ISAIA 40 - PATHIAN LEKHABU IRTHIANG C.L. Bible (BSI)

Irtharngamna thu

¹ Ki mihai hi lungngam sakhai roi, lungngam sakhai mai roi, nin Pathianin a ti:

² Jerusalem kuang irtharngamna thu hril lat roi, an ituang hrang chu insum hrang a ni ta, Rengpa kut chu a bâk inhniin an tuang ta.

³ Irhâiin, “Ramchâra Rengpa lampui siam unglân, kin Pathian hrang ramchâra lampui intuantir roi.

⁴ A phâinahai nelinbit unglân, tâng le mual omhai tuk irhnuaihai roi, a kôinahai intûntir unglân ar ang loihai ir-angtir roi.

⁵ Rengpa roiinpuina chu inlang hrang a ni ta, mi murdi’n hmu zit an ti,” Rengpa’n a ti.

⁶ Irhâiin, “Khêk ro,” a tia. Ama’n chu, “Imo ki iti hrang?” a tia. Mihriamhai hi sûlhring an nia, an roiinpuinahai khom sûl pârhai ang hi a ni.

⁷ Rengpa phâivua’n a zuang zâpa, sûlhring a thêma, pârhai a chuai ngai. A ni, mihriam hi chu sûlhring anga om an ni.

⁸ Sûlhring a châra, pârhai a chuai ngai, ei Pathian thu hi chu kumtuangin om mai a ti.

⁹ Tâng irsânghaia lui maiin lân, Zion kuanga thu lômom chu inring takin hril ro, Jerusalem kuanga thu lômom chu inpuang ro, indîn loiin Judai ram khopuihai chu hrilhaiin lân, “Nin Pathian chu a hong tung ta,” ti roh.

¹⁰ En ro, Rengpa Pathian chu mi hrât hongin a honga, a kut hrâtna hmangin roirêl a ta, a isansuakhai hruai a ta, a irtanhai infâhai a ti.

¹¹ Belra hrungtu angin Belrahai infâhai a ta, a têhai chu pomhaiin, a puihai hruaihai a ti.

Hrilirkhi thei loi Israel Pathian

¹² Tu mo voikhatin tuikhanglian kha a kut zapha’n mo ar khî thei? Tu moh irvân khi a kuta inkhâpin irvân khi ar khî zoi thei hrang? Tu moh irnêng pil hi khilâtin a irtê zoi thei hrang? Tâng le mualhai hih tu mo phalla leh varh thei hrang?

¹³ Rengpa irtha chu tu mo thunei thei hranga, Tu’n mo irfûktirin a kai hruai thei hrang?

¹⁴ A bengvârna hrangin tu mo ar don ngai. Tu mo lamdik irhmutir thei? Tu mo inhriat theina irchutirhai thei? Thil tho hrang dân irhmutir thei hrang?

¹⁵ Rengpa hrangin chu nam murdihai hi, baltizera tui mal tâk angin, tuala kebop kop ang hi a ni; Tuikhanglian kôla phâihai khom lung anga omin hrûtpai thei an ni.

¹⁶ Lebanon tânga ramsahai chu Rengpa ta hranga irbôlna ruk no nia. Thing omhai khom tua ruk no ni.

¹⁷ Nam murdi hi ama hrangin ite ni ual maka, Ite bêin bê no ni.

¹⁸ Pathian chu tu leh moh nin itetûk hrang? I hai leh mo nin hrilirkhi ta hrang?

¹⁹ Thil suk theihaiin millim an suka, Thil inluan theiin rângachakin an luana, tangkaruain ilhli hrang zîngziri an suktira,

²⁰ Khaanga nei zoi loihaiin, thingtum an sintirhaia, a chat thei loina hrang ang dôra theihai a pêkhai ngai. Annihai millimhai leh hin tetûk mo nin itum ma ni?

²¹ Inhre mak chêi mo? nin irngai loi ma ni? A phut ata nangni an ihril mo ni ma! Irnêng irsiam dân hi inhre mak chêi mo?

²² Hi hih chu kôlkil irhual sûnga om a ni. A sûnga omhai hi chu ama ta hrangin chu kutpâr sûnga om ang a ni. Puanzâr angin irvân khi an phara, omna hrang puan in a isung ang hin.

²³ Rêng roiinpuihai an lômtira, irnênga roirêltuhai ite innitirhai maka,

²⁴ thing ei iphun hon cher thar, chîmu irzungthâk chak ang hi an ni. Phâivua’n a hong sêma a chuaia, phâivuapui a hong thoa, fapôl angin a rama.

²⁵ Khanchu tuhai leh hin mo a ni itetûk hrang, tuhai ang dôr hi mo ei ini? Mi irthiang khan a ti.

²⁶ Irvân tiang khin nin mit inlêngtir unglân, nin ihmuhai khi tu isiam mo an ini? Sipai rualhai anga hruaisuak ngaitu, ar hminga koi thei vingtu isiam ving an ni; thil a thothei hraia, ite irhmang ngai mah.

²⁷ Israel irchihaio, ithoa mo, “Rengpa’n ei omdân a ihmu loi, ei Pathianin ite bêin ni bê ta ma,” nin iti?

²⁸ Inhre mak chêi mo? Rengpa vai hi kumtuanga Pathian chu a nia, kôlkil minli sûnga om murdi hi, Ama isiam ving a ni.

²⁹ A sôlhai an hrâttir theia, a’rzalhai an hrâttirhai thei ngai.

³⁰ Thoitharhai sôlin an dang a châra, ruathartehai khom sôl hraiin an thal rak ngai.

³¹ Rengpa nghâktuhai rêk chu, hrât inthar nôk an ta, Irmupui angin mitha leh vuang kâi an ta, Intân an ta, sôl no nihai, fe an ta, sôl inhre viat no nihai.