ISAIA 6 - PATHIAN LEKHABU IRTHIANG C.L. Bible (BSI)

Deipu ni hranga Pathianin Isaia a koina

¹ Reng Uzia thi kum khan Rengpa ki hmua, a rêngtoihmun irsâng tak chôiirsângin a toia, a songkol hmorin Tempil chu a sip vinga.

² A kôla khan Serafhai an oma, an rêngin mitha kiruk an nei chita, inhnihaiin an hmâi an hîpa, inhnihaiin an ke an tuama, inhni chu an vuanga:

³ “Itinrêng Rengpa chu a’rthiang e, a’rthiang e, a’rthiangliai, irnêng pumpuia a roiinpuina’n a sip,” tiin an irsam irhlôm, an irsam irhlôma.

⁴ An khêk irhâi khan Tempil irnghatna bul an hnîng dur dura, tempil chu meikhu a sip zoi ta.

⁵ Keima’n chu, “E hei! ki ithi a ni ta! hmûr saloia sip, hmûr porinchea siphai laia om, Anchungtak itinrêng Rengpa chu ki mitin ki hmu ta,” ki tia.

⁶ Seraf inkhat a zuang vuanga, meichep leh maichâma mei chu a zuan chepa,

⁷ ki hmûr a hon tôna, “Hi hin ni hmûr a tôn tâka, ni sualna lâkpai a ni ta, ni porinchena infâi a ni zoi ta,” a tia.

⁸ Khan, “Tu mo ki itîr hrang, tu mo keini hranga fe hrang?” tiin Rengpa irhâi kin hriata. Keima’n, “Keima fe ki ti! ni tîr ro,” ki tia.

⁹ Ki kuanga khan, “Fe’n lân, hi namhai hi va hrilhai ro: Irngai ngot khom unglân, inhre thei no chin ni, en mai khom unglân hmu ual no chin ni,” tiin.

¹⁰ Hi mihai lungrîl hi inchotir pehaiin lân, an beng sêt sianlân, an mit inthim pehai sian. Anino’nchu, an mitin hmu an ta, an mikuarin inhrena an ti, an lungrîla inhre mai an ta, irletin indam nina an ti, a tia.

¹¹ Keima’n chu “Rengpa i dôr ten mo khaang khan an iom hrang?” ki tia. Ama’n chu, “Khopuihai chu a luatu om loiin a ram zoia, inhai khom an lumtu om loiin a ram zoi mâka chu!

¹² Rengpa’n mihai chu hlataka thon paihai a ta, ram pumpui insiat zoi ni a ti.

¹³ Sôma inkhat irang maiin pe khom sian ite a’rfêna om no nia, Sesua le thing irkit zoia a bula a’rzung la om ang hi ni a ta. Ama kha irchi irthiang bul chu a ni,” a tia.