ISAIA 33 - PATHIAN LEKHABU IRTHIANG C.L. Bible (BSI)

Changpui zongna

¹ Thil la’rhmang ngai loi, mi ta rok pehai ngaio! Mi ihuang ngai loi, mi huanghai ngai hin, nin rok zoiin chu inrûkna tong nin ti, nin huanghai zoiin huangin om nin ti.

² Rengpa kin chunga ni khonzâna insumin lân, nang kin nghâk mai, a ni tin kin hrâtna ni pe’n lân, beidong nia ni san inzôk ngai roh.

³ Ni’rhâi inhriatin mihai an rota, ni zuang pûtin chu nam danghai an indarh zoi ta.

⁴ Khâi intâm angin râl sum chu an irchua, a hrût hrangin an irvâk soi a ni ta.

⁵ Chung tiang Rengpa chu a oma, a roiinpui vang na! Zion-a diktak le feltakin roi a rêl ta.

⁶ Nin zoro vongtu a ni, a mihai chu a hrunghaia, vârna le inhriattheina a pêka, Rengpa chi hih an irchon hlutak a ni.

⁷ En roh, an pasal sahai chu pên tiang an chiara, irngeina zongin an palaihai chu an ichap mur mur a ni ta.

⁸ Lampui liannahaia irhu a dâia, lampuia fe ngam zel om ta mahai. Thuthung tuang zoi loiin an oma, irngeina thu zôm loiin, tûte inzak loiin.

⁹ Ram chu a’rzalin a iram zoi a ni ta. Lebanon rampui a ngûi zoi tâka, Saron phâi khan ramchâr angin a om ta, Basan le Karmel tânga thing hnâ a chil zoi ta.

Rengpa’n râlhai a ngo

¹⁰ Rengpa’n hiang hin a ti: “La hong pût ta hi rong, chôiirsâng ki ta, ki roiinpuinahai târinlang ta ki ti.

¹¹ Thil chanlamboi nin ngaituaa, ite thodok nei loiin, nin thusuak chu mei angin, nangni kâng irhmangtir a ti.

¹² Chinailung hâla a ipuak ngai angin le chînribuk a ikângirvôm ngai ang hin, irhmang zoi nin ti.

¹³ Hlataka omhai khomin ki sintho hih inhre ving roi, nâitenga omhai khomin ki sinthotheizia hi inhre ving roi,” a tia.

¹⁴ Zion-a om mi sualhaiin an chia, sakhua ngaipoimo loihai chu inthing an ti. “Ei laia tuhai hin mo a ningmurna mei tuang thei hrang? Kumtuanga chok mai hrang hih tu mo tuang zoi hrang?” ti an ti.

¹⁵ Diktaka sinthoa, thil sa hril ngai chu, irhuangna saloi nuam ngai loi chu, fâkinrûkna hmuna kut irdînthei thisen insuak hranga insâp nuam loi thil sual tho hranga kop nuam ngai loi mi chu.

¹⁶ Hmun irsângtaka om a ta, kul bing chunga omhai angin zôk a tih, fâk hrang nghâkin tui irsam no ni.

Zoro inthang hong tung hrang

¹⁷ Reng inditom tak hong hrang, nin mitin hmu nin ta, ram irzattak chunga roirêl a ti.

¹⁸ Râl ni chi laihai kha inhresuak nin tih, irhming koi ngaitu kha khôn moh a om ta? khua lei sâla, nangni lei tep theitu kha? la ti nin ti.

¹⁹ Irtet kha hmu ta no chin nia. Irhâi inringtak, a chong fel loi, chong irhlôm an ihril inhre thei loi hmu ta no chin ni.

²⁰ Kut ei hmangna hrang Zion khua hi thîr roi, Jerusalem khua hih en irkhi ual no roi, puan in hoitak, thon nang loi, a ngul phôi nang ta loi, a kai inrînna hrui chat ngai loi ang hi a ni.

²¹ Khatak khan chu, Rengpa roiinpuina nin entir a ta, tui tamna rama, tui lam hoitak hmuna om ei ta, râlhaiin irkuang hong chôi thei loina hmuna, irkuang lian hong lût thei ta no ni.

²² Rengpa chu roi ni rêl pe hrang ni a ta, Rengpa chu ei hruaitu a nia, Rengpa chu ei rêng a ni, Ama’n ni hrung mai a ti.

²³ An irkuang khitna hruihai a’rzûk pehaia, a ngul khit indet thei ta mahai. Puanzâr khom kai inrîntir thei ta mahai. An sumhai man pehai ei ta, a tam hrai sikin ke’nbâihai khomin irchu thei an ti.

²⁴ Kho sûnga omhai khomin, “Dam ma unga” ti ngai no nihai, an sualhai ngaidam ni an ti.