JEREMIA 17 - PATHIAN LEKHABU IRTHIANG C.L. Bible (BSI)

Juda sualna le dûk thôna

¹ Khan Rengpa’n, “Juda mihaio, nin sualna chu thîr kolom leh lunghlu hmor irzumin nin lungrîl irziak a nia, nin maichâm irkihaia khom irziak a ni.

² Nin mihaiin maichâmhaia le tâng sîphaia thinghring kung tin hnuaia pathiannu Aseri millim chubai an mûka,

³ hmun tongna tâng sîphaia khom khan, a ram pumpui huapin ni sual sinthotheina sikin ni râlhaiin nir chongna le nir chonhluhai kin ilâk ving hrang a ni.

⁴ Ki ram nang pêk chu masan ni ta, ram ni la inhriat ngai loi hmuna ni râlhai sin thoin nangni siam ki ti. Ki ningmur chu mei ang a nia, a ikângpai hrang a ni,” a tia.

Thu dang dang

⁵ Khan Rengpa’n, “Mi’n hnung ni songsana, mihriam chunga irnghat chu, a fam thei mihriam hrâtna irnghattu chu thiam loi ki inchangtir hrang a ni.

⁶ Anni chu ramchâra sûlribuk ang an nia, hmun inthim ramchâra a mônga, irnêng ôl ite om loina kha, thil sa zel, kha khan om ngai mah.

⁷ Khannisian a iamna ki chunga irnghattu chu satvur ki ti.

⁸ Anni chu tuidung kôla thing mông, a’rzung tui nâi tianga om ang kha a ni. Boiruak lum a om khomin thi ngai ma, a hnâhai chu a hring maia; rotui a om no zoro khomin a milung kâng pe ngai maka, a ira mai ngai a ni.

⁹ Mihriam lungrîl hi thil dang nêka porinche tak a nia, siam insa tak tak a ni, Tu mo an hriat thei hrang?

¹⁰ Keima Rengpa hin nin irngaituanahai ki suia, Mihriamhai lungrîl ki ifia ngai a ni. Mi tin an innun dân dungzuiin an sintho dungzuiin lômman ki pêk ngai,” a tia.

¹¹ Dik loi taka sum hlo suaktu chu varungte ama irtui ni loi, op inkhêitu ang a ni. A la vânglai takin ar chongnahai dok a ta, A mongna chu invêt ti no chu a ihlo hrang dang om mah.

¹² Ei hmun irthiang chu rêngtoihmun roiinpui tak ang kha a nia, a phut ata tâng sîpa om chian ang a ni.

¹³ Rengpa, nangma chu Israelhai isabei tak ni nia; Nangma nang mâktuhai chu mualinphoi an ti. Rengpa hringna tuihnâr thar tak chu nang an mâk sikin. Pil kâra irhming irziak angin irhmang an ti.

Jeremia’n Rengpa chongpuina a zong

¹⁴ Rengpa, nin damtirin lân chu dam ving ki ti, ni sanin lân, zôk ving ta ki ti. Nangma vai nang ki inpâk ngai ni ni.

¹⁵ Mipuihaiin ki kuang, “Rengpa’n irningna chong a ni ipêkhai kha khôn mo a iom tâk? atûn hin tung ta ri se!” an ti ngaia.

¹⁶ Khan khomin Rengpa an chunga vânduaina irkhêl intung hrangin nang lei ngên ngai ma unga, an ta hranga vânduaina zoro a iom hi ki inuam ni mah. Rengpa, hi hi nin hriata, ki iti kha ni inhriat a ni.

¹⁷ Ki ta hrangin chu ichiom ni no ni; nang chu buaina tung zoroa ki zôkna ni ni.

¹⁸ Deng nin theitirtuhai chunga mualphoina insumin lân, Rengpa keima chu ni la hôi roh. Chitna irkhêlin anni chu insipin lân, keima chu ichiomin ni siam no roh. An chunga vânduaina irkhêl intungin lân, thatpaihai ving roh.

Sabat hmang dân

¹⁹ Khan Rengpa’n, “Jeremia, fe’n lân kul dâi mikot dettak chu, Juda rênghai lûtna le an suakna ngaia khan va ngîrin lân, Jerusalem lûtna mikot danghai khom khan ngîr thiaiin lân, ki mihai kuang ki chongbe inpuang roh.

²⁰ Renghai le Juda mipuihai Jerusalema om murdihai le dâi mikota lûthai, ki itih irngai hrangin hrilhai roh.

²¹ An hringna an inlût ngânin chu, Sabat nia ite pêl loi hrangin hril ro, ite Jerusalem mikot khêlin an ilûtpui hrang ni ma;

²² an in sûngkua ata mo, Sabat ni chu thil an ichôi hrang ni ma, nikhua irthiangin an iser hrang a ni, an irchibulhai kuanga ki thupêk angin.

²³ An irchibulhai khan ki thu le’rngai mahaia, an lei irngaisak loi a ni. An tukul an inliantira; ki thupêk zômin mo, keima kuang irchu nuam mahai.

²⁴ “Hi mihai hin ki thupêkhai chu an izôm ngêt hrang a nih ti hril roh. Sabat nî chu dâi mikot palin puak ite a sûng tiang an hong ichôi inlût hrang ni mah. Sabat nî chu sûn irthiangin ser an ta, sin ite an izong hrang ni ma.

²⁵ Khanchu an rênghai le an hruaituhai kha Jerusalem dâi mikot hong lûtin, Davida’n rêng thuneina a inei ang khan nei an ti. Juda mihai le Jerusalema omhai leh khan hmunkhatin tâli chunga le sakor chunga chuangin Jerusalem khopui chu mi sip mai ta an ti.

²⁶ Judahai ram kho sûng ata le Jerusalem vêla khua chînhai ata hong an ta, Benjamina ram hual ata, tâng hnuai ata, tâng sîphai ata, sim tiang Judai rama irthokin mi hong an ti. Ki tempila hâlirvôm thilpêk le irbôlnahai, buvûi thilpêk le mirimhoi hai, khakhêla, lômthu hrilna thilpêk khom hong chôi sa an ti.

²⁷ Hianga ki thu zômin Sabat nî chu sûn irthiangin an iser ngêt hrang a ni. Kha ni khan Jerusalema dâi mikothai khêlin ite an ichôi hrang ni maka. An chôi duaia ni’n chu, Jerusalem dâi mikothai chu mei leh hâl ki ta, kha mei khan Jerusalema rêng inhai le a rêngin kâng ving a ta, tukhomin that thei no nihai,” a tia.