ISAIA 17 - PATHIAN LEKHABU IRTHIANG C.L. Bible (BSI)

Pathianin Suria le Israel hrem a ti

¹ Damaska chungchâng chu: Damaska chu kho sûnga tep khom ni ta no nia, thil saloi omna ang mai ni a ti.

² Aroer khua khom rotsanin om a ta, kêlbelra omna khua ni ta a ti. Irtharngam takin sâhai om an ta, tûte’n inhnotpai thei ta no nihai.

³ Efraima rama ite kul om ta no ni, Damaska ram khom om thei ta no nia, Suria rama a dama la omhai khom Israel roiinpuina chuai ta angin om a ti, itinrêng Rengpa thusuakin a ti.

⁴ Kha ni tena chu Jakoba roiinpuina irhmang a ta, ar chonga, khannisian hon riang ok nôk ta a ti.

⁵ Bu âttuhaiin Refaim-ah thôl bu an ât zoia, ât sel la om pherphur ang hi la ni an ti.

⁶ Oliv ra tâk zoi sai, a rêla la om ta thei loi, a vîk irsânga minli ringa la om ang hi la ni an ta, Israelhai Pathian Rengpa thusuakin a ti.

⁷ Kha ni tena chu mihaiin a siamtu hon hria an ta, Israel mi irthiang chu thîr an ti.

⁸ Kut le an isin maichâmhai chu uksak ta no nihaia, anni isin Aseri le mirimhoi hâlna maichâmhai chu a en khom en nuam ta no nihai.

⁹ Israelhai makunga Hiv mi le Amor mihai khopui mâksanhai ang khan an khopui satakhai chu rotsan an ta, a ram zoro tung a ti.

¹⁰ Nangni saninhringtu Pathian nin irnghila, nin zôkna lungpui chu inhre nuam loiin. Enhoi takin irhuan nin sinhaia, nam dang pathian biak nin uara,

¹¹ Nin iphun thei dôrhai phunin hong pâr khomsian, a ra irhmal hrang om no ni, buaina le a na hek ta loi nikhua a hong tung ni tena chu.

Hmumâk ngai namhai insiat an ni

¹² A mipui tamtak irhâi, tuikhanglian irhâi anga om le nam tina an khêk irhâihai chu tuilian irhâi anga omhai chu na!

¹³ Nam tinhai chu tui irhâi inring angin khêk an ti. Rengpa’n hâlhai a ta, irngam an ti, tânga bu’rsi phâivua’n a isêm inlênga nêngpila a isêm inthek ang hin.

¹⁴ Khohloi tiang chu ichi an iom angin, zîng tiang chu chi hrang om ta mahai, hi hi a nin rûk pe nuamtuhai dongtum chu a ni.