ki mihai chu an into ba bâka, An ni inhriat loi a ni. Nâipang into angin an oma; Inhriatthiamna nei mahai. Thil saloi tho chu an thei zapa, thil sa tho hrangin chu an hlosamna korong a ni,” tiin.

Irhmangna hong tung hrang Jeremia ihmu

²³ Irnêng ki thîr vêla, a rongkunga; Irvân tiang khom a vâr zel om maka.

²⁴ Mual ki en khomin an inhnîng supa, Tânghai khom an inthing sup supa.

²⁵ Kha hmunhai khan mi, an om zelin hmu ma unga; Vatehai lua vuangin om thei mahaia.

²⁶ Ram hoi le satak khom a châr zoi tâka; A khopuihai chu Rengpa ningmur irkhêl tak sika khan a ram zoi tâka.

²⁷ Rengpa khan, A ram pumpui chu rotsan ni a ta, Khannisian, a mongna chu intungtir no ning.

²⁸ Khasika khan irnêng chu ngûi ruaiin om a ta, irvân khom a inthim khap hrang a ni. Rengpa iti lam tak ni ta a ti, a milung inchong thûl ta no nia, thu mongna chu a siam zoi tâka, irlêktir ta no ni.

²⁹ Sakor chung chuang mihai le thal chôi ngaihai irhû khan, mi tin laizâm tho an ta, A sen chu rampui hnuaia intân an ti, a danghai lungpui kâra irbî an ta, kho tin a rongin masan an ta, Khatak khan tûte lêng thei ta no nihai.

³⁰ Jerusalem a siatchit ni ni ta! i lo hrang mo puan seninlâr leh ni la irvo mai? I lo hrang mo lunghlu angin ni mit ni la induktir mai kha? A’rfêna boia enhoia ni irsiampai kêng a ni! Ni indithai khan nang an hnôla, Nang that kêng an itum tâk.

³¹ Khêk irhâi, nupang nâiha isêa khêk irhâi angin kin hriata, Nupang nâi nei masa taka khêk irhâi ang khan, Kha kha Jerusalem phûk irsam khêk irhâi a nia, A kut pharin, “Ki isiatchit tâk a ni! Ni that hrangin an hong tâk!” a tia.