JEREMIA 31 - PATHIAN LEKHABU IRTHIANG C.L. Bible (BSI)

Israelhai kîr nôkna

¹ Kha zoiin chu keima hi Israel in sûngkua murdihai Pathian ni ki ta, anni khom ki mihai ni an ti, Rengpa thu suakin a ti.

² Rengpa’n hiang hin a ti: khandaia la thi zoi loihaiin ramchâra inrenna hlo an ta, Israelhaiin irngamna ram an pan lai khan,

³ tiana ki kuanga zuang inlang Rengpa khan, “Lungthung hek ngai loiin lung nang ki thunga, phûkdâi takin nang hruai mai ki ti,” a tia.

⁴ O dôngmate Israel, nan ding inthartir nôk ki ti. Nin khuanghai lâkin raifân taka lâm hrangin suak nin ti.

⁵ Samari tâng dunga grep irhuan siam nôk nin ta, a phuntuhaiin a ra kha la an ti.

⁶ Râl hrungtuhaiin Efraima tânga mi an koisam nî tung a ti, “Tho Rengpa ei Pathian kuang, Zion-a fe ta ei ti,” tiin.

⁷ Rengpa’n hiang hin a ti. “Jakoba ta hrangin raifân takin hla sak unglân, nam tinin roiinpui tak ta hrangin khêk suak roi. Hril unglân, chôiindôm roi, ‘O Rengpa, Israel la damhai chu sansuakhai ro,’ tiin.

⁸ Irngai ro, anni chu hmâr tiang ata hruaihai ki ta, irnêng hmun tin ata hi, bukkhômhai ki ta. Mitcho le ke’nbâihai khom om sa an ti, nâi vonghai le nâiha isêhai khom nam roiinpui tak chu hi hmuna hin hong kîr nôk an ti.

⁹ Chap puma hong nihai khomsian, irtharngam sakin hruaihai ki ti. Tui kôla le lampui tuanin an irtet thei loina hrangin hruaihai ki ta, Israelhai ta hrangin pa ni ki ta. Efraima chu ki nâilutîr a ni,” a tia.

¹⁰ O namhaio, Rengpa thu hi irngai roi, tuikhanglian kôla ram hlatakhai khom hrilhai roi, Israel indartirtu khan hruaikhômhai nôk a ta, belrapu angin anni chu enkolhai a ti, tiin.

¹¹ Rengpa’n Jakoba chu irtansuak a ta, ama nêka hrâthai kut ata sansuak a ti.

¹² Râifân taka khêkin Zion tâng sîpa hong an ta, Rengpa satna sikin an hmêl raifân takin om a ti. Buhai, uainhai, hriakhai, belra le sahai sikin lôm an ta. Anni chu inhnê taka tui leh buak ngai irhuan ang ni an ta, an chardong ta no ni.

¹³ Dôngmate chu raifânin lâm a ta, ruatharte le tarhai khom lôm an ta, an chardongna lômna inchangtir pehai ki ta, an beidongna irtharngam sakhai ki ti.

¹⁴ Ochaihai chu bu tui tak leh vâihai ki ta, ki mihai chu ki satna khan khop sa an tih ti hi Rengpa thu suak a ni.

Rengpa’n Israelhai lungkhamna

¹⁵ Rengpa’n hiang hin a ti, “Ramah khuaa irhâi an inhriata, milung na taka chap ngui ngui irhâi chu, Rakili khan a nâihai a châa, an om ta no sikin, inthêm inthâi thei ni ta maka.

¹⁶ Ni chap kha mongin lân, ni mitrithi hul ta ri se, ni sinna ra ât ni tih ti hi Rengpa thu suak a ni, anni chu râl ram ata la hong an ti.

¹⁷ Ni sûnmatona chu ni dongtum la sa a ti, nin rama ngêt ni nâihai chu la hong kîr an tih ti hi Rengpa thu suak a ni.

¹⁸ Efraima inhrûm irhâi chu kin hriat maia, ‘Nangin sehrâtilla la sep ngai loi angin ni ni sepa, ni ni irchutir tâk hi. Ni’rheikîrtirin lân, hong kîr ki ta ni hruai roh. Nang chu ki Pathian Rengpa chu ni nia.

¹⁹ Ni nir heikîrtir zoiin chu ki’rsîra, kin hriatthiam zoi tena chu ki’rlet tâka. Ki vânglaia ki’rhming siatna pêlin mualphoi le inzakin ki iom a ni,’ tiin.

²⁰ Efraima chu ki nâipa indit tak, ki inhlu ngôi ngôi a ini loi ma ni? Hnôl ki tum khomin ki milunga a om maia, ama chu kin hriat maia lung ki inkham sabak a ni.

