JEREMIA 18 - PATHIAN LEKHABU IRTHIANG C.L. Bible (BSI)

Bêl vuaktu kuanga Jeremia fena

¹ Khan Rengpa’n ki kuang,

² “Bêl vuaktu ina zu fe’n lân, ama khan ki chongbe nang len hril a ti.” a tia.

³ Khaangin ki zu fea, bêl vuaktu’n khôl leh sintho ki hmua.

⁴ A bêl siam kha a sa a ti no’n chu bêl dang a sin nôk zel ngaia.

⁵ Khanchu Rengpa khan ki kuang,

⁶ “Hi bêl vuaktu hin a itho lam taka hin, nangni mi Israelhai chunga tho theina ki inei loi ma ni? Bêl vuaktu kuta pilpok ang takin ki kut a iom a ni.

⁷ I ang zoroa khom namin mo, rêng ramin mo, phâipai ki ta, setchit ki ta, irhmangtir ki ti, lei ti ngai khom inlân,

⁸ kha namhai khan an sualna an irletin chu, an chunga thil saloi tho ki itum kha irlêk nôk ki ti.

⁹ Khan, i zoroa khom, namin mo, rêng ramin mo, phunhai ki ta, indingtir nôk ki ti, lei ti khom inlân,

¹⁰ ki mithmua thil sual an thoa, ki thu an zôm noa ni’n chu thil sa tho pehai hranga ki itum kha irlêktir nôk ki ti.

¹¹ Khasikin atûn hin Juda mihai le Jerusalema omhai kuang, anni doi hrangin thil ki’rsiama, dûk thohai hrangin ki irzoi diam ta a nih ti hril roh. Anni chu sual sintho hringnun hmang inhek hrangin hril ro, an lampuihai thûla an sinthohai mâkin.

¹² Anni’n, i lo hrang mo kin imâk hrang? Kin rêngin kin nuam dôr tukullianin sual sintho kin ti, imo ar helna om?,” tiin nang sâm an ti.

Mipuihaiin Rengpa an hnôl

¹³ Khan Rengpa’n, “Nam danghai kha irdonhai ngân roi ba; hianga thil hi a lei tung ta ngai mo? Israel mihaiin, thil intak tak an lei itho a ni ta.

¹⁴ Lebanon lungpui irsânghai ivur boiin mo an om ngai?

¹⁵ Ki mihaiin chu an ni’rnghila, millimhai kuang mirimhoi an ihâl a ni. An lampui fena hrang ata an pêta, lampui milui kha zui ta mahaia; lampui irdang loi an izui tâk a ni.

¹⁶ Hi ram hi thil ichiomin an siama, irngaiinhlu loia om mai hrang angin. A theng irlôihaiin an thil hmu kha ar khêl ti an ti. Irngai irkhêlin an luhai khom notpol an ti.

¹⁷ Sak tianga phâivua’n bâli a isêm inlêng ngai angin, ki mihai chu an râlhai makunga irthekindartirhai ki ti. Anni kha hnung songsanhai ki ta; vânduaina irkhêl a tung zoro khomin anni kha changpuihai no ning,” a tia.

Jeremia chunga inrûka thuphana omna

¹⁸ Khanchu mipuihai khan, “Jeremia chungthua hin i mani chu tho ei ti. Itiklai khomin ochaihai le irchu hrang, mi vârhai lungvâr ni sak hrang le deipuhai Pathian chongbe inpuang chu, an iom mai hrang a ni. Khasikin ama chu hrilinsiat ei ta, a thuhrilhai khom hi irngai pe no ih,” an tia.

¹⁹ Khasikin ki chongchai tâka, “Rengpa ki iti hi len hriatin lân, ki râlhaiin ki chungthua an iti hi le’rngai roh.

²⁰ Sual hi thil sa thuanna’n mo a ini? ki tâkna hrang khur an isin a ni. Ningmurna’n ama chu a nin sipa, ni kuang hongin an irthûla ki izong kha inhre mai roh.

²¹ Khan atûn chu, Rengpa an nâihai chu phîngchâmin thihai sian, irdoi zoro’n that ni ri sehai. An dôngmahaiin an pasalhai leh an nâihai inchânhai sian; pasalhai chu hripuia thiin, an ruathartehai chu irtukna buala thi ri sehai.

²² Ki tâkna hrang khur an choia, ki’rkhitna hrang châng an kam sikin, râlhai chu hong tîr thutin lân, an inhai inmokin lân, anni chu khêkin tîrhai roh.

²³ A ni, Rengpa an ni inrûka thuphan dân hi nin hriat vinga. An tho’nchâina mo, an sualna chu ngaidam no roh. Ni ningmur lai takin anni chu intem takin paihai ta ro,” tiin.