JEREMIA 15 - PATHIAN LEKHABU IRTHIANG C.L. Bible (BSI)

Juda mihai tuang hrang

¹ Khanchu Rengpa’n ki kuang, “Mosia le Samuela khom ki makunga, hi mihai hrang hin hong ngîrpuihai khomsian, irngai pehai ual no ning. Anni chu irzûlhai unglân, ki mithmu ata hi om ta no ri sehai.

² Kho tiang mo an ipan hrang tia nang an irdonin chu, ki iti kha hril roh: Senkhat chu hripuia thi hrang an nia, khatak khan an ipan hrang chu a ni. Senkhat chu irdoinaa thi hrang an nia, kha kha an panna hrang chu a ni. Senkhat chu châma thi hrang an nia, kha kha an panna hrang chu a ni. Senkhat chu sala hruai hrang an ni.

³ Kha kha an panna hrang chu a ni. Keima Rengpa hin an chunga thilirkhêl minli intungtir hrangin ki lei irêl infel tâk a ni. Irdoina hmuna that ni an ti; an ruakhai chu uihaiin kaizamhai an ta, vâhaiin fa an ta, an fâk banhai chu ramsahaiin fa an ti.

⁴ Jerusalema Juda rêng Hezekia nâipa Manasea Juda rêng a ni laia a sin tho sika khan rammuala mihaiin an china hrangin dûk ki itho hrang a ni,” a tia.

⁵ Rengpa’n hiang hin a ti, “Jerusalem mihai, tu’n mo lung nangni inkhama, tu mo nangni châ hrang tâk? Tu mo zoro sôttak hnunga imo nin thurchi ti nangni irdon hrang tâk?

⁶ Nangni’n nin ni hnôla, hnung nin ni isongsan a ni ta. Khasika khan ki bân ki’rzanga, ki kut ki insum a ni, Ki ningmur insua ki sôl tâk sikin.

⁷ Ram sûnga kho tina khan fapôl angin nangni ki insâp a ni. Ki mihai nangni ki that irhmanga, nin sual lampuihai kha nin mâk no sikin, nin mihai chu ki ithathai a ni.

⁸ Tuipui kôla chiai nêka tamin nin ram sûnga meithâi an itam tâk a ni. An vâng sa laitakin ruathartehai ki thathaia, an nuhaiin an ituang a ni. Voikhat rengin beidongna le chitnain anni chu kuttum ki ithohai a ni.

⁹ Nâi sari inthinu kha chu a’rzal tâka, intak takin a iom tâk a ni. Sûn vâr chu zân angin a om pea, mualinphoiin a bei an dongtir ok ta. A la dam sunhai khom nin râlhaiin nangni inthattirhai ki ti,” ti hi keima Rengpa iti a ni.

Rengpa kuanga Jeremia a chiarna

¹⁰ Itina inren om mo ki ini tâk hi! I lo hrangin mo rammuala ki zuang irzir hi? Ram sûnga mi tin le irngoa irkhal a nang tâka. Intângtirhaiin mani, intângtirhai loi khomin, mi tinin khomâk an ni sâma.

¹¹ Rengpa ni sin sataka ki tho no’n chu ki râlhaiin buaina le lungzîngna an tuang zoroa anni irthûlin nangma kuang ki ingên pehai loi a ni’n chu, an khomâksâm chu hong tung ri se.

¹² (Mi tukhomin thîr chu khiak thei no nihai, a bîk takin hmâr tianga thîr, dârsen leh irzêl chu.)

¹³ Rengpa’n ki kuang, “Ki mihai khan an ram puma an sualna sikin, an irchongna le an thilhluhai chu râlhai tîrin ki irthakpai pehai ving hrang a ni.

¹⁴ An la inhriat viat ngai loina rama an râlhai sin inthotirhai ki ti. Ki ningmur chu mei anga a nia, a ichok mai hrang a ni sikin,” a tia.

¹⁵ Khanchu keima’n, “Rengpa ni inhriat infel ving a ni. Nin hre maiin lân, ni changpui roh. A nin tuangtirhai chunga phuba ni la no’n lân; anni that theina hrangin an chunga ni milung pehai no roh. Nangma irhminga hal fâk ki nih ti inhre mai roh.

¹⁶ Ni ni chongpuia, ki kuanga ni iti thuhai ki lei irngai mai a ni. Ni thupêkhai chu ki lungrîla lôm leh râifânin a isip a ni.

¹⁷ Innui irdâiin ki zoro sahai chu mi danghai leh hmang ngai ma unga. Ni thupêkhai zômin ki binga omin ni ningmurna ki isip a ni.

¹⁸ I lo hrang mo ki la ituang mai hrang? Itho mo ki sâbehai ni indamtir thei loi? Itho mo an idam loi hrang? Fûrpui laia ivatedung châr angin lungzîngna ni ni inomtir ma ni?,” ki tia.

¹⁹ Hiang hin Rengpa’n a tia, “Ni hong kîrin chu nang lei pom nôk ki ta, a ni zui chang nôk ni ti. Thu chanlamboi hril loia chongbe a hmangna om nin puangin chu, ki deipu ni nôk ni ti. Mihai kuanga fe nang no nia, anni’n nang hong pan ual an ti.

²⁰ Hi mihai makunga hin dârsen bang det khakin nang siam ki ta, nang irdoipui an ta chu, nang inhnê thei no nihai. Ni kuanga om ki ta, nang hrung hrangin nang inzôktirin om ni ti.

²¹ Mi sualhai le nunterhai kut ata nang saninsua ki ti, keima Rengpa hin ki iti a ni,” tiin.