²¹ Lampui irsinsiana sen lân, lampui inhriat theina hrangin chopui phun ro, ni lampui hro chu irsinsia infel roh. Dôngmate Israel hong kîrin lân, ni khopuia hin hong kîr ta roh.

²² O nang, nâinupang pûtsôt iamom loi mihai, idôr mo nang ki inghâk hrang? Rengpa’n irnênga thil a siam inthar tâk mani, nupangin pasal an ivêl tâk hi!” a tia.

Pathian mihai vânsatna hrang

²³ Itinrêng thothei Rengpa Israelhai Pathianin hiang hin a ti, “An sal intângna ata ki hruai kîrhai nôk tena chu Judai ram le a khopuihai ata chu hianga chongbâi hi hmang an ti, ‘O mi dikhai omna hmun, o tâng irthiang, Rengpa’n sat nang vur ri se,’ tiin.

²⁴ Judai ram le a khopuihai khan loi neituhai le belra entuhai lêngsuam an ti.

²⁵ Mi hrât loihai inhrâttirhai ki ta, châmsôl irveihai chu infatirhai ki ti.

²⁶ Ki lei in kha ki hong harin chu, ki thîr vêla ni’n chu, ki lei iin ok a lei nia.

²⁷ Irngai ro, sûn a hong itung hrang tâk kêng, Israel in sûngkuahai le Juda in sûngkuahai laia mihriam le sa inpungtirhai ki tah ti hi Rengpa thu suak a ni.

²⁸ Annihai inpotsuaka insiathai hrang, irtettira inhekhai hrang le inkamangtirhai hrangin ki lei tuma; khannisian, indingtir le indettirhai hrangin ki lei ihrung a nih ti hi Rengpa thu suak a ni.

²⁹ Kha ni khan chu mihaiin, ‘Pahaiin grep thûr an fâk sikin, an nâihai ha a kima,’ ti nôk ta ngai no nihai.

³⁰ Mi tinin mâni sualna thipui an ta, tukhom grep thûr fâkhai kai chu an ha kim a ti,” a tia.

³¹ Khan Rengpa’n, “Irngai ro, sûnhai a hong nâi ta, ti hi Rengpa thu suak a ni. Israel in sûngkuahai le Juda in sûngkuahai le thuthung thar siam ki tah ti hi Rengpa thu suak a ni.

³² An irchibulhai Aigupta ram ata hruaisuak hranga an kuta ki chelhai laia ki thuthung ang kha ni ta no ni. Anni hrangin hruaitu ki ni sûng chu ki thuthung kha zui nuam loiin ti hi Rengpa thu suak a ni.

³³ Kha ni tena Israel in sûngkuahai le ki thuthung hrang chu hi hi a ni. An lungrîla ki dân sia ki ta, an milunga irziak sa ki ti. Kei an Pathian ni ki ta, anni chu ki mihai ni an ti.

³⁴ Rengpa chu inhre mai roi, ti’n tûte’n an rualhai le an urênghai irchutir no nihai. A chîn ata a lian dênin nin hre mai an tah ti hi Rengpa thu suak a ni. Khanchu an sin insiatnahai ngaidam ki ta, an sualnahai inhre ta no ning,” a tia.

³⁵ Rengpa’n hiang hin a ti, sûn invârtir hrangin misa a sina, zân invârtir hrangin tha le ârsihai ar fûktira, irhâi tam hrangin tuikhanglian chu an ri dur dura, ar hming chu itinrêng thothei Rengpa a ni.

³⁶ Hi dânhai hi ki makung ata a boi vaiin Israel irchihai chu hek no nihai ti hi Rengpa thu suak a ni.

³⁷ Rengpa’n hiang hin a ti; chung tianga irvân khi irkhî thei a nia, hnuai tianga irnêng irnghatnahai hi zong suak a ni thei tena, Israel irchihai chu an sin lei thohai murdi sikin paihai ki tih ti hi Rengpa thu suak a ni.

³⁸ Khan Rengpa’n, “Irngai ro, sûnhai a hong nâi ta, Hananela in irsâng ata kul kil lampui kôl dênin khopui chu Rengpa ta hrangin indingthar ni a ta, ti hi Rengpa thu suak a ni.

³⁹ A ramri chu Gareb tâng dênin tûnthaiin om a ta, Goa lama kôi a ti.

⁴⁰ Mithi phûmna le sahrok paina phâi pumpui le a kôlvêla ram pumpui Kidron vadung dênin, nisua tianga sakor lampui kil dênin Rengpa hranga indang a ni. Kha khopui kha chu itiklai khomin indarh le insiat ni ta no ni,” a tia.