ISAIA 49 - PATHIAN LEKHABU IRTHIANG C.L. Bible (BSI)

Israel nam danghai enton hrang

¹ Chômbunghaio, ki thu hi irngai roi, ram hlataka omhai khom irngaitua roi. Sûnga ki om lai ata Rengpa’n a ni koia, Nu pum sûnga ki om lai ata ki’rhming a phuaa.

² Ki thu khom khandai ngaih tak an changtira, A kut zapha kâra a ni siaa, thal irzumtak angin a ni hmanga, a thal siana koka a ni thup ta.

³ Ki siahlo chu ni ni, O Israel nangin ni chôiindôm ni ta, an ni tia.

⁴ Ki sinthôna chu maimang a changa, thil chanlamboiin irtha ki paia, thosuak ite nei ma ung ki irti a ni; khannisian ki chungthu hi Rengpa irêl hrang a ni, Ki sintho ang taka ni pêktu chu Pathian a ni.

⁵ Ki suak mân khan, siahlo hrangin Rengpa’n a ni lei inkung ta; Jakoba chu hruai kîr hrang le Israelhai chu hruaikhôm hrangin Rengpa’n a ni chôiindôma, ki Pathian chu ki hrâtna hnâr a ni.

⁶ Rengpa’n hiang hin a ti: Jakoba irchi inhartir nôka, Israel la damhai hruai kîr hranga ki siahlo ni hi ite ual ni mah. Hi nêka sintho hrang roiinpui ual ni nei. Rammual pumpui hi inzôk a ni theina hrang le nam tin ta hranga vâr ni ngêt ni ti.

⁷ Israelhai irtantu mi irthiang, Rengpa’n hiang hin a ti: “Nangma, mi ihnuaisia, nam tin ien indong, roirêltuhai siahlo, rênghaiin suak ata ni izôk nang hmu an ta, mi lianhai khom ni makunga kûn an ta; Rengpa’n a thu an kung sikin Israel mi irthiangin nang an thang ta.”

Jerusalem inding nôkna

⁸ Rengpa’n hiang hin a ti: “A zorotaka nang don ki ti, a zorotaka nang sansuak ki ti, nang ki hrunga, nangma sikin nam danghai leh thu kin thunga, Ni ram indingtir nôkin, nin irchon ram chuai sai nin lua thei ving nôkna hrangin.

⁹ Intângna ina omhai chu, ‘Suak roi,’ ti ki ta. Inthima omhai chu, ‘A vâra hong suak roi,’ ti sa ki ti. Kêlbelra angin lampuia irtet an ta, mual sûl tam loina hmuna khom sûlhring hmu mai an ti.

¹⁰ An phîngchâmin tuiinhrâl ta ngai no nihai, phâivua lum le sûn misa lum khom chi ual no nihai. An hruaitu’n an renhaia, tui tamna hmuna a hruaihai ngai.

¹¹ Tâng tianghai lamlian siam ki ta, an fena hrang lampui siam pehai ki ti.

¹² En ro, ki mi, ram hlataka honghai so, Hmâr tiang ata hong an nia, sim tianga panin Sinim ram hlataka hong an ni so.

¹³ Irvânhaio, râifân takin khêk unglân, irnêng chung khom hi lômin khêk sa ri se. Tânghai khom lômin khêksuakhai sian, Rengpa’n a mihai chu irtharngam a saka; dengthei hranghai chu an renhai ngai.

¹⁴ Zionin, ‘Kin Reng Pathianin ite bê’n ni bê maka, Rengpa’n a ni’rnghil ta a ni,’ a ti raka.

¹⁵ Nu’n a nâi irhnûk lai moh irnghil thei ni? A rîla ra mo irnghil thei ni? nuhaiin an nâihai an irnghil ngai khomin, keima’n chu nangni irnghil viat no ning.

¹⁶ Irngai ro, ki kut zaphaa nir hming ki’rziak ta, ni kul banghai ki hrung mai ngai a ni.

¹⁷ An siat nuamtu nêkin a sin insa nuamtuhai chu, an irhnot ngai a ni. An siattirtuhai chu nangni rotsan lat an ti.

¹⁸ Tangin lân, thîr hi ro, ni mihai irthoka irhâi hi, an hong irthok chak a ni ta. “Keima ki om,” Rengpa thusuakin a ti: Moiin a’rvôna a irsongpui angin, a mihai chu songhai ni ti.

¹⁹ Nin ramhai a siat zoiin a iram chit a ni kha te, A lua hranghai an hong tungin chu, chîn pehai hrai a ta, nangni inramtirtuhai chu irhmang zoi an ti.

²⁰ Ni tû le nâihai sala intânghai an hongin chu, Ni mikuar hriata, “Ram hi a chîn hrai ta, omna hrang ram lian ual kin innang ta,” la ti an ti.

²¹ Hi mihai hi tu mo nin neitira? Ki nâi neihai ki sûnhai zoi tâka, sala intângin kin vâia, hihai hih tu mo a nin liantir pe a ini tâk? Ki bing vaiin an ni mâka, hihai hi kho tianga mi mo an ini? la ti ni ti.

²² Rengpa Pathianin hiang hin a ti: “Nam tin mithmua ki bân phar ki ta, irsinsiain, ni nâihai pomhai an ta, ni nâinuhai pohai an ti.

²³ Renghai chu ni pahai ni an ta, rêngnuhai dônhai an ti. Irnênga khûksadelin chubai nang mûk an ta, ni kea vâiphin kop chu inliak an ti. Keima hi Rengpa ki nih ti nin hriat theina hrangin, a ni nghâktuhai tûte mualphoi irla no nihai.

²⁴ Mi hâitak râl doi mo sût ngamin? Mi hrâthai lai ata hruaisuakin.

²⁵ Rengpa’n hiang hin a ti: “Mihai râl doi chu sutpai ki ta, mi hrât kuta om khom hnûkdok ki ti. Nang a doituhai chu doihai ki ta. Ni nâihai chu keima’n saninhringhai ki ti.

²⁶ Deng nang intheitirtu chu an bingin an hmê infatirhai ki ta, Uain inrui angin an thisen inrui nôk an ti, Rengpa saninhringtu ki ni, nangma irtantu, Jakoba mi hrât ki ni, Mi murdi’n inhre ving an ti,” tiin.