JEREMIA 16 - PATHIAN LEKHABU IRTHIANG C.L. Bible (BSI)

Rengpa’n Jeremia om hrang dân hrilna

¹ Rengpa’n a ni chongpuia a iti chu,

² “Hiang hmuna hin dôngma le nâi le tê nei tum no roh.

³ Hi hmuna nâi suakhai le nu le pahai chunga thil hong om hrang nan hril ki ti.

⁴ Insîna ichiom tak sikin thi an ta, mi tukhomin châhai no nihai, tukhomin a phûm hrang om no nihai. An ruakhai chu sahrok angin irnênga om rak a ti. Irdoina hmuna a ni no le châmna sikin thi an ta, an ruakhai chu vâhai le ramsahai bu ni a ti.

⁵ “Lusûn omna ina ni ilêng viat hrang ni mah. Mi tûte ta hrang khomin chap no roh. Ki mihai chu irtharngamnain satvurhai mai no ninga, lungkhamna le khonzâna khom hmu ta no nihai.

⁶ Irchong le inriang, hi rama hin thi an ta, tûte’n phûmin châ no nihai. Mi tukhomin a ichâ a nih ti irdangna’n a taksa inphopin a lu khom ep inkol no nihai.

⁷ Mânia lungirthunghai an thi zoro khomin tûte’n lungngam sakin hmunkhatin fâkin in no nihai. Nu le pahai inthi tâkhai chunga lua tûte’n an ituangpuina inlangtir no nihai.

⁸ “Mihaiin bu an ingheina hmuna khan lût no’n lân, annihai fâk hrang le in hrangin hmunkhat khomin toipuihai no roh.

⁹ Keima Rengpa itinrêng thothei Israelhai Pathianin ti hrang ki inei hi irngai roh. Nin dam sûng ngêtin nin mithmua raifân le lôm irhâi, irneina hruaithe lôm irhâi hi, ki indâipai hrang a ni.

¹⁰ Hi thil murdi hi anni nin hrilhai zoi le, i lo hrang mo hiang dôra siatna irkhêl Rengpa’n kin chunga a intungtir hi? Thil dik loi imo kin itho, kin Pathian chunga kin itho insualna? an ti’n chu,

¹¹ hiang hin hrilhai ro, ‘Rengpa’n a ti, nin pahaiin hnung an ni songsana, pathian danghai leh chongin an sin an tho pehaia, an ni’rnghila, ki dânhai an izôm loi a ni.

¹² Nangni len vângin chu, nin pahai nêkin nin sual uala, tûte’n ki thu zôm mak chêia, tukullian songin nin thu ang takin nin iom a ni.

¹³ Khasikin nangni le nin pahai inhriat loina rama nangni irzûl inlût ki ta; kha khan a sûn a zânin pathian danghai sin tho nin ti, khonzâna zel nin chunga inlangtir ta no ning,’ ” tiin.

Sal intângna ata kîr nôkna

¹⁴ Khan Rengpa’n, “Mihaiin keima Pathian hring Israel mihai Aigupta ram ata hong hruaisuaktu irhming sâma chonginkungna an nei thei loina zoro a hong itung thiai a ni.

¹⁵ Kha nêkin chu keima Pathian hring Israel mihai hmâr tiang rama le anni irthekindarh ram dang tamtak ata hong hruai suaktu, keima irhming sâmin chonginkungna nei ta an ti. Anni chu an ram ngêta an irchibulhai ki ipêkna rama zuang hruaihai nôk ki ti, keima Rengpa hin ki iti a ni,” a tia.

Dûk thôna hong tung hrang

¹⁶ Khan Rengpa’n, “Nga chel ngaihai tamtak hong hi mihriam chel hranga ki ikoihai an ni. Kha hnung chu sa kâp ngaihai tamtak mual le tânghai le rôl le lungpui kârhaia annihai irdîp hrangin koihai ki ti.

¹⁷ Keimaa irthokin ite ar thup thei om maka, an sualnahai chu ki mithmua an lang loi zel om mah.

¹⁸ Ki ram chu millim pathian hringna boi le pathian dik loi porchein an siam sikin, an sualnahai le pualoinahai sika khan a bâk inhniin thuanhai ki ti,” a tia.

Rengpa chunga Jeremia chongchaina

¹⁹ Rengpa, nang chu ni sûnghualtu le hrâtna ni petu ni nia, buaina ki tong zoro khomin ni ni changpui ngaia. Namhai chu kôlkila irthokin ni kuang an honga, an iti chu, “Kin irchibulhaiin pathian dik ni loihai ti no chu a dang ite nei mahai, hmanghmunboi millim ti no chu ite nei mahai.

²⁰ Mihriamin Pathian a isiam thei hrang ma ni? Thei no ni, a theia ni’n chu, Pathian diktak an ini loi hrang a ni,” ti an ti.

²¹ Rengpa’n, “Khasikin atûn lai tak hin namhai chu voikhat zelin le zoro danga hrang khomin ki sintho theizia le ki hrâtzia inhria an ta, Rengpa ki nih ti inhre suak an ti,” a tia.