ISAIA 37 - PATHIAN LEKHABU IRTHIANG C.L. Bible (BSI)

Rengin Isaia ar donna

¹ Reng Hezekia’n kha thu kha an hriatin chu, a puan an potthêra, bora puan a sila, Rengpa ina a lûta;

² rêng sûngkua enkoltu Eliakima hai ziaktu Sebna hai le Ochaihai laia ulianhai chu bora puan silin Amoza nâipa deipu Isaia kuang a tîra.

³ Reng Hezekia’n hiang hin a ti: “A vuan hin kin ta hrangin chardongna nikhua a tung ta, an ni hnuaisiaa, ite bê’n ni bê ta mahai! Nâi nei zoroa nu irzal taka om kin ang ta.

⁴ Pathian hring hrilinsiat hranga Assuria mi tîr Rab-sakea thuhril kha Rengpa ni Pathianin a len hriatsuak ta. Rengpa ni Pathianin an sîrtuhai kha soisak sian chu. Kin mihriam a dama la omhai hrangin chongchai ro, nang a ti,” an va tia.

⁵ Reng Hezekia mi tîrhai chu Isaia kuanga an va tunga,

⁶ Isaia’n an kuang khan, Rengpa’n hiang hin a ti: “Assuria rêng siahlohaiin an ni manêp dân hi chi no roh.

⁷ Irngai ro, thâidôpna lungrîl pe ki ta, thuthang hril ki ta, a rama kîr a ta, a ram sûnga khandaiin that an ti, tiin nin pu kuang va hril roi,” a tia.

Assuria rêngin insîna chong a tho nôk

⁸ Rab-sakea chu a’rdîpa, Lakis ata Assuria rêng chu a’rsona, Libna khua a doi ti an hriatin chu kha lam kha a pana, a va hmu ta.

⁹ Ethiopia rêng Tirhaka thurchi chu Assuria an hrila, Ama doi hrangin a hor siam ti an hriatin, Hezekia kuanga palai a tîra.

¹⁰ Judai rama rêng Hezekia kuang, “Ni irnghat Pathianin Assuria kuta Jerusalem chu pe no ni, iti’n nang huang no ri se.

¹¹ Assuria rênghaiin an ram lua murdia an sintho, an ram a siatpui ti thu nin hriata; nangma te hi zôk thei ual no chi ni?

¹² Ka pahaiin an insiathai nam Gozan hai, Haran hai, Rezep hai, Telesar-ah om Eden hai kha an pathianhaiin an sanhai thei mo?

¹³ Kho tiang moh an om Hamath rêng hai, Arpad rênghai, Sefarvaim khuaa om rênghai, Hena rênghai, Iva rênghai kha an om zoi ta? zu ti ro,” a tia.

¹⁴ Palai lekha zuang chôitu chu Hezekia’n a lei hmu’n chu a tepa, Rengpa ina a lûta, Hezekia’n Rengpa makunga a phara,

¹⁵ Hezekia chu Rengpa kuang a chongchaia.

¹⁶ “Itinrêng Rengpa, Israelhai Pathian, cherub chunga toi, nang vai hi Pathian chu ni nih, ram roirêltu ni nia, irnêng irvân khom hi nangma isiam a ni.

¹⁷ O Rengpa ni mikuar lei sungin lân, irngai ro: Rengpa mengin lân, en ro; Pathian hring sôt hrang soh Senakeriba’n thu a hong ihrilhai hi irngaitua roh.

¹⁸ O Rengpa, Assuria rênghai hin nam tin an doia, an ram an insiat zoi ta.

¹⁹ An pathianhai meia an hâl pehaia, annihai kha pathian ni ual mahai, mihriamhaiin thing le lunga an isiam pa pai an ni, khasikin a siat thei chu an ni ving.

²⁰ Rengpa atûn hin a kut ata ni sansuakin lân, khanchu rammual murdia mihaiin nang vai hih Rengpa chu ni nih ti nan hre ving an ti,” a tia.

²¹ Amoza nâipa Isaia’n Hezekia kuang mi a tîra: “A kuanga khan ni chongchaina chung irchuan le Assuria rêng Senakeriba chungthua,

²² Rengpa Israelhai Pathian thu hril chu hi hih a ni: Zion nâinu’n nang a en irhnuaia, nang a innuisana, Jerusalem nâinu’n chu ni irot hi a lu nang an thikkhuma.

²³ Tu mo ni innuisan, imo nang ar fê pe na? Tu chunga mo ni ikhêk? Tu chunga moh mualphoi ni irlâk? Israel mi irthiang chunga moh ni mah.

²⁴ Ni siahlohai hmangin Rengpa a irfê pena chu, tâli chunga tâng irsâng takhai chunga ki fea, Lebanon tânghai ki’rfanga, Sidar thing irsânghai ki phûra, meisâr thing sa zâthai ki phûra; tâng irsâng rampui rîlhai khom ki’rfang zoi ta.

²⁵ Tui ki sunsuaka, ki ina, Aigupta tuihai chu ki ke’n ki sira, kin kangtir zôia,” ni ti ngaia.

²⁶ Tian ata ki lei itumtak a nih ni tia, lan hre mak che mo? Atûna thil hong tung hi tiana ki lei irêl sai a ni. Kul nei khuahai nin siatpaia,

²⁷ a sûnga omhai an chia, irtha’nvâiin mualphoi an irlâka muala hloisûl sipin, in chung sîpa ilhling chiak sipin, phâivua lum isêm inthêmhai khom, ki lei irêl sai a ni.

²⁸ Keima chunga ni om dânhai, ni lût le ni suak khom kin hriat ving.

²⁹ Ki chunga hin ni chiara, ni mualphoi dân ki len hriat zoi ta, ni hnâra hnâr kol irbun ki ta, patritui invol ki ta, ni fena hrang lama lei zam ki ta.

³⁰ Reng Hezekia kuang, hi hi nangma hranga irsinsiana ni a ti: kumin chu farhli tûng nin ta, nakum khom hi farhli ngêt kha la tûng nin ti. A kum thumna tena chu chîmu thar song unglân, a ra fa ta nin ti. Irhuana grep phun unglân, a ra fa nin ti.

³¹ Judai rama mi la damhai chu theikung irzung inthûk tak nei, ra tamtak ang hin la om an ti.

³² Jerusalem ata khom la dam suak hrang an oma, Zion tânga a thi zoi loi la om ngêt an ti. Itinrêng Rengpa satirngaina khan hloinchuktir a ti.

³³ Khasikin Assuria rêng chungchâng Rengpa’n hiang hin a ti: “Hi khopuia hin hong lût a ta, ite ma viat no ni;

³⁴ phô leh hong doi no nia, irbîkna hrang pil khom choi no ni, Rengpa thusuakin a ti.

³⁵ Hi khua hih keima le Davida zârin san ki ta, inzôk ki ti,” a tia.

³⁶ Rengpa itîr vântîrtôn chu Assuria-hai tuala fe a ta, mi nuai khat sîngriat le sâng ringa a thata, zîng an hong thoiin chu hnuai chu mithi ruakin a sip tâka.

³⁷ Assuria rêng Senakeriba chu entinin a neia, en nuam loiin, Ninevi khuaa a om tâka.

³⁸ An pathian Nisroka ina pathian biaka a kûn laiin a nâi Adrammeleka le Sarezera khan khandaiin an tuk thata, Ararat rama an rota. A nâipa Esarhaddona chu ama irthûlin an lal ta.