ISAIA 50 - PATHIAN LEKHABU IRTHIANG C.L. Bible (BSI)

¹ Rengpa’n hiang hin a ti: “Nin nu Israel chu ki tîrpaia, irmâkna lekha mo ki pêk uala? Lâkai intâng nêkin an nâihai zuar angin, tuhai kuang moh nangni ki izuar? Nin sual sika zuar nin nia, nin sininsiatna sika a ni, nin nu ki itîrpai.

² Ki hong lai khan tûte’n ni uksak mak chêia, Nangni ki koi lai khan tûte’n ni sâm mak chêi; sansuakna hrangin ki kut a ibong mo nin isôn? Sansuak hrangin ki ihrât loi mo nin isôn? tuipui khom ki hala, a kang theia, Tuipuihai khom kin chârtir thei, tui a om no sikin nga an thia, an thu zoi ta.

³ Irvân khom kin thimtira, lusûn puanduk sil ang hi a ni.

Rengpa siahlo thuzôm

⁴ Rengpa ki Pathianin thuhril theina a ni pêka, Mi irzal takhai inthor theina kin hriat theina hrangin a ni tin a ni kai inhara, a sûn a zânin mi irchutir theina ki neiin kin hriata.

⁵ Rengpa ki Pathianin ki mikuar a nin vârtir pea, kei khomin tukullian song ma unga, Ki’rhei kîr loina hrangin.

⁶ Vîk hrangin ki hnung zâng ki doa, ki hnerkamulhai khom an phôia, an nin chilthuana; khannisian inzakin ki hmâi thup ma ung.

⁷ Rengpa ki Pathianin a ni changpuia, khasika mualphoi ki irlâk loi a ni; lungngar ki lei irsaka, inzak viat loiin.

⁸ A ni changpuitu chu a hong nâia, Tu mo ni doi ngam hrang? thiamthu hril hong ngîr an ta, a ni doitu chu hong nâi ri se.

⁹ Rengpa ki Pathian hi a ni santu chu a ni, tu mo theiloi nin changtir thei hrang? Puan angin irthep an ta, irthiin fa zoi a ti.

¹⁰ Nangni laia Rengpa chi ngai mi, A siahlo a thu irngaituahai ngai, vâr nei loiin inthima om ngai khom unglân, Rengpa irhming iam mai unglân, Pathiana khan irnghat roi.

¹¹ Khannisian, mâni meiser inchoka, ir-al thei chôihaio, nin thal irling thei vâra khan fe ngân roi ba, Rengpa kut ata nin idong hrang chu, intak tuanga nin ithal dôr dôr hrang a ni.