JEREMIA 30 - PATHIAN LEKHABU IRTHIANG C.L. Bible (BSI)

A mihai kuanga Rengpa chonginkung

¹ Jeremia kuanga Rengpa thu zuang tung chu:

² “Rengpa Israelhai Pathianin hiang hin a ti: Ni kuanga ki thuhril murdi kha lekhabua irziak roh.

³ Irngai ro, sûnhai a hong nâi ta, ti hi Rengpa thu suak a ni. Ki mi Israelhai le Judahai chu an sal intângna ata insuaktirhai ki ta, an puhai kuanga ki ipêkna rama khan hruaihai nôk ki ti, khanchu ram kha lua an ta,” tiin.

⁴ Hi hi Juda le Israel chungchânga Rengpa thuhril chu a ni,

⁵ Rengpa’n hiang hin a ti, “Chitna le chardong irhâi kin hriat, irtharngamna zel om mah.

⁶ Thîrin irdonhai hi roi, pasalin nâiha an irvei ngai mo? Itina mo nupang nâiha isê angin, pasal ni pumin a pum ar dom lika, a hmêl a idang zoi tâk hi?

⁷ Kha ni sûn kha irkhêl tak ni a ti! Khaang kha om thei no ni, Jakoba chardong zoro hrang chu a ni, khannisian sansuak ni a ti,” tiin.

⁸ Kha ni khan chu a ringkol pêl inkhiaktir pe ki ta, an khitna hrui sûtpai pe ki ta, ram dang mihai siahlo ni ta no nihai,

⁹ an Pathian Rengpa le an rêng hrangin indingtir ki ti, Davida irchi laia mihai sin chu tho ta an ti.

¹⁰ O ki siahlo Jakoba, chi no ro, o Israel chi viat no roh ti hi Rengpa thu suak a ni. Ni’rchi, ram hlataka sala intânghai chu sansuakhai ki ti, Jakoba chu irtharngam tak le zôkriamin om a ti. Tûte’n râl changin insî ta no nihai.

¹¹ A sansuak hrangin ni kuang ki om mai ngai, ti hi Rengpa thu suak a ni. Nangni ki inhnotsuakna rama nam tinhai chu insiatpaihai hlet ki ta, nangma chu nan siatpai chit no ning. A ruk bakin nang irchu ki ta, hrem loiin chu suak ual no chi ni.

¹² Rengpa’n hiang hin a ti, “Ni popna chu indam lik zât ni no ni, ni ituang hi a ina ta hrai a ni.

¹³ Nang changpui hrang om mahaia, ni damna hrangin hloi om ual mah.

¹⁴ Nangma tianga om ngaihaiin nang an irnghil tâka. Nang insâp ta mahai. Râl angin ni pop zoi tâka, inren viat loiin nang ki ihrem a ni. Ni sualna le nin sininsiatna a na hrai sikin.

¹⁵ Ni popna hin imo ni ichiar? Ni natna hi indam lik zât ni ma; ni dik loina a tama, thil tamtak ni tho insual sikin. Hi thil hi ni chunga ki itho a ni.

¹⁶ Nang a fâk inhektuhai chu fâk inhek ni an ti. Ni râlhai murdi sala hruai an ta, mi longtuhai chu longin om an ti. Nin ramtirtuhai chu inramtirhai ki ti.

¹⁷ Nang indamtir nôk ki ta, ni sâbehai khom indamtir ki tah ti hi Rengpa thu suak a ni. ‘Mâksan tûte irngaipoimo loi Zion,’ nang an ti sikin,” a tia.

¹⁸ Rengpa’n hiang hin a ti, “Irngai ro, Jakoba-hai ram chu inding inthar nôk ki ta, a omna hmun chu irngaiirsâng ki ta, khopui lei ram tâk kha siam insa nôk ki ti. Reng inhai khom a hmun ngêta inding nôk a ti.

¹⁹ Kha hmun ata kha lômthu hrilna le raifânna irhâi hong suak a ta, ama chu inpungtir ki ta, hek thei ual ta no nia, roiinpuitir ki ta, nâiinpang no nihai.

²⁰ An nâihai chu matona angin om nôk an ta, keima kuang ngam takin om an ti. Anni zoi theituhai chu hremhai ki ti.

²¹ A mi laia mi ngêt hruaitu’n nei an ta, an lai ata roirêltu hong suak an ta, anni chu ni hong nâi hrangin koihai ki ti. Khanchu ni hong nâi an ta, koi loiin tu mo ni hong nâi ngam hrang? ti hi Rengpa thu suak a ni.

²² Ki mihai ni nin ta, nin Pathian ni ki ti, kei Rengpa hin ki iti a ni,” a tia.

²³ Irngai ro, Rengpa ningmurna phâivua chu na takin a’rtêka, mi pualoihai lu chu a sêm phîthai nenga,

²⁴ a thiltumhai a tunga, a tho zoi mâka chu Rengpa ningmur irkhêl tak chu hek no ni, zoro hnunga chu hihai hi la hong inhre suak nin ti.