ISAIA 25 - PATHIAN LEKHABU IRTHIANG C.L. Bible (BSI)

Inpâkna hla

¹ O, Rengpa, ki Pathian ni ni, nir hming chôindômin nan pâk ki ti, Thilirkhêl tamtak ni thoa, Tianlai ata ni lei irfûktir chu, Iamom takin hlo a chuk ngaia.

² Khopuihai chu nin siattir theia, A kulhai khom nin chimtira, Nam dang khopuihai ram zoiin, siam insa ni ta no ni.

³ Khanchu nam hrâthaiin, nan pâk an ta, Nam sualhai omna khua tinin nang chi an ti.

⁴ Inriang le changpui innanghai hranga kul ni nia, An char a dongin chu an hor bîk ngaia, Sûn misa luma dâihlîm ni chang pehaia.

⁵ Phâivopuiin bang a inam ngai ang hin, Mi sualhaiin an lohai ngai. Ram inrôpna hmuna meichok ang hi a ni. Khannisian nangin nam danghai tia le’rsonghai nin dâihaia, Sûm inthimin misa lum a indâitir ang hin.

Pathian hruai roiinpui a sinsiam

⁶ Hi tânga hin Itinrêng Rengpa’n mi murdihai hrangin hruai inthe a ta, Uain thum a sa chi le a hnînghai le, sâ khom a tui zât inzenin sinsiam a ti.

⁷ Ki tânga hin mi murdi, nam tin irkhu theitu beidongnahai irkhu indâi a ti.

⁸ Rengpa Pathianin thinahai chu invol a ta, a mihai mitrithi hui infâi a ti; rammual pumpuia a mihai inhnêa omhai khom om ta no ni, Rengpa’n kha kha a insîr tâk a ni.

⁹ Kha zoro tena chu, “En ro, ama hi kin Pathian chu a ni. Ama kin iama, a ni zuang isan a ni ta. Ama hi Rengpa chu a nia, ama kin iama, a ni saninhring sikin lôm ei ti,” la ti an ti.

Pathianin Moab hrem a ti

¹⁰ Rengpa’n Zion tâng hi saninzôk a ta, Moab chu fapon êk khura an ipai ang hin chîlin pai a ti.

¹¹ Tui irhliaituhaiin tui irhliai hranga an bân an iphar angin phar an ta, khannisian Rengpa’n an mualphoina chu irhnuaitir a ta, an kut theithiamhai khom inboi pehai a ti.

¹² An kul bang irsânghai khom inchimtir pehai a ta, nêngpila chim rumin om a ti.