JEREMIA 34 - PATHIAN LEKHABU IRTHIANG C.L. Bible (BSI)

Zedekia hranga chongbe

¹ Babulon rama rêng Nebukadnezara le sipai pâl, a ihruaina ram rêng ram sûnga nam tin chi tinhaiin, Jerusalem le a kôlvêla khua an doi lai khan Rengpa’n a ni chongpuia,

² Rengpa, Israelhai Pathianin rêng Zedekia kuanga fea, a kuang hril pe hrangin a ni tîra, “Keima, Rengpa’n hi khopui hi Babulon ram rêng kuta inhlan ki ta, ama’n a ihâl ving hrang a ni.

³ Zôk thei no chi nia; chelin om ni ti, ama kuang pêkin om ni ti. Ama chu hmâiirtongin hmu ni ta, hmêl irhmuin chong nin ti; kha hnung chu Babulon rama fe ni ti.

⁴ Zedekia, ni chungchâng thu ki insîr hi irngai roh. Irdoina hmuna that ni no chi ni.

⁵ Irtharngam takin thi ni ta, nir chibulhaiin ni matona rêng lei changhai an iphûm zoroa mipuihaiin mirimhoi an ihâl ang khan nangma ta hrangin hâl an ti. Nang châ an ta, ‘Ei rêng chu a thi ta na!’ ti an ti. Keima Rengpa’n ki iti a ni,” a tia.

⁶ Khanchu hi thurchi hi rêng Zedekia kuang Jerusalema khan ki pêka;

⁷ Babulon ram rêng sipai pâlin khopui an doi lai taka khan, Judai rama khopui kul nei a la omsun Lakis le Azeka khom kha sipai pâlhai khan an doi saa.

Suak enkol thua irhuangna

⁸ Reng Zedekia le Jerusalema mihai khan,

⁹ an Hebrai suak pasal le nupang suak ata insua hrangin thuthungna an neia, mi tukhomin an irchihai Israel mi suaka siam loi hrangin.

¹⁰ Mipuihai le an hruaituhai leh khan an suakhai insuaa suak inchangtirhai ta loi hrangin, a sa an tia. Khanchu an insuahai tâka.

¹¹ Kha hnung chu an lungrîlhai indanglamin an hruai kîrhai nôka, nakhrâtin suak an inchanghai nôk tâka.

¹² Khanchu Rengpa,

¹³ Israelhai Pathian khan a mihai kuang ti pehai hrangin a nin hrila, “Aigupta rama irthoka sansuaka, suak nina ata kin zalêntir lai khan nin irchibulhai leh thuthung ki isiam a ni. Anni chu kum sari a hong dên rikipin,

¹⁴ tu Hebrai suak khom an sin kum ruk a lei hong tho tâk kha, an insua hrang a nih tiin kin hrila. Khannisian nin irchibulhaiin an irngaisak loi a ni.

¹⁵ Zoro sôtloite sûnga hin nin lungrîl indanglamin ki thil nuam lam nin thoa. Nin rêngin nin urêng Israelhai inzalêntir hrangin nin irruala, keima inhriatin chubai mûka ki omna ngai, ki tempila thuthungna nin nei a ni.

¹⁶ Kha hnungin nin lungrîl theng nôkin mahrip ni tho mak chêia. Zalên taka nin inomtirhai kha nin hruai kîrhai nôka, suak changna khan nakhrâtin nin thunlûthai nôk a ni.

¹⁷ Khasikin atûn hin ki thu zôm mak chêi, keima Rengpa’n ki iti a ni; nin irchi Israelhai zalênna nin ipêk loi a ni. A sa hiang hin zalênna nangni pe ki ti. Khandai, hri le hrâi, châma thi hrang zalênna chu, nin chunga ki sinthôna khan rammuala nam tinhai ichiin om ki ti.

^18-19 Juda mi lianhai le Jerusalema mi lianhai le rêng ina thainuzelhai, ochaihai, hruaitu murdi, an rêngin sehrâtchal bong hnia an itan kâra irlôiin keima leh thuthung an isiam a ni. Khannisian an thuthung angin an itho loi a ni. Khasikin sehrâtchal chunga an isin tak kha ki mihai chunga hin tho ki ti.

²⁰ Anni chu a lei that nuam an râlhai kuta pe ki ta, an ruakhai chu vâhai le ramsahaiin fa an ti.

²¹ Juda rêng Zedekia le a mi lianhai khom a that nuamhai kuta pehai sa ki ti. Nangni doi ngam tak, Babulon sipai pâl kuta inhlanhai hrang a ni.

²² Thu pe ki ta, hi khopuia hin hong kîr nôk an ti. Judai ram khopuihai chu ramchâr, tûte om thei loina hmunin siam ki ti. Keima, Rengpa’n ki iti a ni,” a tia.