JEREMIA 26 - PATHIAN LEKHABU IRTHIANG C.L. Bible (BSI)

Jeremia roirêlna

¹ Josia nâipa Jehoiakima Judai rama rêng a chang phut tiang khan,

² Rengpa’n ki kuanga a iti chu, “Tempil kholaia ngîrin lân, hril hranga ki thu nang pêkhai, hi hmuna chubai mûkna inhlan hranga Judai ram khopuihai ata hong mipuihai kuang inpuang roh. Ite ip no roh.

³ Mipuihaiin an irngaia an omdân saloihai an mâk theina hrangin, an mâksan theiin chu an thil sual thohai sika khan an chunga vânduaina intung hranga ki irêl sai kha irlêktir pehai ki ti,” a tia.

⁴ Rengpa khan mipuihai kuang hril pehai hrangin a ni hrila, “Keima Rengpa’n nin laia irchutirna nangni ki ipêkhai khom lei ngaipoimo hrangin, kha dungzuiin ki thu hi nin izôm ngêt hrang a ni, ki tia.

⁵ A ni zuihai, ki deipuhai nin laia ki zuang itîr maihai ngai chonghai khom lei ngaipoimo hrangin. an ihrilhai nin lei izôm ngai loi a ni.

⁶ Thuzôm loia nin la om maiin chu hi tempil chunga hin, Silo chunga ki itho ang khan ki itho hrang a nia, khanchu rammuala nam tinin hi khopui irhming hi khomâk irsâmna’n hmang an ti,” tiin.

⁷ Ochaihai, deipuhai le mipuihai an rêngin tempil sûnga, hi thuhai ki inpuang hi an inhriat a ni.

⁸ Khaangin Rengpa’n hril hranga thu a ni ipêkhai ki tho zoiin chu an ni chela an khêka, “Hi sika hin that inruk ni ni!

⁹ I lo hrang mo Rengpa irhmingin hi tempil hi Silo angin om a ta, hi khopui hi siat chitin a sûnga tûte om ta no nihai ni iti?” an tia. Khanchu mipuihaiin an ni irhual tâka.

¹⁰ Hi thuhai hi Juda roirêltuhaiin an inhriatin chu, rêng ina irthokin tempil tiang an fe zela, mikot thar lûtna khan an toi tâka.

¹¹ Khanchu ochaihai le deipuhai khan roirêltuhai le mipuihai kuang khan, “Hi mi hi thi inruk a ni, nin mikuara nin inhriat angin, hi khopui hi a isiat hrang a ni, tiin a inpuang a ni,” an tia.

¹² Khanchu keima’n, “Hi tempil le khopui siat hrang thu ki insîr nin inhriathai kha, Rengpa’n inpuang hranga a ni itîr a ni.

¹³ Nin omdân saloihai khan nin thûl ngêt hrang le nin thil thohai khom nin imâksan ngêt hrang a nanga, Rengpa nin Pathian thu nin izôm ngêt hrang a ni. Nin zômin chu hi khopui chunga vânduaina irkhêl tung hranga lunginchongna a inei kha indanglamtir nôk a ti.

¹⁴ Khan keima chu nin kuta om ki nia, a dik le a sa nin iti kai chu keima chunga khom tho roi.

¹⁵ Khannisian hi hi chu inhre roi; nin ni thata ni’n chu, nangni le hi khopui sûnga mipuihai chu tho’nchâina nei loi, a thattu mophurna nin ipêl hrang a ni, hi irningna chong nangni pe hranga a ni tîrtu chu Rengpa a ni sika hin,” ki tia.

¹⁶ Khanchu hruaituhai le mipuihai khan ochaihai le deipuhai kuang khan, “Hi mi hin Rengpa ei Pathian irhmingin ei laia thu an sîr sikin, thatin a iom hrang ni ma,” an tia.

¹⁷ Kha irzoiin chu upahai le senkhat ngîrin khataka mipui irbûmhai kuang khan a ti pehaia,

¹⁸ “Hezekia kha Judai ram rêng a ni laiin, Moreset mi deipu Mika khan Rengpa itinrêng thothei iti kha mipuihai kha a hrila, ‘Zion chu loi anga inrît inphit chit ni a ta, Jerusalem chu thil saloi bukkhômna ang ni a ta, Tempila ruathartehai chu rampui chang an ti,’ tiin a hrila.

¹⁹ Khan rêng Hezekia le Judai ram mipuihai khan Mika kha that mahaia, Rengpa kha Hezekia a tih sikin, a nuam lam tho hrangin irnak a isong a ni. An chunga vânduaina irkhêl tak tung hranga lunginchong kha Rengpa’n a ithûlpai a ni. Atûn hin eini khomin ei chunga hin vânduaina ichiom tak ei intungtir hrang a ni ta,” an tia.

²⁰ (Mi dang inkhat, Semaia nâipa Uria, Kiriath-jearim mi, Jeremia anga hi khopui le nam danghai dema Rengpa irhminga thu inpuang ngai a oma.

²¹ Reng Jehoiakima le a sipaihai le a mi lianhaiin Uria thu’nsîr kha an inhriatin chu, rêng khan that a tuma. Khanchu Uria’n a len hriata, ichia inthing pumin Aigupta ram tiang laizâm a tho tâka.

²² Khan khomin rêng Jehoiakima’n Akbora nâipa Elnathana le mi senkhathaiin, Uria chel hrangin Aigupta ram tiang a tîra.

²³ Reng Jehoiakima kuang an hong hruaia, kha khan thatin, a ruak kha khotâng irphûmna hmuna pai a ni.)

²⁴ Khannisian Sefama nâipa Ahikama’n a ni thopkhak sikin, mipuihai kuta inhlana thatin ki la iom loi a ni.