ISAIA 63 - PATHIAN LEKHABU IRTHIANG C.L. Bible (BSI)

Nam dang Rengpa inhnê

¹ Tu moh Edom khopui, Bozra khua ata puan sen vung sil a hong so? roiinpui takin a’rvoa, a hong vut vut so. “Keima ki ni, saninhringtu roiinpui, ki inhnê tâk thu ki inpuang a ni”.

² Itina mo ni puan sil teh a sen vunga, grep ra tui sômtu tukrivo teh a anga?

³ Keima khomin nam danghai chu grep ra angin ki sirchîl chit a ni. Tûte’n ni changpui mahai, ki ninginmurna, ki sirchîl chita, ki ning an mura ki sirbe chita. An thisenin ki tukfamhai a ni khian nenga, ki tukfamhai a porinchetir zoi ta.

⁴ Phuba lâk chu a ruk ta ki tia, ki mihai chu irtan zoro a hong tung ta a ni.

⁵ Ni changpui hrang tûte hmu ta ma unga, a ni thop hrang tûte om mahai ti hril hnông loiin, ki bingin kin hnêpaia, ki ningmurna khan a ni inhâitir a ni.

⁶ Kha mihai kha ningmur pumin ki sir chîlhaia, ki ningmurin an inruia, an thisen chu hnuai chunga a iluang zoi a ni ta.

Israelhai chunga Rengpa satna

⁷ Rengpa khonzazia dân hi hong hril nôk ki ti. Keima hranga a sin tho murdihai hi, Israel in sûng mihai hranga a isa lam hi lungkhamna ni vur mai ngai sikin, Ama inpâkin hla sak ki ti.

⁸ “Ki mihai an nia, ni huang viat no nihai,” Rengpa’n a ti. “An hrangin mi’ndamtu a chang tâka.

⁹ An chardongna tinrêng a tuangpuihaia, vântîrtôn ni loiin, ama ngêtin a sanhai ta, lungthungin, an renhai hrai sikin a’rtanhai ta.

¹⁰ Khannisian ama kuang ata an tehel pe nôka, a’rtha irthiang lungrîl chu an natir pea, an râlin a om pehaia, a idoihai nôk a ni ta.

¹¹ A mihaiin chu Mosia dam lai, tianlai sûn a ngaitua suaka, an sa vâihai a enkola, tuipui ata la suaktu kha khôn moh a om ta? Mosia kuanga irtha pêk theitu kha khôn moh a om ta?

¹² Mosia chang tianga om, thil roiinpui tak thoa, an makunga tuikhanglian irsentira, kumkhuaa a’rhming chôiindômtu kha khôn moh a om ta?

¹³ Hmun irfûknaa sakor intân angin, intân loia tui dop tianga chalaitu kha khôn moh a om ta?” an ti.

¹⁴ Ram satakna hmuna sa pâl an insuahai angin Rengpa’n irtha le lungngam saka, a mihai hruaia, irhming sa an pêlhai ta.

Changpui le lungkham zongna

¹⁵ Ni omna hmun irthiang le hoi, irvân irsâng lai ata khan, zuang thîrin lân, ni zuang en ro, ni sathnem irngaina le hrâtna, ni khonzana le inrenna kha a idâi zoi ma ni ta?

¹⁶ Nang chu kin pa ni nia, Abrahama’n nin hre pha mah. Nang chu, Rengpa, kin pa ni nih. Itiklai khoma ni sûnghualtu ni nih.

¹⁷ Rengpa, itina moh ni lampui ata kin irot ni inuam, nang kin chi loina hrangin kin milung ni inliantira. Ni irchon lua hrang nam, ni siahlohai sika hin, keini tiang hor hei nôk ta roh.

¹⁸ Ni mi irthianghai hin ni Tempil chu, zoro sôtnote sûng an luaa, kin râlhaiin an del siat zoi ta.

¹⁹ Kin Reng hi ni ngai loi angin nangin ni ni ena, ni mi lei ni ngai loi angin kin om zoi ta.