JEREMIA 11 - PATHIAN LEKHABU IRTHIANG C.L. Bible (BSI)

Jeremia le thuthung

¹ Rengpa’n ki kuang hiang hin a ti,

² “Hi thuthung thiltumhai chu irngai roi, Juda mihai le Jerusalema omhai inhrilhai roh.

³ Keima Rengpa Israelhai Pathianin hi thuthung thiltum zôm loi mihai chunga khomâksâm ki intungtir hrang a ni.

⁴ Hi thuthung hi an irchibulhai Aigupta rama thîr hâl inzôitu kuang ata ki hruaisuak nia ki isiamhai an ni. Ki thu zôm hrang le sin hranga thu ki ipêk murdi tho hrangin kin hrila. An zôma ni’n chu ki mihai ni an ta, keima an Pathian ni ki tih ti ki ihril a ni.

⁵ Khaangin ram irchong le ram sa atûna an ilua hi; an irchibulhai kuanga ki chonginkung thangsua’n ki ipêkhai hrang a ni,” tiin. Keima’n, “Amen Rengpa,” tiin ki sâma.

⁶ Khanchu Rengpa’n ki kuang, “Judai ram khopuihai le Jerusalem kongkâr lamlianhaia fe roh. Kha khan ki chongbe inpuangin lân, mipuihai chu thuthung thiltumhai irngaia zôm hrangin hrilhai roh.

⁷ An irchibulhai Aigupta ata ki hruaisuak nî ata a vuan tena hin, ki thu zôm hrangin ki lei hong ihrilhai an ni.

⁸ Khannisian irngai nuam mahaia, a zôm khom nuam mahai. Tukullianin a nitin sual sin an la itho mai ngai a ni. Thuthung zôm hrangin anni kha thu ki pêka, an inuam loi a ni. Khasikin hi thuthunga chuang, tuangna murdihai an chunga ki insum a ni ta,” a tia.

⁹ Khan, Rengpa’n a ti nôka, “Juda mihai le Jerusalema omhai chu ni doi hrangin an irrual a ni.

¹⁰ An irchibul ki thu irngai nuam loihai sualna khan an kîra, pathian danghai zuiin an sinhai an thoa, Israel le Juda, an irchibulhai leh thuthung ki isiam an insiat tâk a ni.

¹¹ Khasika khan keima Rengpa’n an chunga siatna zuan sum ki ta, zôk thei no nihai ti hi ki inhriattirhai a ni. Changpui hrangin an ni koi khomin irngai pehai no ning.

¹² Judai ram khopuia mihai le Jerusalema lênghai khan, an pathian mirimhoi an inhlan pehai ngai irphuin changpuina zong an ta, khan an chunga siatna a zuan tung nî changpui thei no ni.

¹³ Juda mihaiin khopuihai an inei dôr pathian khom an nei intama, Jerusalema omhai khomin intirom Baal pathian hranga irbôlna hrang maichâm, khopui kongkâr lamlian tam dôrin an isiam a ni.

¹⁴ Jeremia, hi mihai hi chongchai pehai no ro, an ta hrangin ngên pehai no’n lân, an chunga vânduaina a zuang tung tika ni koihai khom sian, irngai pehai no ning,” a tia.

¹⁵ Rengpa’n a ti, “Lung ki ithunghaiin thil saloi an thoa, ki tempila om mai hrangin i zât thuneina mo an la inei? chonginkungnahai siamin sa irbôlnahai inhlanin, siat rip theina zuang tung hrang chu khap thei hrangin an irbe ma ni? Kha khan a inlômtirhai thei hrang ma ni?

¹⁶ Zoro khat chu a hnâ irbom le a ra sip oliv thing tin ki lei koihai ngai, khan atûn chu, khonri angin ar hâi neiin a hnâhai chu hâlhai ki ta, a ônhai khom ngôtpai ki ti.

¹⁷ Keima Rengpa itinrêng thothei hin Israel le Juda chu ki phuna; atûn chu vânduaina thilin ki iti a ni ta. Anni ngêtin an chunga an intungtir ta a ni, sual an sina, Baal kuang irbôlna inhlanin ki ning an inmurtir sikin,” a tia.

Jeremia that hranga a bi an zong

¹⁸ Rengpa’n kha kha a nin hriattira, kin hriat ta; khanchu nang ngêtin an sinthohai ni nir hmutir ta.

¹⁹ kei chu kêlbelrate that hranga an ihruai, lungirngam taka fe angin, keima siatna hrang thil saloi an iphan a nih ti ki inhriat loi a ni. “Thing chu a hrisêl lai takin lei phûr rei, tûte inhriat mai ta loi hrangin lei thatpai rei,” an tia.

²⁰ Khanchu ki chongchaia, “Itinrêng thothei Rengpa’n nang chu roirêltu fel ni nia, mihai irngaituana le nuamnahai ni fia ngaia. Ki chungchâng thu hi ni kuta ki bâng, khaangin ki mihai chunga phuba ni lâkin chu nir hmu ro,” ki tia.

²¹ Anathot mihaiin ni that an nuama, Rengpa chongbe kin puang maiin chu an ni ithat hrang a nih ti khom an nin hrila.

²² Hi sika hin Rengpa itinrêng thotheiin a iti a ni, “Anni chu dûk thohai ki ta, an ruathartehai irdoina hmuna thi an ta, an nâihai fâk hrang boiin an ithi hrang a ni.

²³ Anathot mihai chunga vânduaina intungtir hrang zoro ki rêl diam ta, a zuang tung tena chu tûte a dam suak om no nihai,” a tia.