ISAIA 35 - PATHIAN LEKHABU IRTHIANG C.L. Bible (BSI)

Lampui irthiang

¹ Ramchâr le tânghai chu lôm an ta, Ram kol têt tût chu raifânin om a ti.

² Rama pâr sahai angin pâr suak an ta, râifân takin zâi an ti, Lebanon tâng angin roiinpui a ti. Karmel le Saron phâi angin enhoi a ti. Rengpa roiinpuina chu hmu an ta, kin Pathian satnahai le.

³ Bân hrât loihai chu inhrât nôk unglân, Irkhûk zenghai khom inhrâttir nôk roi.

⁴ Lungrîl sôlhai chu, “Ei Pathianin phuba la a ti, Nin milung inngar unglân, chi viat no roi, nangni thuan a ta, nangni saninhring ngêt a ti,” ti roi.

⁵ Mitcho tak mit chu invâr a ta, Kuarsêt mikuar invârtir pe a ti.

⁶ Ke’nbâihai khom sakhi angin intân thei an ta, Chong theiloi khom raifânin zâi thei an ti. Ramchârna hmuna tui suak a ta, Tâng chârna hmuna khom tui luang suak a ti.

⁷ Ramchârna taka dîl tui om a ta, ram ngûitak hong har suak a ti. Sihal tamna a lêngna hmuna chu phâiruang le sûl zîng dulin om a ti.

⁸ Khatak khan lamlian om rum a ta, “Lampui irthiang,” ti an ti. Mi porinchehai fe no nihaia, hi hi a nih anni fena hrang lampui chu, a fe murdi, mi’ntohai khom hruai irhmang no nihai.

⁹ Khatak khan chu kâmkeibaknei om maka, ram sahrâng khom hong ngam no ni. Hmu hrang khom om no ni. Irtan saihai fena lampui a nia.

¹⁰ Rengpa irtanhai hong kîr an ta, zâipumin Zion pan an ta kumtuang lômna changin om an ti. Râifân lômin sip an ta, beidong le chapna om ta no ni.