ISAIA 57 - PATHIAN LEKHABU IRTHIANG C.L. Bible (BSI)

Israel millim biak demna

¹ Pathian chi mi, mi dik an thia hin an hriatthiam zel om mahai, anni a thihai khan hnuai chung intaknahai an mâksan ta, ti ngaitua thei tûte zel om mahai.

² Irtharngam takin an om tâka, nuam taka omhai ngai chu, an zâlhmun an irngam thei ta.

³ Nangni, dôi hmanghaio, hong inrang ta hi roi, uire nâi le mi hur irchi nin nia.

⁴ Tu mo nin innuisan, tu mo nin ichiarkhum, nin milei nin inter khum? khosâlna suak le irhuang hnuaia nâi nin inih loi mo?

⁵ Sesua thing hnuaia Pathian irhmingin nin inhoia, thing dâihlîm hnuai nin pana, nin nâitesuihai irbôlna’n nin thathaia, tui kôla rôl panghai laia nin inhlanhaia.

⁶ Tui kôla lung inhlûm nin zonga, khahai kha Pathian in nin neihaia, uain buakin irbôlna’n nin inhlan ngaia, lôm thei hrangin nin ni isôn ma ni?

⁷ Tâng irsângna haia zâlsuam theina, zâlhmun nin doa, kha khan nin irbôl ngaia.

⁸ Nin lampui kôla, nin millimhai nin irkul indeta. Zâlhmuna puan nin thâ insaa, nin izâlsuam ngai a ni; nin izâlpui nuamhai leh chonginkungna neiin, zoro’nchum nin izong ngai a ni.

⁹ A biak hrang zongin ram tina palai nin irtîra, mithi khua dênin nin infetir ngai a ni.

¹⁰ A biak hrang zongin nin sôla, ‘Beidong a om ta,’ khom ti ual mak chêi. Sabeina thar nin nei maia, sôl ual loiin.

¹¹ Tu mo nin ichi, tu mithmua mo nin irhrung? minlak nin thoa, nin ni irnghilsan tâk hi? zoro sôttak ki dâihrek sika, nin ni inzakna a boia, nin ni ichi ta loi?

¹² a dik a nih tia nin hriata, nin itho ngai a ni. Khannisian ar fêna om mah. Mualinphoitir ki ti.

¹³ Kamang takin ni khêk tena ni ilâk hluk millimhai khan nang don ri sehai, phâivua’n sêm a ta, sêm inzuanhai zoi a ti. Keima nir bêltuhaiin chu ram hi roiinpuiin lua an ti, ki tâng irthiang khom chang sa an ti.

Pathianin a mihai changpui an kung

¹⁴ Hiang hin a ti: Buk inpông roi, lamlian siamin irnêng inpôngtir roi, ki mihai fena hrang sât infâi roi.

¹⁵ Hmun irsânga om, kumtuanga hring, mi irthiangin hiang hin a ti: Hmun irthiang irsângtaka om khom inlân, mi thuhnuairôl le irsîrhai kuang chu, chôiirsâng le nin har nôk hrangin ki om mai ngai.

¹⁶ Ki mihai chu demhai mai ta no ninga, ki ning khom inmur mai ta no ni. Ki kuang chu sôlhraiin om an ti, keima isiam an ni sikin.

¹⁷ An sualna le huatirham hrai sikin, an chunga ki ning an mura, ki hremhaia, ningmurin ki mâksanhai ta. Khanchu, anni nuam lam ngot tho pumin, an iom a ni ta.

¹⁸ An omdân chu kin hriat vinga, khannisian an natnahai indam pehai ki ta, hruaihai ki ta, sanhai mai ki ti, lusûn tuanghai irtharngam sakhai ki ti.

¹⁹ Ram tin tâng tin hrangin irngeina, irngeina, ki mihai chu indamtirhai ki ti. Rengpa bâiin a ti.

²⁰ Mi sualhai zonga tuipui irsok lai, irngai loi ang hi a ni, tui irsokin sahrok sahrâi a ikêlsua ngai angin.

²¹ Mi sualhai hrangin irtharngamna zel om no ni, kin Pathianin a ti.