ISAIA 27 - PATHIAN LEKHABU IRTHIANG C.L. Bible (BSI)

¹ Kha ni tena chu, Rengpa’n a khandai lianpa, ngaih tak chu Leviathan, tuia rûlpui intân Dragon irchok soisakna hrangin irlek a ta, that a ti.

² Kha ni khan chu Rengpa’n Grep irhuan inditom tak thu chu hiang hin hril a ti:

³ Kei Rengpa hi a hrungtu ki nia, tiklai khomin tui ki buaka, tûte’n an tôn loina hrangin a sûn a zân ki hrunga.

⁴ A chunga khan nuar ma unga, chuan infâi hrang hloi tam khom sianlân, infâiin hâl irhmangtir zoi ki ti.

⁵ An râlhaiin keima ihrung an nuamin chu, keima hi ni hong irngeipuihai sian.

⁶ Itika mani chu, Jakoba irchihai hin irzung la tha nôk ngêt an ti, Israel chu incherin hong pâr nôk a tih. Irnêng chung hi an ra la sip a ti.

⁷ Israel chu anni vîk theitu’n, vîk zoi no nia, anni thata omhai rêkin that intam ual a ti.

⁸ Sala om hrangin a tîr suakhaia, nisua phâivua saloi a’rngamtir ta.

⁹ Nam dang maichâm lunghai chu, chinai lung angin an suk khoia, Aseri irlim le lung danghai an pai ving zoi hnunga, Israelhai sualna chu ngaidam ni a ti.

¹⁰ Khopui kul neihai chu a chim zoi ta, kho ram a ni tâka, ramchâr hmun a chang ta. Khatak khan sâhai an lênga, an riakbuk, an lêngna a chang zoi ta.

¹¹ Thing ônhai khom chârin a tâka, Thingtua hrangin nupanghaiin an irkhôm a ni ta. Ite inhre thei loi nam an ni hih, a siamtuin lungthunghai loi angin, anni inren ngaitu hin lungthunghai mai ta no nih.

¹² Kha ni tena chu Rengpa’n Eufrates vadung ata Aigupta tui dênin, bu ât angin, a mi Israelhai chu inkha khatin irfuanghai a tih.

¹³ Kha tena chu bekul liantak tum an ta, Assuria rama irhmang tâkhai le Aigupta an imâkhai chu hong kîr an ta, Jerusalem tâng irthianga khan Rengpa chubai mûk an ti.