JEREMIA 36 - PATHIAN LEKHABU IRTHIANG C.L. Bible (BSI)

Baruka’n lekha irzuat tempila a tep

¹ Josia nâipa Jehoiakima Juda rêng kum minli an lal kuma khan Rengpa thu chu Jeremia kuang a zuang tunga.

² “Lekhabu inzuat kha lan lân, Israelhai le Judahai le nam danghai chungthu nang ki ihrilhai kha irziak roh. Josia inlal phut laia ni kuanga ki thu insîr le a vuan sûn tena ki thu’nsîrhai a rêngin irziak ving roh.

³ Juda mihaiin an chunga vânduaina irkhêl intungtir hranga ki thiltumhai inhriat pumin, an omdân saloihai an irlet thei duaiin; an irletin chu an tho’nchâina le an sualnahai inzahai ki ti,” a tia.

⁴ Khaang khan Neria nâipa Baruka chu ki koia, ki kuang Rengpa thu’nsîr a rêngin kin sîr pea, khahai kha Baruka’n lekhabu irzuata a lei irziaka.

⁵ Khanchu Baruka chu hiang hin hê ki bêa, “keima chu tempila lût hrangin phal ni ma unga,

⁶ khasikin zoro danga mipuihai bu an nghei zoroa tempila ni ife hi nang ki inuampui a ni. Rengpa ni iti pe ni kuanga ki itihai kha, an inhriat theina hrangin kutziak kha inring takin ni itep hrang a ni. Kha kha mi tin, Juda mihai khopuia honghai inhriat theina hrang hmuna tep suak roh.

⁷ Rengpa’n a ningmur ichiom tak leh an sîhai sikin, an omdân saloihai ata irletin Rengpa kuang ngaidamna an zong duai khom a ni thei,” tiin.

⁸ Khaang khan Baruka’n Rengpa thuhai chu ki inhril lam takin a tep suak tâka.

⁹ Juda rêng Jehoiakima an lal kum ringana, a tha kuakna khan, Rengpa lunghoina hrangin mihaiin bu an ngheia. Jerusalema om murdihai le Judai ram khopuihaia irthoka mi honghai khan bu nghei nikhua an ichâm a ni.

¹⁰ Khanchu mipuihaiin an irngaihai lai taka khan, lekha bu inzuata ki iti murdi kha tempila ziaktu Safana nâipa Gemaria tentana irthoka khan mi tin inhriatin a tepa. A tentan chu chontan chunginta lûtna tempil mikot thar kôla om a ni.

Mi lianhai makunga lekhabu inzuat tep

¹¹ Gemaria nâipa Mikaia, Safana tupa khan lekhabu inzuat Rengpa iti Baruka itep kha an hriata.

¹² Reng ina a fea, roirêlhai irziaktu tentana a lûta, kha khan mi lianhai an rêngin roi an rêla. Kha mihai kha ziaktu Elisama, Semaia nâipa Delaia, Akbora nâipa Elnathana, Sefama nâipa Gemaria, Hanania nâipa Zedekia le ulian danghai an ni.

¹³ Baruka’n mipuihai kuang lekhabu inzuat a tepna irthoka inhriathai kha Mikaia khan anni chu a hrila.

¹⁴ Mi lianhai khan Nethania nâipa Jehudia chu Baruka kuang an tîra, lekhabu inzuat mipuihai inhriata tep kha hong chôi hranga inhril hrangin, Baruka’n lekhabu inzuat a hong chôi pehaia.

¹⁵ Anni khan, “Toiin lân lekhabu inzuat chu ni tep pe ro,” an tia. An iti lam takin Baruka’n a tho tâka.

¹⁶ A tep zoiin chu chipumin an ir-ena, Baruka kuang khan, “Hi thu hi rêng kuang hril ngêt kin ti,” an tia.

¹⁷ Khanchu an irdona, “Hi thuhai hi itina ni irziak mo nin hril ro, Jeremia’n nang a iti pe ma ni?,” an tia.

¹⁸ Baruka’n a sâmhaia, “Jeremia’n chongbâi tin hi ki kuang a ni ti pea, khan keiin lekhabu inzuat hi kolom tui leh ki lei irziak a ni,” tiin a sâmhaia.

¹⁹ Khanchu a kuang khan, “Jeremia le nin irbîk ngêt hrang a nia, nin omna kha tûte nin inhriattirhai hrang ni ma,” an ti pea.

Rengin lekhabu inzuat a hâl

²⁰ Khan, ulianhai khan ziaktu Elisama tentana khan lekhabu inzuat kha an siaa, rêng roirêlna hmuna an fea, kha khan an thu inhriathai kha rêng an inhrila.

²¹ Reng khan Jehudia chu lekhabu inzuat va la hrangin a tîra. Elisama tentana va lâkin rêng le a milian, ama irhualkhaka ngîrhai kuang khan a tep tâka.

²² Phalbi zoro a nia, a phalbi ina khan rêng chu mei kôla a itoi a ni.

²³ Jehudia khan tuan thum tuan minli vêl a tep zoiin chu, rêng khan chemte leh a ât thêra, meia a pai tâka. Lekhabu inzuat kha a kâng zoi mâka chu khaang khan a itho a ni.

²⁴ Khan rêng mo, a ulianhai khom kha a thu inhriat a chi mo, beiindongin tûte om mahai.

²⁵ Elnathana, Delaia, Gemaria haiin lekhabu inzuat hâl loi hrangin rêng an ngên mai khomin, ama’n ite irngai pehai maka.

²⁶ Khanchu rêng nâipa Jerahmeela, Azriela nâipa Seraia, Abdeela nâipa Selemia hai chu keima le ki ziaktu Baruka chel hrangin thu a pêk tâka. Khannisian Rengpa’n kin ruaiin a ni thup tâka.

Jeremia’n lekhabu inzuat dang a’rziak nôk

²⁷ Reng Jehoiakima’n Baruka kuang a sâm pea, irziak lekhabu inzuat a hâl zoi hnunga khan,

²⁸ Rengpa’n lekhabu inzuat dang a lâk nôka lekhabu inzuat matona lei chuanghai kha irziak nôk hrangin a ni hrila.

²⁹ Rengpa’n rêng kuanga ti pe hrangin a nin hrila, “Lekhabu inzuat chu ni hâla, Babulon rêng hongin, hi ram hi insiat chit a ta, a mihai le a sahai thatpai a ti. Itho sika ni irziak moh ti Jeremia chu nir dona.

³⁰ Khasikin atûn nang rêng Jehoiakima kuang, keima Rengpa’n ki iti a ni: ni irchi ata khom Davida rêng rama hin roirêl no ni. Ni ruak chu sûn misa le zân dâi tuangna hrang hmuna ipai ni a ti.

³¹ Nin sual sikin nangma le nir chihai, ni milianhai dûk nangni tho ki ti. Nangin mo, Jerusalem le Judai ram mihaiin nangni ki ihril uksak mak chêia, khasika khan nangni ki lei insîna ngai vânduaina irkhêl murdi nin chunga insum ki ti.

³² Khanchu lekhabu inzuat dang ki lâk nôka, ki ziaktu Baruka chu ki pêka, ki iti pe kai a lei irziaka. Lekhabu inzuat matona chuang murdi ki lei isâm pe tâk le chongbe ir-anghai a’rziak tâka.