ISAIA 60 - PATHIAN LEKHABU IRTHIANG C.L. Bible (BSI)

Jerusalem roiinpui hrang dân

¹ Thoiin lân, vâr suak ta ro, ni vâr a hong tung ta, Rengpa roiinpuina khan nang an vâr pe ta.

² Inthimin rammual a tuam khaka, Nam danghai chung chu an thim zoi ta, nangma hrangin Rengpa vâr a suak ta. A roiinpuina ni chunga chum hmu ving an ti.

³ Ni vârna hnuaia nam tin lêng an ta, Rênghai khomin ni vârna kha innang mai an ti.

⁴ Ni mit hong inlêngtirin lân, ram hlatak ata ni nâihai chu an hong ta, ni nâinuhai an hong puakhai.

⁵ Ni hmu tena chu râifân hmêl irput ni ta, râifân hraiin a omna lam inhre no chi ni. Nam tin sum le pâi chu tuipui chunga hong chôi an ti.

⁶ Saringsei pâl khom an hor kôi dûl dûl so, Midian-hai le Efa saringsei hmang laihai chu, Seba ram hlatak ata an hong mai, rângachak le berô an hong pêla, Rengpa inpâkna hla an hong sak.

⁷ Kedar-hai kêlbelra rual an hong hôlhaia, Nebaiot kêlbelrachal an hong tuang sa. Ki maichâma Rengpa lômna hrang hong inhlan an ta, ki tempil chu chôiirsâng ki ti.

⁸ Sûm irlôi angin le phervali vuang sup angin irkuang hor kôihai so, kho tianga mi mo an ini?

⁹ Ramchârna hmun hlatak ata hong an nia, Tarsis-a irkuanghaiin an hong hruaihaia, ram hlatak ata ni nâihaiin rângachakhai an hong chôia, Rengpa ni Pathian irhming chôiindôm hrang le Israel mi irthiang chôiindôm hrangin, ni mihai chu nam tin mithmuin Rengpa’n a chôiindôm ta.

¹⁰ Nam danghaiin ni kul banghai hong sin nôk an ta, rênghai khomin ni sin tho an ti. Ki ningmur hraiin nang ki vîk nâkin, irsîrin lung nang kin kham nôk ta.

¹¹ Ni kul mikothai chu irhong mai a ta, a sûn a zânin tûte’n khâr ta no nihai. Nam tina rênghaiin an irchon hluhai hong chôi an ti.

¹² Ni sintho nuam loi nam le ramhai chu siat an ta, irhmang ving an ti.

¹³ Lebanon tâng roiinpuitirtu thing sahai chu meisâr ônpar le thing ngoitehai, ki hmun irthiang irkulna’n hmang an ti. Ki ke siana hmunhai chu chôiindômin om an ti.

¹⁴ Deng nan theitirtu irchihai chu kûnin ni kuang hong an ti. Nang a hnuaisiahai ngai chu, ni ke bula khûksadelin om an ti. “Rengpa khopui, Israel mi irthiang Zion,” nang ti an ti.

¹⁵ Nang en nuam loiin, nang an rotsana, Tûte’n nang pan nuam ta mahai. Keima hin kho hoitak nan changtir ki ti. Kumtuanga râifânna hmunin nang siam ki ti.

¹⁶ Nam danghai le an rênghaiin, nang inpâm an ta, an irhnuhai nan netir an ti, mi inzôktu chu, kei Rengpa hi ki ni, Jakoba mi hrât, a’rtantu chu ki nih ti inhre ta ni ti.

¹⁷ Dâr irthûlin rângachak hong chôi an ta, thîr irthûlin tangkarua, thing irthûlin dâr, lung nêkin thîr nang hong chôi pe ki ti. Ni chunga thuneitu hrangin irngeina sia ki ti, sin zêktu hrangin, ‘Dikna’ sia sa ki ti.

¹⁸ Ni rama khan nghaltôk songnahai tôm a ta, Ni ram chu siatin hek ual no ni. Ni banghai chu ‘Saninhringna’ ti ni ta, ni mikot chu, ‘Inpâkna’ ti ni ti.

¹⁹ Sûna misa chu ni vârna ni ta no nia, Zâna tha khom ni meiser ni no nia, Rengpa kha kumtuanga vâr nang ni pe ta a ti, Pathian roiinpuina khan nan vârtir pe ta a ti.

²⁰ Nangma hrangin chu misa tâk ta ngai no nia, tha khom inlang loi nî om ual no ni. Rengpa kha ni kumtuang vâr ni a ta, lusûnna nei ta no chi ni.

²¹ Ni mihai chu mi dik ni ving an ta, ram chu lua mai ta nin ti. Keima iphun ki kut suak a ni sikin, ki roiinpuina mi tin mithmua kin langtirna a ni.

²² An nam laia a chîn le tômtak chu nam roiinpui tak la ni an ti. Keima Rengpa hin a zoro taka tho lat ki ti.