JEREMIA 23 - PATHIAN LEKHABU IRTHIANG C.L. Bible (BSI)

Zoro la hong tung hranga tûngna

¹ A mihai insiata, irthekindara roirêltuhai kha an chunga Rengpa roirêlna chu idôra ichiom hrang mo a ini tâk?

² Hi hi Rengpa Israelhai Pathianin a mihai a ienkol hranga hruaituhai chungthua a iti chu a ni: “Ki mihai enkol mak chea, irthekindarin nin irzûlpaihai a ni. Nin thil sual thôna sikin, atûn hin dûk nangni tho ki ti.

³ A la om sunhai ki inthekindartirna ram ata bûmhai nôk ki ta, an ram ngêta hong hruaihai nôk ki ti. Nâi le tê tamtak hong nei an ta, an ipung hrang a ni.

⁴ Annihai enkoltu hrangin hruaituhai phun pehai ki ti. Ki mihai chu chitna sikin mo, kamangin mo, om ta no nihaia, anni chu dûk thohai ta no ning. Keima Rengpa’n ki iti tâk a ni,” a tia.

⁵ Khan Rengpa’n, “Davida irchia mi fel, rêng chang hranga kin thang zoro a hong itung thiai a ni. Rengin vâr takin sintho a ta.

⁶ Rengin a toi tena chu, Juda mihai chu zôk riam ta an ta, Israel mihai chu irtharngamin om ta an ti. Ama chu, ‘Rengpa ei saninhringna’ tia koi ni a ti.

⁷ “Nikhua chu a hong itung thiai a ni,” Rengpa’n a ti. “Mihaiin Pathian hring Israel mihai Aigupta ram ata hong hruai suaktu ki’rhming sâmin chonginkungna det an nei nôk hrang zoro a hong inai thiai a ni.

⁸ Kha nêkin chu Pathian hring Israel mihai hmâr tiang rama le anni ki inthekindarna ram tamtak ata a hong hruai suaktu, ki’rhming sâmin chonginkungna det nei an ti. Khanchu an rama khan om ta an ti,” a tia.

Deipuhai thua Jeremia thuhril

⁹ Ki milung a na bâka, ki sûngrîl tiang a inthing a ni. Rengpa sika khan a thu irthianghai sika khan, mi inrui ki hong ang tâk a ni, mi uain in intam oktu anga hin.

¹⁰ Ram chu Rengpa ta hranga iamom loi mihaiin an sipa; pualoi hringnunhai hmangin an irchamneina an ihmang insual a ni. Rengpa khosâlna sikin ram chu a ngûia, sûl hringna hmunhai a châr zoi tâk.

¹¹ Khan Rengpa’n, “Deipuhai le ochaihai chu Pathian nei loi an nia, ki biak in sûng ngeia thil saloi tho’n ki ihmuhai a ni.

¹² An lampui hro chu ar nâl le inthim ni a ta, anni chu irtetin an inrîl hrang a ni. An chunga vânduaina irkhêl insum ki ta; dûk an tong hrang nî chu a itung thiai a ni ta. Keima Rengpa’n ki iti a ni ta.

¹³ Samari khan deipuhai sualna chu ki hmua; Baal irhmingin thu an inpuanga, ki mihai an ihruai insualhai tâk a ni.

¹⁴ Kha nêka sual ual Jerusalema deipuhaiin sual an isin ki ihmu a ni. An uirea, chong minlak an hrila; thil saloi tho hrangin mihai an changpuia, tukhomin thil saloi sin an mâk no hrang sikin. Ki ta hrangin chu an rêngin Sodom le Gomora mihai anga taksa sual an ni.

¹⁵ Khasika khan, itinrêng sinthei Rengpa, keima’n Jerusalem deipuhai chungthu chu hiang hin ki iti a ni. Anni chu thil khâ fâk hrang le tûr in hrang pe ki ti. Ram pumpuia Pathian chit loina an inthekindartir tâk sikin,” a tia.

¹⁶ Rengpa itinrêng sinthei khan Jerusalem mihai kuang a ti pea, “Deipuhai chong irngai no ro; tûngna dik loihaiin nangni an infâ a ni. Keima iti ni loiin an lungrîla an ingaitua kha nangni an ihril ngai a ni.

¹⁷ Ki thu’nsîr irngai nuam loi mihai kuang khan an ta hrangin itinrêng a sat lam chu ni a ti, an ti pehai ngaia. Mi tukullianhai kuang khan, ‘vânduaina hri tin khomin tôn viat no ni,’ tiin an hril ngai a ni,” a tia.

