ISAIA 7 - PATHIAN LEKHABU IRTHIANG C.L. Bible (BSI)

Reng Ahaza kuanga thu intung

¹ Uzia nâi Jothama nâipa Ahaza, Judai rama an lal laiin Suria rêng Rezina le Israel rêng Remalia nâipa Pekahia chu Jerusalem rûn hrangin a’rthoka, khannisian la thei mahaia.

² Suria sipaihaiin Israel ram an hong tung tah ti Davida in mihai an hong hrilhaiin chu an chi tak taka, rampuia thing phâivua isêm ang hin an inthing nat tâka.

³ Rengpa’n Isaia kuang, “Ni nâipa Shear-jasuba hruaiin lân, Ahaza va hmu roi, dîl sak inta taka tui lam mongna tianga puanirsûkhai omna lampuia a om.

⁴ A kuang khan hiang hin va ti ro: ‘Irtûngin lân, chi no ro, Suria rêng Rezina le Remalia nâipa ningmur hi chu thingthubong khulût ang ma mai hi a ni.

⁵ Suria le Israel rêng Remalia nâipa nin chunga thil saloi an itho a ni.

⁶ Judai rama hong fe unglân, insihai nin ta, irsenin om an ta, an rêng hrangin, Tabeela nâipa hih siam ei ti,’ an tia.

⁷ Rengpa pathianin hiang hin a ti: ‘Khaang khan chu ni viat no nia, hlochuk viat no nihai.

⁸ Suria lu chu Damaska a nia, Damaska lu chu Rezina hi a ni. Kum sômruk ringa sûng chu, Efraima namhai chu hek ving an ta.

⁹ Efraima lu chu Samari a nia, Samari lu chu Remalia nâipa hi a nia. Nin ni iam no’n chu inding suak no chin ni tiin,’ a tia.

Irsinsiana hrangin Immanuel

¹⁰ Rengpa’n Ahaza kuang thu a hrila,

¹¹ “Irnêng rîl ata mani, irvân ata mani irsinsiana irhmutir hrangin Rengpa ni Pathian kuang zong roh,” a tia.

¹² Ahaza’n, “Zong no ning, Rengpa chu fia nuam ma ung,” a tia.

¹³ Isaia’n, “Davida irchihaio, irngai roi, mi danghai insôltir a ruk la ti loiin, kin Pathian a le tianga nin insôltir nuam ma ni?

¹⁴ Rengpa ngêtin irsinsiana nang irhmutir a ti: Irngai ro, dôngmate’n nâi vong a ta, nâipasal nei a ta, a’rhming hrangin ‘Immanuel’ phua a ti.

¹⁵ A siat le a sa a infel mân khomin, mihaiin dûttui le khuaituiin ngam an ta,

¹⁶ kha nâi khan a siat chu hnôl a ta, a sa a inthang thei mân khomin, mi ichitakna ram chu inkhêktir a ti.

¹⁷ Rengpa’n nang le ni mihriamhai le ni pa in mihai chunga, Efraimahai chu Judai ram ata an infelhai zoiin chu, la om ngai loi intakna intungtir hrang a ni; Assuria rêng chu hong hruai a ta.

¹⁸ Kha nikhuaa khan chu Rengpa’n Aigupta rama tui, Nail vadung hnâr ata irrualin luang suak a ta, Assuria ram ata khom khuaipâl koihai a ti.

¹⁹ Zuang vuang an ta, tuidung irhelna rôl panghaia, tâng ram rôl kâra khom, ilhling le sa lêngna hmunhaia kâi sup an ti.

²⁰ Kha ni khan chu Eufrates tui kôla om, mi lu ep nuam ngaihai, Assuria rêng chu, Rengpa’n hmang a ta, nin sam le nin mul murdi, ni hnermulhai le nang voi pe ving a ti.

²¹ Kha nikhua kha a hong tungin chu, sehrâtpui le kêlpui inhnina nei thei an ti.

²² Dûttui nei intam an ta, khuaitui leh ngam an ti.

²³ Kha nikhua a hong tungin chu tangka varh sângkhat man, grep kung sângkhat omna murdihai khom hloitharpa le hloi ilhlingneiin inbôk khum a ti.

²⁴ Khataka khan chu thal ngul nei chôiin ram chai an ta, a ram hloisûl le ilhlingneihai thatpai zoi a ti.

²⁵ Tutho leh an ichuan infâi ngai, mual tin tâng tinhai chu, hloitharpa le ilhlingneia bit tûte lût ngam loina khan, sehrât pâl insua a ta, belrahai hranga satna ni a ti.