ISAIA 54 - PATHIAN LEKHABU IRTHIANG C.L. Bible (BSI)

Rengpa’n Israelhai lung a thung

¹ O nang a ching nâi nei ngai loi, raifân takin khêk ro, nâihâ irvei ngai loi, lômin khêksuak ta ro; pasal neihai nêkin chu, beidong tuangnu’n nâi le te nei intam ual a tih Rengpa’n a ti.

² Ni puan in hmun chu irzatirin lân, ar khûna khom inzarin lan, indîn no ro, inhroi loiin, a thungna hruihai khom inseitirin lân, a khitnahai khom indet khak roh.

³ Ni ramri khom chang tiang le vei tiang irzat mai a ta, nam dang ilua ramhai khom, ni nâihaiin lua an ti. Khopui ram sai tâk khom inlum inthar nôk an ti.

⁴ Chi no ro, inzak ta no chi ni, mualinphoi ta no chi nia, intem ual ta no chi ni, Ni vânglaia mualinphoinahai chu ni’rnghila, meithâi intirom anga ni omnahai ni’rnghilpaia.

⁵ Nang a siamtu chu ni pasal ni a ta, A’rhming chu itinrêng Rengpa a ni. Israelhai irtantu, mi irthiang, irnêng pumpui Pathian iti a ni.

⁶ A thoibopa pasal neia, a pasal indit nôk ta loi, lungrîl na tuang ang hi ni ni; khannisian Rengpa’n nang koi nôk a ti.

⁷ Zoro sôtnote nang ki mâksana, lung nang kin kham hrai sikin, nang koi nôk lat ki ti.

⁸ Ki ning an mur hrai sika nang ki irotsan viat a ni, lungthungin kumtuangin nan ren mai ki ti, nangma irtantu Rengpa’n a ti.

⁹ Nova dam lai khan irnênga tui sip ta loi hrangin thu kin kunga, ningmur taka irchu ta loi hrang atûna ki inkung hi, nang an rentu Rengpa’n a ti.

¹⁰ Tânghai irhmangin mual irson zoi khomsian, Nang kin renna chu hek no nia, irngeina thuthung ki isiam chu sûtpai no ning, Rengpa lungthungtu’n a ti.

Jerusalem thar

¹¹ O Jerusalem, soisakna tong, tuiirsoka irsok invuang, lungkham hlo ngai loi, lung a sa chi hmangin nang siam inding nôk ki ti, ni’rnghatna hrang Safir lung phûm ki ta,

¹² ni tuala rubi lung hmang ki ta, ni kul mikota khan lung irtêk hmang ki ti, ni kul banga lung mantam hlutak hmang ki ti.

¹³ Ni nâihai murdi Rengpa’n irchutirhai a ta, râl irvei loiin om mai ta an ti.

¹⁴ Dikna sikin det ni ta, dengintheitirtuhai rot an ta, chi hrang nei no chi ni, chi omna lakin nang nâi ta no ni.

¹⁵ Nang a doitu an la omin chu keima thu ni loia ni a ti, nang a doituhai chu hrât thei ngai no nihai.

¹⁶ Irngai ro, meihol sêma thîr suktuhai hi ki isiam an ni pumin, kha hriamhrei thil insiatna hranga hmangtuhai khom ki isiam an ni.

¹⁷ Nangma doina hrangin an hriamhrei siamhai chu inhroi loiin. Nangma doituhai chu thei loi changin om an ti. Hi hi Rengpa siahlohai dong hrang chu a ni, zoina pe a ti, Rengpa thusuakin a ti.