ISAIA 28 - PATHIAN LEKHABU IRTHIANG C.L. Bible (BSI)

Hmâr tiang ram halirchûna

¹ Phâi hoitak kôla om, Efraima inrui thal âka om chu an tak pe. Zû’nrui pâr beta a ichuai angin an ichuan khopui, rênglukhum sa chu, chuai a ti.

² Anni doi hrangin mi hrât le hâi Rengpa indang chu, phâivua hor thok, irial zuang tâk, ropui vânsâng laia tâk anga tuilian irsok angin, an ram zuan nôr a ti.

³ Efraima hruaitu inrui buaia mualphoi irsakhai chu, zuang sirchîlhai a ti.

⁴ Ram hmun hoitaka om roiinpuinahai chu chûl an ta, fûrpui misa hong luma theipui ra irhmal anga, a hmin masataka irlem ang hih ni a ti.

⁵ Kha ni tena chu Itinrêng Rengpa’n, a thi zoi loi la om, a mihai hranga rênglukhum roiinpui sil le kai satak ang ni a ti.

⁶ Roirêltu chu roirêl theina pe a ta, kho hrungtu chu râl doi ngamna hâitak inneitir a ti.

Isaia le Judai rama deipu inruihai

⁷ Deipu le ochaihai khomin, uain inruiin an khêka, uain le rakzu an in intama, an inrui buaia, an hong irtet an va irtet zoi ta. Deipuhaiin inlârna an ihmu ite donsui thei loi rakin an inruia, ochaihai khom ite rêl thei loiin an inruia.

⁸ Bu nêkna hmuna khom an miluak an zama, porche takin an oma.

⁹ An inhriat theina hrang tu’n mo ar chutirhai tum. An thu chu tu ngânin moh ar ngai nuam la om hrang? Irhnu nghei phinga nâipanghai hranga ma nih?

¹⁰ Thupêkhai chu a horop malin, a bi bingin, iti tin ma nih, an ihril nuam! an tia.

¹¹ Nam dang chong hmang intak tak hmangin, ki mihai hih Rengpa’n thu hril a ti.

¹² Lungngam taka irngam hrangin a fialhaia, khannisian irngai nuam mahai.

¹³ Khasikin Rengpa thu chu an hrangin, a horop malte tein, zuang tung a ti. Khanchu, an lampuia irtet an ta, sâbe tuangin chel ni an ta, nangni hruaipai zoi an ti.

Zion ta hranga lung phûm

¹⁴ Jerusalema ki mihai chunga roirêltu lârirpâkhaio, Rengpa thu hih irngai roi:

¹⁵ “Thinahai le thu ei thung tâka, mithi khuahai leh chong ei irkhâm ta, soisakna tuipui hong lian khomsian, ni ngîm viat no ni. Irbuk theina hrangin ei irhuanga, zôkna hrangin minlak ei thoa,” nin irtia.

¹⁶ Khasikin, Rengpa Pathianin hiang hin a ti: “Irngai ro, Zion-a lung ki phûm ta, zôkna lung iamom tak chu, a kila lung poimo le hlutak chu ki phûm ta, a iam zoihai chu inhnîng no nihai.

¹⁷ A ngîr indet theina hrang hrui chu roirêlna dik le, a kai indetna hrangin dikna ki ihmang a ni. Minlak thoa an irsûnghualna in chu irialin a dêng siata, an irbukna hmun chu tuilianin suat a ti.

¹⁸ Thina le nin thuthung chu sût ni a ta, mithi khua leh nin chonginkung khom insiat ni a ti. Hremna tui hong lian khan nin rêngin nangni ngîm zoi a tih.

¹⁹ A hong tungin chu nangni tân zoi a ta, a nî tin nangni tân intam mai a ti. Sûn zân om loiin lian mai a ti. A thu omzia hi inhre unglân chu, nin chardong ok a ti!

²⁰ Inthuangna hrang om loia zâlhmun bong angin, silkai le puan bong hrai angin ni a ti.

²¹ Perazim tâng chunga le Gibeon phâi ram a isiat ang khan, a thil tho hrang irkhêl ta tak le a itho hrang irkhêl ta takhai chu Rengpa’n zuang tho a ti.

²² Nin nuisan ual no roi, anino’nchu nin dongtum om no ni. Rengpa Itinrêng Rengpa’n ram pumpui a insiat hrang a ni, Itinrêng ar fûktir zoi tah ti kin hriat.

Pathian vâr lam

²³ Ki’rhâi hih inhre unglân, nin mikuar sung roi, ki thu hi irngai unglân.

²⁴ Loi neitu’n chimu songna hrangin irnêng a ituk angin, an inrît ngot ni loiin,

²⁵ irnêng an hong sinsiama, zira chi an hon theka, Gohu an hong songa, a songna hrang hmun chita an songa, hmun irhelnaa vâihmim an songa,

²⁶ Pathianin an sin hrang a hrilhaia, ar chutirhai ngai.

²⁷ Martûl lianpahai leh an vîk chîlhai ngaia, tâli leh khom bu chîl ngai mahai, hmol leh an vîk inchiltira, hmol leh a rahai an không ngai.

²⁸ Gohu khom indi chitin nôi ual ngai mahai, a indi zoi loina hrangin sakor tâli leh chîl dân an thei.

²⁹ Hianga vârnahai hi Itinrêng Rengpa ipêk an ni. Pathian thil rêl hi chu a vârin a ifel a ni, hlo khom a ichuk ngêt ngai a ni.