ISAIA 55 - PATHIAN LEKHABU IRTHIANG C.L. Bible (BSI)

Pathian lungkhamna

¹ Hong roi, tuiinhrâl murdihaio, tui hi hong pan roi. Tangka sum nei loihai khom hong unglân, nin nêk hrangin bu hi tangka sum ni loiin hor chôk unglân, uain le dûttui hi hor cho roi, a man boiin.

² Khop liama om loi hrangin, nin sum nin inchêk ngaia! khopna ni loi hrangin nin irnak nin paia, ki thu hi irngai roi, thil sa tui zât murdi nin inuam tak nin fâk theina hrangin.

³ Nin mikuar doin ki kuanga hong roi, Irngai unglân, hring nin ti. Kumtuanga hrangin thu thung ei ta, rêng Davida kuang lungthungna thu kin kung tâk ang khan.

⁴ Mihaiin ki roiinpuizia an inhriat theina hrangin, Ama chu nam hruaitu hrangin kin kung ta.

⁵ Ni inhriat ngai loi nam chu ni nuam lam takin koi ni ta, nang a lan hriat ngai loihaiin chu nang hor bel nuam mai an ti. Israel mi irthiangin kha kha tho a ta, nang chôiindôm a ti.

⁶ Hmu ola a om lai hin, Rengpa chu zong unglan. Anâi lai hin ama chu koi roi.

⁷ Mi sualhaiin an omdân chu masanhai sian, mi tukhomin an ngaituana sual mâksanin, Rengpa tiang hong kîrhai sian, len renhai mai a ti; ei Pathian hi mi ngaidam nuam tak a ni.

⁸ Ki lungrîl le nin lungrîl chu ir-ang thei ma, ki om dân le nin om dân khom irmîl thei ngai ma, Rengpa thusuakin a ti.

⁹ Irvân khi irnêng nêka irsâng a ini ang hin, ki om dân hi nangni om dân nêkin a irsâng a ni, ki lungrîl khom nangni nêka inthûk a ni.

¹⁰ Rua le ivur chu irvân ata zuang tâk a nia, kîr ta loiin hnuai chunga hin a irhmang zoi a ni, Chîmu ru chu a hong incher suaka, an thektu’n ra tamtak lakhôm theina a ni.

¹¹ Ki bâia thusuak khom, chanlamboiin kîr nôk thei ni ma, ki nuam lam chu a tho mai ngai, ki itîrna kipa hlochuk mai a ti.

¹² Râifân takin Babulon chu suaksan nin ta, Râl irvei loiin nangni hruaisuak an ti, nin matona tâng le mualhai, lômin khêksuak an ti. Rampuia thinghai khom lômin an kut inbên an ti.

¹³ Ilhling bila meisâr thing hong mông a ta, Hloitharpa bila hruirâng mông sa a ti. Rengpa sintho inhriat maina hrangin kîr ta loi hrang, kumtuanga irsinsiana ni a ti.