JEREMIA 38 - PATHIAN LEKHABU IRTHIANG C.L. Bible (BSI)

Jeremia tuikuang châr sûnga

¹ Matana nâipa Sefatia, Pasura nâipa Gedalia, Selemia nâipa Jahukala Malakia nâipa Pasura hai khan mipuihai kuanga ki ihril kha an inhriata,

² Rengpa’n a iti, “Khopuia tukhom a omhai chu, khandaiin mo, châmin mo, aninole hri le hrâiin thi an ti. Babulon-hai kuanga fe chu that ni no nihaia; an hringna chu inzôktirhai hrâm a ti,” ti hi Rengpa’n a iti a ni.

³ Khanchu an kuang Rengpa’n hiang hin a ti, “Babulon rama sipai pâlhai kuta pe ki ta, an ilâkpai hrang a ni,” tiin kin hrilhai saa.

⁴ Khanchu mi lianhai kha rêng kuanga fe’n an ti pea, “Hi mi hi that ngêt hrang a ni. Hianga tong lai hin khopui sûnga sipaihai thâiindôpin an oma, khopuia la om, a tu chunga khom khaang khan a tho chita, mipuihai san tum loiin; anni that vai a ingaitua a ni,” an tia.

⁵ Khanchu rêng Zedekia’n, “Khaang khan a ni’n teh a sa, a chunga hin nin nuam lam takin tho roi; nangni khap thei no ning,” a tia.

⁶ Khanchu a ni hruaia, rêng nâipa tuikuanga khan hrui leh a nin thâka, kha kha hrungtu irkul sûnga om a nia. Tuikuanga khan tui om maka, dialdôk vai a oma, kha khan ki itâk tâk a ni.

⁷ Khannisian, Ethiopia mi thainuzel rêng ina om ngai Ebedmeleka khan tuikuanga an ni sia ti kha an hriata, kha lai taka khan rêng chu Benjamina kotsuaa roi a rêla.

⁸ Khaang khan, Ebedmeleka chu kha khan a fea, rêng kuang a ti pea,

⁹ “Ka pu inlal tak, hi mihai sintho hi a idik loi a ni. Jeremia chu tuikuanga an siaa, khopuia bu a om ta no sikin, kha khan phîngchâmin a iom a ni,” a tia.

¹⁰ Khanchu rêng kha Ebedmeleka chu mi dang inthum tuanghai sain, ki thi mâna ni kêlsua hrangin thu a pêka.

¹¹ Khaangin Ebedmeleka chu mihai leh khan rêngin a neinun siana hmuna fe’n puanchet diar hi a va hmua, hruihrual a zuan thâka.

¹² Hruihruala khan a nin nât loina hrangin puanchet kha ki zakolek hnuaia inchep hrangin a ni hrila. Khaang khan ki thoa.

¹³ Khanchu tuikuang ata a ni kêlsuaa, kha zoiin chu hrungtu irkul sûnga khan a ni sia ta.

Zedekia’n Jeremia thurôn a zong

¹⁴ Zoro danga Zedekia’n a kuang, tempil mikot inthumna khan a ni hruai nôkin chu ki kuang, “Chong nang irdon ki nuama, thudik ni nin hril ki nuam a ni,” a tia.

¹⁵ Khan, keima’n, “Thudik nang ki ihril a ni’n te, ni that ni ta, thurôn nang ki pêk khomin uksak no chi nia,” ki tia.

¹⁶ Khanchu Zedekia’n dâihrekin chonginkungna a neia, “Pathian hring, hringna ni pêktu irhmingin chong kin kung, nang that no ning, nang that nuam mihai kuang khom nang pe no ning,” a tia.

¹⁷ Khanchu Zedekia kin hrila, Rengpa Itinrêngthothei, Israelhai Pathianin a ti, “Babulon sipai ulianhai kuta nir pêka ni’n chu, ni hringna chu inzôkin om a ta, hi khopui khom hi hâlin om no ni. Nangma le ni in sûngkua inzôkin om a ti.

¹⁸ Khannisian nir pêk nuam no’n chu hi khopui hi Babulon-hai kuta pe ni a ta, hâl ving an ta, anni ata chu zôk thei no chi ni,” tiin ki hrila.

¹⁹ Reng khan a ni sâma, “Ei ram mi ngêt Babulon-hai kuanga rothai hi ki ichi a ni. Anni kuta ni pe an ta, nin tuangtir hrai an ti,” a tia.

²⁰ Khan, keima’n, “Anni kuta pêkin om no chi ni, Rengpa chongbe hi zôm hrangin nang ki ingên a ni; khanchu itinrêng fel a ta, ni hringna inzôkin om a ti.

²¹ Khan irpe hranga ni nuam no’n chu thil hong tung hrang chu Rengpa inlârna’n a ni irhmutir a ni tâk.

²² Kha inlârna khan Babulon ram sipai ulianhai kuang nupanghai an rêngin, rêng in ata an hruaihai lai ki ihmu a ni. An suak lai taka an iti chu irngai roh: ‘Reng a rual satakhaiin ama kha an hruai insuala, an thuhnuaia an sia tâka. Atûn dialdôka a ke an ôk pe tena chu, a rualhaiin an mâk tâka,’ an tih” tiin.

²³ Khanchu ki ti pe nôka, “Ni nupanghai le ni nâihai ngei khom an kuta irthokin zôk thei no chi ni. Babulon ram rêngin intângnaa nang hruai a ta, hi khopui hi ihâlpai zit ni a ti,” ki tia.

²⁴ Zedekia’n a ni sâma, “Hi ei chongna hi tûte inhriat ni no ri se, khanchu ni hringna hi ichiom no ni.

²⁵ Mi lianhai nang ki chongpui pe ti an inhriatin chu, hong an ta, imo nin insîr tiin nang irdonna an ti. Thil tinrêng nin hril vingin chu nang that loi hrangin chonginkung an ti.

²⁶ Intângna ina thi hrangin chu nang tîr nôk ta loi hrangin an ni ingên a nih an ti vaiin hrilhai ro,” a tia.

²⁷ Khaang khan mi lianhai chu hongin chong an ni irdona; keima’n rêng hê ni bê lam takin anni chu kin hrilhaia, tukhomin chongna thuhai kha an inhriat no sikin ite tho thei an inei loi a ni.

²⁸ Jerusalem lâk a ni mâka chu, hrungtu irkula khan siain ki iom tâk a ni.