JEREMIA 27 - PATHIAN LEKHABU IRTHIANG C.L. Bible (BSI)

Sehrât ringkol Jeremia’n ar bun

¹ Josia nâipa Zedekia, Judai rama rêng a chang phut tiang khan,

² Rengpa’n keima kuang savun hrui le thingbong lâkin, keima hranga lângkol sina ki ring inkoltir hrangin a ni hrila.

³ Khanchu Rengpa’n, Edom, Moab, Tura le Sidon rênghai kuang an palai Jerusalema rêng Zedekia irhmupui hranga honghai kha hmangin chongbe thonhai hrangin a nin hrila.

⁴ Rengpa itinrêng thothei, Israelhai Pathianin an rênghai Rengpa’n a iti kha hril hrangin annihai kha thu pehai hrangin a ni tia:

⁵ “Ki sin thotheina irkhêl tak le ki’rtha hrâtna’n rammual mihriam le irnênga mihriam murdi ki siama; ki mi inthang kuang ki pêk ngai.

⁶ Keima hi ki ni, nam tinhai, a ni zui Babulon rêng Nebukadnezara kut hnuaia sia theitu chu, ramsahai ten lua a sin ki inthotirhai a ni.

⁷ Nam tinrênghaiin a sin tho an ta, a nâi le a tûhai dênin, an naminrîl zoro a tung mâka chu, a sin tho pe an ti: kha zoiin chu nam tamtak le rêng tamtak sin an panam pumpuiin tho ta an ti.

⁸ Babulon rêng Nebukadnezara thuhnuaia om nuam loihai chu a tu rêng ram le a tu panamhai khom khandaiin, châmin, hri le hrâiin dûk thohai ki ti. Nebukadnezara’n insiat chita an om mâka chu.

⁹ Nin deipuhaiin mo, nin tasân thiamhaiin mo, mithi irtha chongpuiin mo, nin dôithiamhai hmanga zoro la hong hrang lei inpuang theina ki neih ti irbêhai chong irngai no roi. An rêngin Babulon rêng kuanga irpe loi hrangin nangni an ihril a ni.

¹⁰ Nangni an huanga, nin ram ata ram hlataka hruaipaiin nangni an isia hrang a ni. Nangni inhnotsuak ki ta, that irhmangin nin iom hrang a ni.

¹¹ A tu nam khom Babulon rêng thuhnuaia omin, a sin thohai chu, an ram ngêta om hrangin phal pehai ki ti, khatak khan oma loimân tho hrangin. Keima Rengpa’n ki iti a ni,” a tia.

¹² Kha thu ngêt kha Judahai rêng Zedekia kuang ki tia, “Babulon rêng thuhnuaia omin lân, ama le a mihai sin tho’n lân, khanchu hring ni ti.

¹³ Itho ngâna mo ni mihai khandai mo, châmin mo, hri le hrâiin nin ithi hrang? Kha kha kêng tu nam khomin Babulon rêng thuhnuaia om nuam loia om hrangin Rengpa’n a iti chu a ni.

¹⁴ A kuanga irpe lût loi hranga nang a hriltu deipuhai hê irngai no ro, nang an ihuang a ni.

¹⁵ Rengpa’n annihai kha a itîr ni ma, ar hming sâmin nangma kuang minlak an itho a ni, a iti a ni. Khasikin nangni inhnotsuak a ta, thatin om nin ti, nangma le ni deipu thu dik loi nang hriltuhai leh hin,” a tia.

¹⁶ Kha hnung chu ochaihai le mipuihai chu Rengpa ihril kha ki ti pehaia, “Tempila neinunhai chu Babulon ata hong lâk kîr nôk ni a ti, tihtu deipuhai thu’nsîr zôm no roi, nangni an ihuang a ni.

¹⁷ An chong khom irngai pehai no roi! Babulon thuhnuaia irpe unglân, hring nin ti! I lo hrang ngân mo hi khopui hi sahrok sahrâi a ichang hrang?

¹⁸ Deipu an ni tataka, ki thu an idong a ni’n te, tempila neinun la omhai hi, Babulon rama chôia a om loina hrangin keima Rengpa itinrêng thothei hi ni ngên ri sehai,” tiin.

^19-20 (Reng Nebukadnezara’n Babulon ram tiang Judai rama rêng Jehoiakina, Jehoiakima nâipa le Judai ram le Jerusalema mi inlârhai a hruai lai khan, dâr chopui irsânghai, dâr tuipang le a’rnghatna le tempil neinun senkhat a imâksan a ni.)

²¹ “Keima Rengpa Itinrêng thothei Israelhai Pathianin tempila le rêng ina neinun la omhai chungchânga ki thu’nsîr hi irngai roh:

²² Babulon tiang chôi ving ni a ta, ki ngaisak nôk mâka chu, kha khan om a ti. Kha hnung chu chôipai nôk ki ta, hi hmuna hin se nôk ki ti. Keima Rengpa’n ki iti a ni,” a tia.