¹⁸ Ki iti tâk chu, “A tu deipu khomin Rengpa ngaituana irthuphai chu inhre ngai mahai. A tu khomin a chongbe inhriata ar ngaidân inhre loia, a iti irngaiin mo, uksak ngai mahai.

¹⁹ A ningmur chu rua le phâivopui hrât tak mi sualhai insiat hrang chu a nia,

²⁰ itho mo a itumhai a zoi mâka chu mong no ni. Zoro la hong nikhua tamtak hnunga chu a mihai khan fel takin inhrenfel ta an ti,” ki tia.

²¹ Khan Rengpa’n, “Hi deipuhai hi ki itîr ni mahaia, ki tîrhai no khomin an ife a ni. chongbe ite pehai ma unga, khannisian ki’rhmingin thu an insîr ngai a ni.

²² Ki ngaituana irthuphai an inhriat ni sianlân chu, ki mihai kuang ki chongbe inpuang suak an ta, an sual hringnunhai le an sual sinthohai an imâksan thei hrang a ni.

²³ Keima hi hmunkhat ata vai ni loiin hmun tina om ngai Pathian chu ki ni.

²⁴ Ki ihmu thei loina hrang hmuna tûte irbi thei no nihai. Irvân le irnêng hmun tina ki om ti hi nin inhriat loi ma ni?

²⁵ An irmang tianghai ki chongbehai ki ipêk a nih ti ki’rhmingin minlak tho ngai deipuhai iti chu ki inhriat ngai a ni.

²⁶ Kha deipuhai khan mipuihai chu idôra sôt mo an thu phuachôp mipuihai laia an ihruai insual mai hrang hi?

²⁷ An pahaiin hnung an ni songsana Baal tiang an irnghat tâk ang kha, irmang an ihrilfiana khan ki mihai chu ki mihai irnghiltir thei hrangin an ni iiam a ni.

²⁸ Irmang nei deipu khan irmang papai a nih ti inhre ri se, khan deipu, ki chongbe inhriattu khan dik takin a inpuang hrang a ni. Fapôl le bu’rmal hin imo irangna a nei.

²⁹ Ki chongbe chu mei ang a nia, sekchôia lung inkhoktir ang a ni.

³⁰ Deipu mi dang thu’nsîr lâka, ki chongbe anga inpuang ngaihai chu ki hnôla.

³¹ Deipu mâni chongbâi ngeia inpuanga, khan keima kuanga irthokin inlang a nih tituhai khom ki ihnôlhai sa a ni.

³² Rengpa’n ki iti hi irngai roh. An irmang thu minlaka sip inpuang ngai deipuhai chu ki ihnôlhai an ni. An irmang hrilin minlakna le irpâknahaiin ki mihai an hruai insual ngai. Anni chu tîrpaihaia, fe hrangin thu khom pe ma unga, mihai hrangin ite hmangna boi an ni, keima Rengpa’n ki iti a ni,” a tia.

Rengpa hranga puakrik

³³ Khan Rengpa’n ki kuang, “Jeremia, ‘Rengpa chongbe chu imo a ini?’ ti hi tukhomin, deipu’n mo, ochaiin mo nang ar donin chu, ‘Rengpa hrangin puakrik ni nia, nang a ihnôl hrang a ni,’ ti anni chu hrilhai roh.

³⁴ Ki ihmu tu khôkin mani, deipu’n mo, ochaiin mo, ‘Rengpa puakrik’ ti chongbâi a hmangin chu, ama le a in sûngkuahai dûk thohai ki ti.

³⁵ Mi tinin mâni in sûngkua mihai le rual le chimhai kuang, ‘Rengpa’n a idonhai nam a ipêk, Rengpa’n imo a iti?’ an iti hrang a ni.

³⁶ Khaangin Rengpa puakrik ti chongbâi an ihmang viat hrang ni ma, a san chu mi’n an hmangin chu, ki chongbe chu a ta hrangin puakrik takin siam pe ki ti. Mipuihaiin an Pathian, Pathian hring itinrêng sinthei Pathian thuhai chu dik loitakin an hmang tâka.

³⁷ Jeremia, deipuhai kuang khan, ‘Rengpa’n imo nang a iti pe? Rengpa’n imo a iti?’ tiin irdonhai roh.

³⁸ Ki thupêk zôm loia, ‘Rengpa puakrik’ iti chongbâihai an hmangin chu,

³⁹ anni chu lahai ki ta, a ni, anni le an irchibulhai ki ipêk khopui chu hlataka dêngzuan ki ta, ti hi hrilhai roh.

⁴⁰ An chunga kumtuangin irnghil thei loi hrang inzakna le mualphoina intungtir ki ti,” tiin.