ISAIA 53 - PATHIAN LEKHABU IRTHIANG C.L. Bible (BSI)

¹ Tu mo kin thu inhriathai hi zôm hrang? tu mo Rengpa kut inlang hi hmu infel hrang?

² A makunga zuang inchersuak a ta, Ramchâra chîmu irzung thâk angin, irsôn loiin, hmêl satna khom nei loiin. Ei ta hranga ennuam ual om thei no ni.

³ Ennuam om loitak, mihai ihnôl, mihriam chuk loi, natna tuang chuan chuan, dam nî nei loi, Mi tin imâksan, ennuam loitak, ite bêa ei ibe loi chu a ni.

⁴ Ei natnahai a nir zângtira, ei ituang hranghai chu a lei ituang zoi a ni; Eini lakin an ihrem angin ei bêa, Pathian irngaiinhluna’n a ivîk ni a tih ei tia.

⁵ Khannisian, ama’n kin sin insiatnahai sikin sâbe a tuanga, ei sualna sika soisak a ni, Irngeina ei nei theina hranga hremna tong a ni, a vîk tuangna chu ei damna hranga a lei ni.

⁶ Belra angin ei irthek indarh zoia, mâni nuamna tiang ei pan zoia, Rengpa’n ei rênga dik loinahai chu, a dârsuama a hong irnghat tâk a ni.

⁷ An soisaka, irngaiintôm takin a tuang maia, thuanhai loiin. Belra that hrang an kai lai khomin irchok loia a mul ep hrang khoma ite a hmûr phong viat mah.

⁸ An hong chela, a chungthu an rêla, A chardong hrang tûte’n donsui loiin, a hringna chu rammual ata an lâkpai pea, ki mihai sualna sika that a ni.

⁹ Mi nunsiat ni viat loi, minlak tho ngai loi chu, mi sualhai irtan hranga inkung a ni, a hong thia, mi irchonghai thâna an phûma.

¹⁰ Rengpa’n, ‘Vîk intuangtir hrang a sa,’ a tia. Na a ituang tâk a ni. A hringna chu sual irbôlna’n ni pom tena, ar chihaiin hmu mai an ti, a dam lai sûn bôk pe ni a ta, a kuta Rengpa indit lam chu hlochuk a ti.

¹¹ A sinthôna ra a hmu tena chu, a tuangna chu man boi ni mah ti inhria a ti. Ki siahlo feltakin, mi tamtak saninzôkhai a ta, an sualnahai pêl pehai a ti.

¹² Mi lianhai laia a dongtum hrang ki hrê pea, mi hrâthai laia râllâk sum sem ta ki ti: Thi hranga ar pêkna sikin, mi sualhai laia tep sa a ni. Ama’n chu mi tamtak siatna irthûlin, mi sualhai hrangin a izong pehai ngai a ni.