JEREMIA 35 - PATHIAN LEKHABU IRTHIANG C.L. Bible (BSI)

Jeremia le Rekaba irchihai

¹ Josia nâipa Jehoiakima, Judai rama rêng a ni laiin Rengpa’n a ni tia,

² “Rekaba in sûng mihai laia fe’n lân, chongpuihai ro, khanchu tempil tentanhai laia inkhat khôk hruai inlûthaiin lân, anni chu uain in hrang pehai ro,” a tia.

³ Khaangin Habazinia nâipa Jeremia dang nâi Jaazania le a urênghai le a nâi an rêngin le Rekaba in sûngkuahai ki hruaihaia,

⁴ Rengpa tempila anni chu ki hruaia. Igdalia nâipa deipu Hanana tentana ki lûtpuia. Kha khan mi lianhai tentan kôl, mikot nghâktu Saluma nâipa Maaseia tentan sûnga om a ni.

⁵ Khanchu khilât le khêng ûm uaina sip chu Rekaba in sûng mihai kuang lâkin an kuang, “Uain hi in roi,” ki ti pehaia.

⁶ Anni khan an ni sâma, “Uain in ngai ma ung, kin irchibul Jonadaba, Rekaba nâipa khan keini le kin nâihaiin uain in viat loi hrangin a ni ihril a ni.

⁷ Kha vai kha ni loiin, sin zong le loi tho loi hrangin a ni tia, grep irhuan khom sin loi hrangin le ircho loi hrangin a ni ihril a ni. Hi ram mikhual anga kin omna ram hin kin om mai theina hrangin itiklai khomin puan ina om mai hrangin thu a ni ipêk a ni.

⁸ Khaang khan Jonadaba’n irchutirna a ni ipêk murdi chu kin hong zôm ngaia, keini le kin dôngmahai, kin nâipasalhai le nâinupanghai khomin tûte’n uain in ngai ma unga.

^9-10 Kin omna hrang khom in sin ngai ma unga, puan inhaia kin oma, grep irhuan khom sin ngai ma unga, loi khom nei ma unga, fâk nêk khom nei ma ung.

¹¹ Khan rêng Nebukadnezara’n hi ram hi a hong rûna khan, Babulon ram le Suria sipaihai ata zôk hrangin Jerusalema hongin thu kin rêla. Khasika khan atûn hin Jerusalema kin iom tâk a ni,” an tia.

^12-13 Khanchu Rengpa, Itinrêngthothei Israelhai Pathian khan, Juda mihai le Jerusalema omhai kuang fea an kuang ti pehai hrang a ni hrila, “Keima Rengpa’n ki thu mikuar sung loia ki irchutirna zôm hranga zôm nuam loi nin om moh ti nangni ki irdon a ni.

¹⁴ Jonadaba irchihaiin chu uain in loi hranga thupêk kha an zôma, a vuan sûn ten hin nin laia inkhat khom uain in la om mahai. Khan keima’n chu nin kuang thu kin sîr khomin ki thu zôm nuam ngai mak chêia.

¹⁵ Nin laia a ni zui deipuhai ki tîrhai maia, nin omdân sualhai masana, thil sa tho hrangin nangni an lei hril ngaia. Nangni le nin irchibulhai ki ipêkna ram hin om kumkhua thei hranga pathian danghai chubai mûka an sin tho loi hrangin nangni an hril ngaia. Khan khomin ki chong irngai nuam mak chêia, nin ni uksak nuam loi a ni.

¹⁶ Jonadaba irchihaiin chu an irchibul thupêk an zôma, nangni rêkin chu zôm nuam mak chêi.

¹⁷ Khasikin atûn keima, Rengpa Israelhai Pathianin vânduaina irkhêl ki inkung kha nangni Judai ram le Jerusalema mihai chunga ki insum hrang a ni. Nin kuang thu ki hril lai khan irngai nuam mak chêia, nangni ki koi lai khan nin ni sâm nuam no sikin, hi hi ki itho hrang a ni,” a tia.

¹⁸ Khanchu, Rekaba irchihai kha kin hrila, an kuang, Rengpa Itinrêngthothei Israelhai Pathianin a ti, “Nin irchibul Jonadaba thupêk nin zôma, a irchutirna nin zuia, a thupêk murdi nin tho ving a ni.

¹⁹ Khasikin, keima Rengpa Itinrêngthothei Israelhai Pathianin ki sintho hrangin Rekaba nâipa Jonadaba irchia nâipasal irsam ngai no nihai ti chong ki inkung a ni,” a tia.