ISAIA 23 - PATHIAN LEKHABU IRTHIANG C.L. Bible (BSI)

Foiniki-hai chungchâng

¹ Tura khua chung thu chu: Tarsis irkuang neituhai chu, khêk an ta, inhai chu irkuang irngamna ten khom a siat zoi ta, Kupra chiaiphoi nin dên tena kêng kha kha nin inhriat.

² Tuikhanglian kôla omhaio, dâihrekin om roi, Sidon khua bepâr thohaio, tuipuilian tak irkânin bepâr nin thoa;

³ Sihor phâia bu, Nail vadung kôla vâng chu nin zu’rchôka, ram dang tiang nin zuar nôka,

⁴ O, Sidon khopui mual ni inphoi a ni ta, tuikhanglian inthûk taka khan, “Nâihâ irvei loiin, nei khom nei ngai ma ung, nâinupang le pasal infa inlianhai ngai ma ung,” nang a iti pe a ni ta.

⁵ Tura siatnahai hih Aigupta-haiin an inhriata, ar khêl an ti,

⁶ Tuikhanglian kôla mihaio, chiarpumin Tarsis tiang irkân ta roi.

⁷ Hi hi tianlai ata kho det, nin irsongpui ngai chu! Tuipui râla kho thar sât hrang, hi khua ata hi mo a isuak ngai?

⁸ Renglukhum mihaiin an inkhumtira, an bepâr thohai ngai chu mi roiinpuihai an ni, an dukan thotuhai ngai khom mi irngaiirsâng ngai an ni. Tura chunga thil hong tung chu tu itho ma ni?

⁹ Itinrêng Rengpa’n a ti a ni, an irsongpui ngai roiinpuina a heka, an mi inzakomhai chu mualinphoiin an om ta.

¹⁰ Nail vadung kôl angin nin ramhai tukirlet unglân, Tarsis mihaio, irkuang irngamna nei ta mak chêi.

¹¹ Rengpa’n Tuikhanglian chunga khom a kut a thâk, Reng ram tamtak a hril insiata, Kanaan mihai hmunpui, insiatpai hrangin Rengpa’n thu a pêka.

¹² Sidon dôngmate irthiang, mi inêpsia zoinu, irsor ta ngai no chi ni, Kupra chiaiphoi tiang intân khomin lân, zôk ual thei no chi ni.

¹³ Tura khuaa ram sahrâng lêngna hmuna siamtu, Assuria ni loiin, Babulon hi a ni; kho sûng irhualna’n kul irsâng an sina, a kulhai an seta, kho sûng chu a chim zoi ta.

¹⁴ Tarsis irkuang chalaituhai khêk unglân, nin hmunpui a siat zoi ta.

¹⁵ Kha tena chu rêng inkhat inlal hun sûnga chu, kum sômsari sûng chu Tura khua hi tûte’n inhre no nihai; Kum sômsari a hek zoi le chu Notizuar hla, hiang hi ni a ti.

¹⁶ Tûte’n nan hre ta loi nangma notizuar, perkhuang irva’n kho sûng irfangin lân, irhâihoi tumin hla hoitakhai sak ro, nang an inhriat thei nôkna hrangin.

¹⁷ Kum sômsari a hek zoi le chu Rengpa’n Tura khua chu en nôk a ta, a itho ngai dên tho nôk a ti, rammual hmun tina irzuar nôk a ti

¹⁸ A imanhai chu Rengpa hrangin inhlan a ta, thup ta no nia, se chian thei no ni. Rengpa makunga omhaiin a tui a thâi fâkna hrang le sil le kai sa irchôkna hrangin hmang an ti.