ISAIA 45 - PATHIAN LEKHABU IRTHIANG C.L. Bible (BSI)

Kura, Rengpa mi inkung

¹ Kura chu Rengpa’n rêng hrangin sahriak a pol tâka, nam tinrênghai rûn hrangin a inkung tâk a ni; rênghai an sinthotheina hlîk pe hrangin a tîra; a ta hrangin khopui dâi mikothai Rengpa’n inhong pe a ti. Kura kuang Rengpa’n hiang hin a ti:

² Ni kuang hruai ki ta, tânghai irhnuaitir ki ta. Dâra siam kul mikothai suk insiat ki ti. Kul mikot khârna thîr kalna khom inkhiakpai ki ti.

³ Irchon inthimna laia an ihrêhai khom, Hmun irthupa sum an ihrêhai nang pepai ki ti. Ni’rhminga nang koitu hin, Rengpa, Israelhai Pathian ki nih ti inhre thei ta ni ti.

⁴ Ki siahlo Jakoba, ki inthang Israel sikin, nir hmingin nang ki ikoi a ni ta. Ni nin hriat no nâkin, nir hming ki phua ta.

⁵ Kei hi Rengpa chu ki ni, tûte dang om mahai, Keima ti no chu Pathian dang om mahai. Ni nin hriat no nâkin, nang ki irvôtir a ni ta,

⁶ nisua tiang ata nitâk tiang dênin, Keima ti no chu Pathian dang zel om mahai ti mihaiin inhre thei an ti, Keima ti no chu Pathian dang rêng om mahai.

⁷ A vâr ki siama, inthim khom kin omtira, Sat ki vura, vânduainahai khom kin tungtir ngai. Hihai murdi hi keima Rengpa itho a ni.

⁸ Irvân irsâng ata zoina rua zuang tho sianlân, ra insua ri se. Keima Rengpa hin annihai kha intungtir ki ti.

Rengpa tinrêng chunga thuneitu

⁹ Pil bêl an ivuak hin a vuaktu hrilsiat thei ni mo? Pilin a vuaktu chu, “Imo ni isiam thei om mak chea,” a iti thei hrang ma ni?

¹⁰ Mâni nu le pahai kuang, “Itina mo hianga nin ni inei hi?” tu ngân mo ti thei hrang?

¹¹ Israelhai siamtu mi irthiang Rengpa’n hiang hin a ti: “Ki nâihai chungchânga hin nin nir chutira, ki itho hrang hi nangni ni irêl pe moh ki nang nin isôn?

¹² Keima hih ki ni, irnêng siamtu chu, A sûnga om mihriamhai hi ki isiam an ni. Keima kutin irvân khom khi ki kaiphara, Thil om murdihai khi, keima ircham taka om an ni.

¹³ Râl a hong lianin chu Kura chu ki tumna lam tinrênga changpui ki ta, ki khopuihai indingtir nôk a ta, lômman pe ual nuam loiin irtanna man pêk khom nuam no ni. Ki mi, sala omhai insuahai a ti,” tiin Itinrêng Rengpa’n a ti.

¹⁴ Rengpa’n hiang hin a ti: “Aigupta mihai ihlosuak chu, Ethiopia rama zuarsumhai nin ilâk hrang a ni, nangni hong chôi pe an ti, Seba rama mi dungsei ta takhai chu, nin suaka om hrangin hong an ti. An kuta thîrhrui bun pumin nangni zui an ta, nin kuang khûksadelin, ‘Pathian iompuihai chu nin lei ni hi te, Ama vai hi Pathian hrât chu a lei ni hi,’ tiin chubai nangni mûk an ti.

¹⁵ Israelhai Pathian, anni saninhringtu chu Pathian irthup ni lei ini a ni.

¹⁶ Millim siamtuhai chu inzak irla tak tak an ta, an rêngin mualphoi irla an ti.

¹⁷ Rengpa’n Israelhai chu kumtuanga hrangin saninhringhai a ta, itiklai khomin mualinphoi no nihai,” a ti.

¹⁸ Irvân siamtu chu Pathian a ni, Irnêng khom a siama, dettakin an ngîrtira. Siat remrum khomin siam maka, om hmun satakin a isiam a ni. Ama thotu Rengpa’n hiang hin a ti: “Kei hi Rengpa chu ki ni, tûte a dang om mahai,”

¹⁹ Irnêng chung inthim lai ata inrûkin thu hril ma unga, hmun tina ni zong hrangin Israel irchihai khom tîrhai ma ung. Kei hi, Rengpa thudik hriltu ki nia, thil dik kin puangsuak ngai.

Rengpa le Babulon millimhai

²⁰ Siatna ata zôkhai, nam tinrênghaio, Hong unglân, hong irbuk roi, tûte châng thei ngai loi thingtum millim, pathiana biakhai hin ite thil inhriatna nei mahai.

²¹ Hong unglân nin thu hong hril roi, hong irdon irhlôm ving roi. Hi thilhai hi ni ma ung mo? Mâni mihai saninhringtu Pathian keima vai hi ki ni, tûte dang om mahai.

²² Rammuala mi murdihaio, keima tiang hor hei unglân, keima vai hi Pathian ki ni, tûte a dang om mahai.

²³ Mâni irhming sâmin khomâk ki’rsâma, Ki chonginkung chu iamom tak a ni. Ki thu hril sai tâk chu irlêk ta ngai ma ung; Ki makunga mitin khûksadelin ki’rhming sâm an ti.

²⁴ “Rengpa, nangma leh vai a ni, dikna le hrâtna chu a om,” ni la ti an ti. Keima tiang hong an ta, a ni hnôltu murdi chu mualphoi irla an ti.

²⁵ Keima Rengpa hin Jakoba irchihai chu saninhringhai ki ta, anni’n ni chôiindôm an ti.