JEREMIA 14 - PATHIAN LEKHABU IRTHIANG C.L. Bible (BSI)

Khokang irkhêl

¹ Rengpa’n khokang chungchânga a ni iti pe chu,

² “Judai ramin a tuanga, a khopuihai chu a iram thiai a ni ta, a mihai chu beidongin irnênga an zâla, Jerusalem chu a san hrang zongin a khêka.

³ Mi irchonghaiin an suakhai tui chôi hrangin an tîra, Tuikuang tiang an fea, khannisian tui hmu mahai, an tuibêlhai a rongin an hong ichôi nôk a ni. Inzak le beidongin an hmâi an thupa.

⁴ Rua a tho no sikin irnêng a châr zoi tâka, loi thotuhai lungzîngin an hmâi en sa ta maka.

⁵ Sazukpuiin a lêngna muala sûlhring a om pe no sikin, a tê a ineiphing a mâk rak tâka.

⁶ Tâng chârna rama sakuartunghai an ngîra, Sihal angin an inrunga; sûlhring fa hrang an hmu ta no sikin, an mit a inthim zoi a ni ta.

⁷ Ki mihai keima tiang an khêka, ‘Kin sualna’n mualphoi ni sak khomsian, Rengpa ni chonginkung angin ni changpui ro, voi tamtak ni kuang ata kin rot tâka. Ni chunga kin isual a ni ta.

⁸ Nangma vai hi Israelhai itûng ni nia, vânduaina ata nin zôktu chu nangma vai hi ni ni. I lo hrang mo kin rama hin mikhual angin zân khat riak hrang anga mikhualin ni iom?

⁹ Itho mo hi dôra ni ichaninvâi, changpui theina nei sipai teh ni ang tâka? A dik takin, Rengpa kin kuang ni oma! ni mihai kin nia, ni ma viat no ro,” a tia.

¹⁰ Hi mihai chungthu hin Rengpa’n a ti, “Keima kuang ata rot hi an inuam a nia, khaang khan an bingin dan thei no ni. Khasikin an chunga ki milung a ichuk loi a ni. An thil tho’nsualhai chu inhre mai ki ta, an sual sikin anni chu dûk thohai ki ti,” a tia.

¹¹ Rengpa’n ki kuang, “Hi mihai changpui hrangin ni ngên ta no roh.

¹² Bu ngheihai khomsian changpui hranga an khêkna kha irngai pehai no ning, an hâlirvôm le an chîmu irbôlna inhlan sika khan, an chunga lôm ual no ning. Irdoina hai, châmna le hri le hraihaiin anni chu ki ithathai hrang a ni,” a tia.

¹³ Khan keima’n, “O itinrêng thothei Rengpa deipuhaiin mipuihai kuang irdoina mo, châmna mo khom om no ni, tia an inpuang khom nin hriata. Ni chonginkung sikin irtharngamna vai hi ei rama om hrang a nih an ti ngai,” a tia.

¹⁴ Khan Rengpa’n a iti chu, “Deipu khan ki’rhmingin minlak a tho a ni, anni chu tîrhai ma unga, thupêkin an laia chongbâi khat lua ki iti loi a ni. Inlârna thu an ihrilhai kha keima ata suak ni maka; an thu inpuanghai chu hlutna nei loi, an lungrîla an ingaitua lik a ni.

¹⁵ Keima Rengpa hin ki tîr sika ni loiin ki’rhmingin thu an hrila, hi rama hin irdoina le châm om no ni, tia thuhril ngai deipuhai chunga ki itho hrang nang ki inhril a ni. Anni chu irdoina le châmin thathai ki ti.

¹⁶ Hi thilhai hi an ihril pe mipuihai khom khaang ngêtin ki ithathai hrang a ni. An hnâchangrôp chu Jerusalem inkhâr lamlianhaia pai ni an ta, tûte a phûm hrang om no nihai. Hi hi an dôngmahai, an nâipasalhai le nâinuhai an rênga chunga tung a ti, an tho’nchâina man ki ithuanhai hrang a ni,” a tia.

¹⁷ Khanchu Rengpa’n ki chardongna chu mipuihai kuanga hianga hril hrang hin a ni hrila: “A sûn a zânin ki mitrithi luang mai sianlân, ki chap hi mong no inlân, ki mihaiin intakna popliam an tong tâka an na hrai tâk sikin.

¹⁸ Dâi pên tiang ki fe lakin, irdoina hmuna thi miruak tamtak ki hmua; Kho sûnga ki lûtin, phîngchâma thi mipui ki hmuhaia. Deipuhai le ochaihai chu an inhriat loina ram an pan tâka,” tiin.

Mipuihaiin Rengpa an koi

¹⁹ Rengpa Judahai chu ni ihnôl phar ma ni ta? Zion-a mipuihai chu ni ipaihai rak ma ni? I lo hrang mo irtharngamna kin zonga, khannisian ite thil sa tung maka; dam hrangin kin sabeia, lungkângna kêng a itung.

²⁰ Rengpa ni chunga kin isual a ni ta; kin sualnahai le kin irchibulhai sualna kin inpuang a ni.

²¹ Ni chonginkung kha inhre maiin ni hmûsit no’n lân; Jerusalem chunga hin mualphoina intungtir no’n lân. Ni rêngtoihmun roiinpui tak omna hmun chu keini leh thuthung ni isiam kha insiat no roh.

²² Nam danghai millimhai khan rua inthotir thei mahaia; Irvâna a bingin rua inthotir thei mah. O Rengpa, kin Pathian, kin sabeina chu ni chunga kin irnghat a ni, hi thil tinrêng tho ngaitu ni ni sikin.