JEREMIA 10 - PATHIAN LEKHABU IRTHIANG C.L. Bible (BSI)

Millim biak le Pathian biak dân dik

¹ Israel mihaio, Rengpa’n nin ta hranga chongbe hrang a inei hi irngai hi roi;

² Rengpa’n hiang hin a ti, “Nam danghai omdân la no unglân, irvâna thil danglam nin ihmuhai chi no roi. Nam danghaiin an chi hrang khomin.

³ Hi mihai sakhua hi hmanghmunboi a ni. Rampuia thing an ilâk chu, kut sintheihaiin a hmangrua an sina,

⁴ tangka le rângachakin an irvôtir ngai. Kha kha a tâk loina hrangin perek leh an vîkbê ngai.

⁵ Khaanga millimhai chu fanghma bila mamîm ang an nia chong thei mahai. An fe thei no sikin thon an inang ngai a ni. Annihai kha chihai no roi: ite nangni lo no nihai, thil sa khom nangni tho pe thei no nihai,” a tia.

⁶ Rengpa nangma ang hi tûte om mahai; Itinrêng ni tho theia, Ni’rhming khom a roiinpuia, sin a itho thei a ni.

⁷ Nam tinhai rêng chu tu’n mo nang chôiirsâng loi hrang? Chôiirsângna hmu inruk ni ni. Nam tina mi vârhai laia le rênghai laia khan nangma ang zel hi om mahai.

⁸ An rêngin an invêtin an into a ni, thing millima irthokin imo an irchu thei hrang?

⁹ An millimhai chu Spain rama irthokin tangka le Ofir rama irthokin rângachaka inluan kut sintheihai kutsuak a ni. Puan không theihai ikhông puan dum le senduk sil an nia.

¹⁰ Khan Rengpa chu Pathian dik ni nia, Pathian hring le kumtuang rêng ni ni. Ni ningmurna’n rammual hi an thinga; namhaiin ni ningmurna tuang zoi mahai.

¹¹ Nangma’n anni chu hiang hin ni inhril ngêt hrang a ni; irnêng le irvân siamtu ni loi, pathianhai chu insiat ni an ta, hi irnêng chunga hin kho hmuna khom hmu ni ta no ni.

Pathian inpâkna hla

¹² Rengpa’n a sinthotheina’n irnêng a siama; a vârna’n rammual an dinga, irvân khom a ikai inphar a ni.

¹³ A thupêkin irvâna tuihai chu irsok dûm dûmin; Kôlkung ata sûm a hong ichôi ngai a ni. Rotho kâra kôlirtêk a oma, a siana hmuna phâivua a tho ngai.

¹⁴ Hi hi an hmu’n chu mihriamhai chu inmôl le inhriatna nei loiin an irbe ngai; millim siamhai chu an inzak tâka, an pathianhai kha a dol le hringna nei loi an ni sikin.

¹⁵ Hlutna nei loi hmûsit zât an nia, anni ngaitua hrangin Rengpa a zuang nî chu insiatin om ving an ti.

¹⁶ Jakoba Pathian chu anni ang kha ni ma; Ama chu itinrêng siamtu a nia, a mihai ni hrangin Israel chu a inthang a ni. A’rhming chu Rengpa Pathian a ni.

Sala intângna hrang thu

¹⁷ Jerusalem mihaio, irhualin nin om ta, nin thil neihai rêlinfel ta roi.

¹⁸ Hi ram sûng ata Rengpa’n nangni inhnotsuak hrang a nia, nin suak ving mâka chu nangni a inhnotsuak hrang a ni. Rengpa’n a iti a ni.

¹⁹ Jerusalem mihai chu an khêk suaka, “Ei na vang na! ei sâbe laka chu indam thei zât ni maka. Ei ituang zoi hrang ma nih ei lei sôn ngaia.

²⁰ Ei puan inhai chu an siata, a detna hranga hrui khom a chat zoi ta. Ei mihai an rot zoi tâka, ei puan inhai inding hrang le a puanhai kaiphar hrangin tûte om ta mahai,” an tia.

²¹ Keima’n chu, “Ei hruaituhai an intoa; hruaihai hrangin Rengpa lei ngên mahai. Hi siktak hin kêng hlo an isam, ei mihai an irthekindarh zoi ta.

²² Irngai ta roi, thuthang a hong tung ta! Hmâr tianga mihai irchunkhôm nî chu; Judai ram khopui inram chita, sihalhai lêngna hmun siam hrangtuhai chu,” ki tia.

²³ O Rengpa tûte mâni hringna chunga thunei om mahai ti kin hriat ta. Tûte’n an om hrang dân inhre thei mahai.

²⁴ O Rengpa ni mihai irchuhai ro; khan kin chunga ni chong inhrumtir no’n lân, ningmurin dûk ni tho no roh. Kha kha kin mongna hrang a ni sikin.

²⁵ Ram dang chubai nang mûk ngai loihai chunga khan le nang hnôltu mihai chunga khan ni ningmur chu insum roh. Ni mihai an thata, an ni insiat chita, kin ram khom an ni inramtir zoi tâk a ni.