ISAIA 22 - PATHIAN LEKHABU IRTHIANG C.L. Bible (BSI)

Jerusalem chungchâng

¹ Inlârna irhôr chung thu chu: Imo nin ithôna inchung sîpa teh nin lui vinga?

² Khopui lu chung a rika, an khêkin an chiar lul ta, nin mithihai khom khandaia that chu ni mahaia, irkâpnaa thi khom ni mahaia.

³ Nin hruaituhai an rota, thal inkhat khom kâpnahai loiin an chelhaia, nangni an ihmu dôr nangni an chela, ram hlataka intân ta khom unglân.

⁴ Ni rotsan ving roi, ki mithihai hi, châhai hrang ki ni, tûte’n nin thâi no roi.

⁵ Inlârna irhôra hin chardongna nî mi hruaia omin, Rengpa itinrêng Rengpa’n a hong intungtir ta hi te. Khua kul banghai chu an suk siata, chardong irhâiin tâng tin an tor zoi ta.

⁶ Elam sipaihai chu thal kok chôiin sakor tâlia an chuanga, Kir mihaiin an pho an kêlsuaa.

⁷ Nin ram phâizôl inchamna hmuna, an tâlihai an irngamtira, sakor chungchuang mihai khom kul mikot kôla an ngîra.

⁸ Judai ram saninzôkna an insiat zoi ta. Kha zoro khan neinun sianaa râltukfam nin lâksuaka,

⁹ Davida kho kulbang a chim lai kha nin hmu vinga, dîl thanginta tui kha nin chôia.

¹⁰ Jerusalem khuaa inhai khom nin en vinga, senkhat chu kul bang siathai phôna hrangin nin seta.

¹¹ Khokul chunga tuipang nin siama; dîl milui ata tui zuang zôk nin sianaa. Tian ata hi thu tung hrang lei hriltu hi taksôn mak chêia.

¹² Kha ni khan chu, Rengpa itinrêng Rengpa chapa khêk hrang le lu ep inkola, bora puan sil hranga titu khan;

¹³ khannisian innuipumin nin râi a fâna, sehrât le belra thatin bu khalâi nin doa, zu buala nin oma, “Fâkin in ei ti, nangtûk chu thi hrang ei ni,” nin tia.

¹⁴ Itinrêng Rengpa’n ki kuang a ihril, “An dam sûng chu, hi thil sual thôna sika hin ngaidamhai no ning, kei Rengpa itinrêng Rengpa’n ki ihril tâk hi chu,” tiin.

Sum enkoltu Sebna kuanga thu tung

¹⁵ Rengpa itinrêng Rengpa’n hiang hin ki kuang a ti: Tho rêng sum enkoltu Sebna kuanga va fe’n lân, hiang hin va ti roh:

¹⁶ “Tu ngân mo ni ini, ni irtan hrang ni izong mai? tâng sîpa lunga ni zâlna hrang ni izong,

¹⁷ Irngai ro, mi poimo tak ni khomin lân, Rengpa’n nang hrût lik a ta, nang dêngzuan a ti.

¹⁸ Bôl angin nang hrût a ta, ram lianna taka nang dêngzuan a ti; kha khan ni isongtak ni tâli kôla thi ni ta, ni puhai inzak an irhmu ok hrang a ni.

¹⁹ Ni sinna masan ni ta, hruaitu ni nitna ata tâ ni ti.

²⁰ “Kha ni chu ki siahlo, Eliakima, Hilkia nâipa chu koi ki ta,

²¹ ni songkol irfual chu ama innghâktir ki ta, ni kongkhit khom inkhittir ki ti. Ni thuneina murdi ama pe ki ta, Jerusalem-a omhai le Judai ram mihai hrangin pa ni a ti.

²² Davida in sûng mihai châbi chu a kuta bâng ki ta, a inhong sai chu tûte’n khâr thei no nihai, a ikhâr tâk chu tûte’n inhong thei ta no nihai.

²³ Irnêng châra chopui angin det takin phun ki ta, a in mihai hrangin songinruk tak ni a ti.

²⁴ “A urêng le ar chi suanpârhaiin song mai an ta, an innang murdi bêl bûrhai khom an irnghat ving a ni.

²⁵ Itinrêng Rengpa thusuakin hiang hin a ti: Kha ni tena chu irnêng inthûk taka phun chu inhnîng a ta, irthôl a ti. Ama irnghattuhai hekna ni a ti,” Rengpa’n a ti.