ISAIA 29 - PATHIAN LEKHABU IRTHIANG C.L. Bible (BSI)

Jerusalem chungchâng thu

¹ O Jerusalem, Jerusalem, Davida omhmun khuarna khopui! inren teh nin om bâk tâka! kum hni vêl hong ni sian, kûthai hmang nôk unglân;

² khanchu Jerusalem chu hor hual ki ta, chapin khêk an ti. Kho sûnga thisen luang a ta, Pathian maichâm angin, sen huang a ti.

³ Doi hranga irvo angin nangni hnôl ki ta, pil nang burkhumin dâi nang sung del ki ti.

⁴ Irtetin zâl ngul ni ta, nêngpilin nang irkhu a ta, tasân theihai irsîr an ti, nêngpil ata hor chok ni ta,

⁵ Ram doihai ngai, nam dang irrualhai chu, vâiphin indi angin indarh an ta, mi nunsiathai khom bu’rsi vuang angin irthekindarh an ti.

⁶ Phâivuapui le hnîngnu le irhâi siat tak takhai le kêllaiher-hai le, kâng irhmang thei mei ir-al zun zunhai le, Itinrêng Rengpa chu zuar thok a ti.

⁷ Jerusalem doi hranga nam dang sipaihai chu, a kul irhuala dengintheituhai chu, zâna irmanga thil ei ihmu angin hek nôk an ti.

⁸ Phîngchâmin an irmang tianga bu nêk angin, a hong hara khop loi angin le tui inhrâla a’rmang tianga tui ina, a hong hara a tui a lan hrâl pe mai ngai angin, Zion tâng irhualtu nam dang sipaihai chu ni an ti.

Lei hrilna taksôn loi

⁹ A’rngai lam inhre loiin chaninvâi unglân, nin mit inchotir chian ta roi, Uain in loiin inrui unglân, rakzû irtem viat loiin khêk mai roi.

¹⁰ Rengpa’n inmusuna phâivua nangni insêmtir a ta, deipuhai mit a tuam pehaia, a hmutuhai lu a irkhuhai a ni ta.

¹¹ Nangni hrangin chu hi inlârna thu hih lekhabu irmanna sûnga kop ang a ni. Lekha tep theihai kuanga, “Hong tep ro,” tia pêk an nih. “Inkhop khak a ni sikin tep thei ma ung,” a lei tia.

¹² Lekha tep thei loi kuanga, hong tep zâm hi ro, an hong ti lakin, lekha tep thei ngai ma ung, a lei ti ngaia.

¹³ Rengpa’n hiang hin a ti: “Hi mihai hin an bâi vaiin an ni nâia, an hmûr vaiin an ni chôiindôma, an lungrîl chu hlatak a ni. Mihriamhai thupêk ang ringota an ni insâp a ni.

¹⁴ Hi mihai hin ki itûng loi lam takin, thilirkhêl danglam tak tho ki ta, an mi vârhai vârna hek a ta, an mi theithiamhai theina om ta no ni,” a tia.

Sabei hrang la om

¹⁵ Rengpa ata an thiltum thuphai chu la’rfûk nôk an ti: Inrûkin thil an tho khomin, Tu moh hmua, tu moh an hriat hrang? an ti.

¹⁶ A le tiang inzen thu an irngaitua ngai a ni. Bêlpilhai hin a vuaktu tiklai khom pha no ni? Thil siamhai hin a siamtu kuang, “Ni isiam ni ma ung,” a iti thei hrang ma ni? Thil indinghai khom hin, an dingtirtu chu, “Nin to bâka,” a iti thei hrang ma ni?

¹⁷ Zoro sôtnotea Lebanon ram chu loi hmun sa ni a ta, loi hmun hoihai khom rampui chang zoi a ti.

¹⁸ Kha ni tena chu kuarsêthaiin lekha an itep irhâi inhria an ta, a zîng laia om mitchohai chu, an mit meng an ta, hmu thei an ti.

¹⁹ Inrianghai Rengpaa khan lôm an ta, invâihai khom Israel mi irthianghai kôla lâm an ti.

²⁰ Mi pualoihai irhmang an ta, Pathian en nuam loihai irhmang zoi an ti. Thil sual tho murdihai irhmang an ti.

²¹ Mi dang suala intuma, roirêltuhai rêl insualtira, thu chanlamboia mi dik intuangtirhai chu, irhmang ving an ti.

²² Abrahama santuhai chu, Jakoba irchihai thu hiang hin a hril: Jakoba chu mualinphoi ta no nia; a hmêl khom danglam ta no ni.

²³ Ki ipêk an nâihai chu, an laia om an hmu tena chu, ki’rhming chôiindôm an ta, Jakoba mi irthiang chu inzak an ti. Israelhai Pathian chu mahrip tho an ti.

²⁴ Irtha tiang irhmanghaiin inhre thei an ta, a chiar nuamhai khomin ar chu nuam ta an ti.