JEREMIA 22 - PATHIAN LEKHABU IRTHIANG C.L. Bible (BSI)

Juda rêng in sûngkuahai kuanga Jeremia chongbe

¹ Rengpa’n hiang hin a ti: “Juda rêng ina zu fe’n lân; kha khan hi thu hi hril roh.

² O nang, Juda rêng, Davida toihmun luatu, ni ihruaihai, hi inkhâra lût ngaihai le ni mihai leh Rengpa thu hi irngai roi.

³ Keima Rengpa hin diktak le fel taka roirêl hrangin thu nangni ki ipêk a ni. Mi huanga omtu chu a huangtua irthokin soisak roi. Ram dang mihai, meithâihai, farahai, dengintheitirin mani, sirphûmhai no unglân, tho’nchâina nei loi mihai hmun irthianga thathai no roi.

⁴ Thu nangni ki ipêk ang tak hin nin thoa ni’n chu, Davida irchihai chu rêng ni thei mai an ti. An mi lianhai, an mipuihai leh khan tâli chunga le sakor chunga chuangin, hi rêng in dâi mikota lûtin an isuak mai hrang a ni.

⁵ Khan ki thupêkhai nin zôm noa ni’n chu, nin kuang chong ki irkhâm a nia, hi rêng in hi la ram chit a ti. Keima Rengpa’n ki iti a ni.

⁶ “Ki ta hrangin Juda rêng in chu Gilead ram le Lebanon tâng anga enhoi tak a nia; khan mi tûte om loina hmun inthimin siam ki ti.

⁷ An siat hrangin mi tîr ki ta, meia pai an ti.

⁸ “Kha hnung chu ram dang mi a fehai tamtakin, hi khopui roiinpui chunga hin keima Rengpa’n itho sika hianga ki itho moh tiin irdon irhlôm an ti.

⁹ Khanchu nangni’n thuthung keima le nin inei nin mâk raka, pathian danghai chubai nin mûka, a sin nin tho tâk sika a ni,” ti hril an ti.

Jeremia’n Joahaza chungchâng hrilna

¹⁰ Juda mihaio, rêng Josia kha châ no unglân, a thina hi chûlpui no roi. A nâipa Joahaza ta hrangin chap pe ual roi; Hong kîr thei ta loi hrangin an ihruaipai a ni ta, a’rzirna ram kha hmu thei ta loi hrangin.

¹¹ Josia nâipa chu a pa irthûla Judai rama rêng chang chungchânga Rengpa’n a iti: “Hong kîr thei ta loi hrangin hitak ata irthokin ram hlataka a ife a ni ta.

¹² An ihruaina khan thi a ta, hi ram hi hmu thei ta no ni,” tiin.

Jehoiakima chungchânga Jeremia thuhril

¹³ Mi dik loi taka in sintu, irhuangna sika lian; mihai sinthoa, an tha hlo pe nuam loitu chu, a chung irhel pe a ti.

¹⁴ In roiinpui tak ki ta hranga chungirchuan irsâng takin sin ki tih tituhai chu irhel pe a ti. Khaang khan tukverhai a siama, sidar thing leh a thopa, rông sen a pola.

¹⁵ Sidar thing leh in sin thei sikin, rêng sa ualin nang a isiam ma ni? Ni pa khan diktak le fel takin sin a thoa, a inuam murdi a fâkin a ina, a itho tinrêng chung a tuar pe ngai a ni.

¹⁶ Inrianghai le irsamhai a uksaka, khanchu itinrêng ama hrangin chu a sa inzen a chang pe tâka. Khatak kha kêng Rengpa inhriat tihna chu a ini.

¹⁷ Khan dik loi taka inlâp tumin ni mit nin lêngtira, Thil poi tho loihai ni thata, nakhrât insua’n ni mihai ni sirbehaia. Rengpa’n a iti tâk a ni.

¹⁸ Khasika khan Rengpa’n Juda rêng Jehoiakima, Josia nâipa chungthua hiang hin a iti a ni. “A thina chu mi tukhomin, a poi bâka ki rual, a poi bâka ti no nihai! A ta hrangin tukhomin mitrithi sômin, khêk ni no nihaia, ‘Ka pu, ki rêng!’ tiin.

¹⁹ Sakuartung ruak hrê hrang ang taka hin, Ama chu kaitôlin om a ta, Jerusalem kul pên tianga paiin om a ti,” a tia.

Jerusalem siat hrang thu Jeremia ihril

²⁰ Jerusalem mihai Lebanon tânga lui unglân, pâi unglân, Basan rama fe unglân khêk rak ta roi; Abarim ata chap suak roi. Nin irrualpuihai chu an dok tâk sikin.

²¹ Nin sat lai takin Rengpa’n nangni a chongpuia, nikhomsianlân irngai nuam mak chêi! Kha kha nin dam sûnga nin itho ngai a nia; Rengpa thu ni izôm viat loi hrang tihna a ni.

²² Nin hruaituhai chu phâivua isêm irhmang angin an om tâka. Nin inrualpuihai chu irdoina hmuna chelhai an ti, nin khopui chu mualphoia inzak taka siam ni a ti. Sual sin nin ithohai sika hin.

²³ Lebanon ata nin zuang ichôi sidar ina hoi riamin nin oma; nâiha isê anga natna nin chunga a hong tung tena chu nin inrunga, natinsat hrang tâk chu na!

Jehoiakina chunga Pathian roirêlna

²⁴ Rengpa’n Jehoiakima nâipa Jehoiakina kuang hiang hin a tia, “Pathian hring ki nia, irkhêl ngai loi ang hin nangma Juda rêng Konia, Jehoiakima nâipa ki kut chang tianga namindetna kutsabi ni khomin lân, nang la sutpai ki ti.

²⁵ Nangma that tumtu ni ichi ngai mihai kuang nang ki ipêk hrang a ni. Babulon rêng Nebukadnezara le a sipaihai kuang nang inhlan ki ta,

²⁶ nangma le ni nu chu sala intâng hrangin nangni irzûl ki ti. Tukhomin nin irzirna hmun ni loina khan nin ife hrang a nia, kha hmuna khan thi nin ti.

²⁷ Hi ram hi hmu nôk hrangin irzuk bâk nin ta chu, nin hong ikîr thei ta loi hrang a ni,” a tia.

²⁸ Khan keiin, “Reng Jehoiakina hi bêl koi, dêngzuanpaia om, mihai indit ta loi ang hi a ini tâk ma ni? Hi sik taka hin ram an la inhriat ngai loina hmuna ama le a nâihai chu salin an intâng a ni ta,” ki tia.

²⁹ O ram, o ram, o ram, Rengpa iti hi irngai ro:

³⁰ “Hi mi hi nâi le te nei loi hranga thei loi inchangtir a nia, hlochukna zel nei loi mi ni hrangin. Davida hnung thûl hrang Judai ram roirêl hranga irchi suanpâr nei loi a ni. Keima Rengpa’n ki iti a ni,” a tia.