ISAIA 59 - PATHIAN LEKHABU IRTHIANG C.L. Bible (BSI)

Deipu’n mihai sualna a dem

¹ Irngai roi, Rengpa kut chu saninhring thei loi hrangin inbong ni ual mah, inhre loi hrang rakin a mikuar khom sêt ual mah.

² Nin châinahai sikin a ni, nin Pathian leh nin kâr a irhla. Nin sualnahaiin a hmêl ar hli zoia, nin irhâi a inhriat thei loi a ni.

³ Nin kuta thisen a kâi neng nunga, nin kut zaphaa dik loina a sipa, nin hmûr le minlak nin thoa, nin mileiin thu saloi nin hrila.

⁴ Tûte’n dikna san nuam loiin, thudik hmanga doi ngam om mak chêi. Thil chanlamboia nin irnghata, minlak ngot nin thoa. Thu buai om thei hrang nin zonga, thu saloi nin inchangtir ngai.

⁵ Mirûl irtui angin thil sual nin op ngaia, Âiom angin râng saloi an kêlsuaa, an irtui fâk hranga hongtuhai chu an thi ngai. An khoi theiin chu rûlhrêng hong suak a ti.

⁶ An râng phan chu sil thei ni ngai maka, lumna khom ite nei thei mah. An sintho chu sualna vai a ni. An kuthaiin sual sin an thoa;

⁷ Sual sin hrangin a sân an hrât ngaia, mi dik thisen insuak hrangin an irhnot ngai. An thil irngaituana a koi zoia, an fena hmun tina thil a siat zoi ngai.

⁸ Irngeina lampui inhre loiin, diktaka roirêl lam inhre viat loiin. An lampuihai a kôia, a fetuhaiin râl irvei loiin om ngai mahai.

Mipuihai sualna inpuang

⁹ Khanchu roirêlna dikin a nin hlatira, diktaka sinthôna’n ni pha thei maka, vâr ei nuama chu, inthim a chang ta, a vâr zongin a inthima kin irlôi.

¹⁰ Mitcho angin bang kin inmaia, mit nei loi angin kin irvâk ta. Zân lai angin sûn laia khom kin irtet ngai, mi hrâthai laia, mithi angin kin oma.

¹¹ Savom angin kin khêka, chardong takin vasu angin kin inkur ngai a ni. Roirêlna dik kin tûnga, om thei ta ma, sansuak kin nghâkhmoa, a ni san thei om ta mahai.

¹² Ni makunga chu kin pualoinahai hi irthup thei ni mah: Kin sualnahaiin mual an phoia, kin pualoina chu kin inhriat maia, kin inchâinahai khom irnghil ma ung.

¹³ Rengpa hnôlin kin nuarsana, kin Pathian irnghilin, thu chanlamboiin tehel kin zong pea, irphialna zongin minlak kin thoa.

¹⁴ Diktaka roirêlna om ta ma, diktaka sintho rêng om ma ung. Iamna chu tui laia a om chiana, dikna khom hong lût thei mah.

¹⁵ Iamomna rêng om ta maka, sualna khan an hnê zoi ta, Rengpa’n a hong hmua a milung chuk pe ta ma, roirêlna dik hmu hrang zel nei ta mah.

Rengpa’n a mihai san a tum

¹⁶ Dengtheina tuang zoi hrang tûte om mahai, Rengpa’n ar khêl a ti hrai tâka, ama kut ngêtin san nôk a ti, dikna chu a iti mai a ni.

¹⁷ Rôppho hrangin dikna an nghâk tâka, saninhring theina lukhum a khuma, phuba lâkna puan leh ar tuama, ningmurna puan a sil ta.

¹⁸ An sintho ang takin thuanhai a ta, ama doituhai chu ningmurna’n thuanhai a ta, a râlhai chunga chu phuba la a ti, chômbung hmuna omhai khom thuanhai ving a ti.

¹⁹ Rengpa irhming roiinpui chu sak le thanga mi’n chi an ti. Rengpa phûkin, tuilian a isêm angin, chardongna chu hong tung a ti.

²⁰ Jakoba irchi, sual mâksantuhai laia, Zion-a khan, mi irtantu hong hrang a ni, Rengpa’n a ti.

²¹ “Keima’n nin laia thu ki ithung chu hi hih a ni,” Rengpa’n a ti. “Ki’rtha nin kuanga om le ki thu nin bâia ki isia khan atûn ata kumtuangin nangni suaksan ta ngai no ni; nin nâihai le nin tuhai nâihai ten khomin mâksan ngai no ni,” ti hi Rengpa thusuak a ni.