ISAIA 65 - PATHIAN LEKHABU IRTHIANG C.L. Bible (BSI)

Tehelzonghai Pathianin a hrem hrang dân

¹ Rengpa khan hiang hin a ti: “Kin irsiam diama, nin dit ta mak chea, a hmu mai thei kin nia, ni zong nuam mak chea, ki mi, ki’rhming koi nuam loihai kuang khan, ‘Hin ki omchian hi te,’ ki tia.

² Sûn sôtin anni hrangin ki bân ki phara, tehel nuamtuhai hin an inuam lam vai an zonga, an omdân hi dik mah.

³ Hi mihai hin ki inuam loi thil an tho nuama, irhuan serhaia irbôlna thil an inhlana, nam dang pathian maichâma mirimhoihai an hâla.

⁴ Mithi irtha chongpui hrangin rôla le thânhaia zân sôt an toi ngaia. Vok hme an fâka, sa chi tinrêng a’rthiang loihai an fâka, an irbual ngai.

⁵ Ni hong pan no roi, nin themna nin ti, nangni nin them zât ni ma ung, an ti ngai. Hi mihai hi meikhû, sûn sôta ni ur ngaihai an ni.

⁶ Dâisanhrekhai ta no ning, ki ihrem hrang dân irziak infel a ni zoi ta. An mal chunga buak khumhai ki ti.

⁷ An sualna chu, an irchihai sualna le a rêngin anni chunga thuanhai ki ti. Rengpa’n a ti. Tânghaia mirimhoi an hâl ngaia, mualhaia an ni hmusitna an inlangtir ngai; an sintho nuam ngai sikin hremna an chunga chum hrang chu ki zêk zoi ta,” tiin.

⁸ Rengpa’n hiang hin a ti: “Grep dôn tûte’n pai ngai mahai, uainin kêng an siam ngai. Ki siahlohai khom hi an rêngin, thathai ving no ning.

⁹ Jakoba le Juda irchia irthokin ki tâng irthiang lua hrang mi inkunghai ki ta, ki tânghai chu lua an ti. Khatak khan ki siahlohai om mai ta an ti.

¹⁰ Ki mihriam, ni zongtuhai ta hrangin saron phâizôl chu an sa vâina hmun chang a ta, a phâizôla an sahai chu lêng an ti.

¹¹ Rengpa chu mâksana, ki tâng irthiang irnghiltuhai chu Gad-a chubai irmûkna hmun sinsiama, an bingin uain in irhlômin om an ti.

¹² Nin ituang hrang rammual hi chu khandaia thi a ni, that hrangtu kuang la kûn nin ti. Hihai hi ki koihai lai khan chu ni sâm mahaia, ki inuam loi sualna an thoa, ki hril laiin irngai nuam mahai, ki inuam loi lam tho an nuam ngai.

¹³ Rengpa Pathianin hiang hin a ti: “Ki siahlohaiin fâk hrang nei an ta, nangni chu nin phîngchâm a ti. Ki siahlohaiin in hrang nei intam an ta, nangni’n nin tuiinhrâl a ti.

¹⁴ Ki siahlohai lungrîl lôm a ta, nangni chu lungrîlnain chiar mai nin ta, milungdûk tongin khêk nin ti.

¹⁵ Ki inthang ki mihriamhaiin nin irhminghai kha khosâlna’n hmang an ta, Rengpa Pathianin nangni thatpai a ti, ki siahlohai chu irhming thar phuahai ki ta.

¹⁶ Ram sûnga mi satvurna zongtuhaiin, Pathian iamom irhming sâmin khuasâl an ti. Matona buainahai a hek zoi tâka, ki ihmu loina rama an om zoi ta.

Irvân le irnêng thar

¹⁷ Irngai ro, irvân thar le irnêng thar ki siam ta, matona thilhai a hek zoi ta, inhriat mai ni ta no ni.

¹⁸ Ki thilsiam thara chu, lômin râifân kumkhua ta nin ti. Lômna’n Jerusalem ki siam inthara, a mihai khom lôm mai an ti.

¹⁹ Jerusalem chunga lôm mai ki ta, ki mihaiin nin lômtir an ti. Chap irhâi inhriat hrang om ta no nia, chardonga khêk irhâi khom om ta no ni.

²⁰ An dam sûng kumhai sôt a ta, tar kûna boka fein dam an ta; kum irza dam loi chu, vânglaia thi, ti an ti. Mi sual kum irza damloia thi chu, “Khosâlna a itong a ni,” ti an ti.

²¹ Inhai sin an ta, lua an ti, grephai phun an ta, a ra fa an ti.

²² An in sin chu mi danghai lua hrang ni no nia, an grep phun khom mi danghai hrang ni no ni, ki mihai chu thingkung angin dam insôt an ta, ki inthanghaiin an sinthôna ra chu, tar kûn dênin fa mai an ti.

²³ An sin sôlnahai chu chanlamboiin om no nia, an ineihai khom vânduaina tong hrang om no nihai, an tû le nâihai dênin Rengpa’n satvur a ti.

²⁴ An ni koi mân, sâmhai ki ta, an hril zoi mân len hre ving ki ti.

²⁵ Inê le kêlbelra hmunkhatin om an ta, kâmkeibaknei khomin sehrât angin fapôl fa a ti. Mirûlhai khomin nêngpil hi bu’n ngam an ti. Ki tâng irthianga khan, thil saloi le natnahai om ta no ni, Rengpa’n a ti.