ISAIA 16 - PATHIAN LEKHABU IRTHIANG C.L. Bible (BSI)

Moabhai hrang lungzîngna

¹ Ram roirêltuhai hrangin kêlbelrahai chu Sela khua ramchârna hmun ata Zion nâinu tâng tiang khan chôi unglân.

² Khanchu, Moab nâinuhai chu vate irbu ata râiphîta vuanghai angin Arnon vadunga khan om an ti.

³ A’rfûk ni ti pe’n lân, roi ni rêl pe ro, ni râifân chu sûn lai taka inthim angin om sianlân, irzûlpaia omhai chu irbîk ta ri sehai; a rothai chu chel ta loiin.

⁴ Moab-hai ata irzûla omhai chu, ni kôla om ri sehai, an ta hrangin an siattirtu kôl ata irbîk theina ni ri se; mi huang ngaitu khom ite ni loiin a om thei tâk sikin, insiatnahai om ta maka, a êsêltuhai chu hi ram ata hi om ta no nihai.

⁵ Khanchu rêngtoihmun kha chu, inren irhlômna pungin om a ta, kha ina Davida puan ina khan, mi inkhat roirêlin, roirêlna fel zongin, thil fel inrangtaka thoin, toi a ti.

⁶ Moabhai chu an lârirpâkna thu ei inhriat angin, an chong irpâkna le, an irsor le an ningmurna thuhai le an irsongnahai chu ite bêin bê ni maka.

⁷ Khasikin Moabhai chu Moab mihai chunga khêk an ta; Kir-hareseth grep inhrolhai chu milung hoi loi pumin la an ti.

⁸ Hesbon loihai a chuai zoia, Sibma grep hruihai le, nam tina an rênghaiin a kung sa la omhai khom inkhiakhai rem rum an ti. Jazer khua dênin an chia, ramchâra an omsuama, a ônhai zârin, tuipui an irzâm kâi ta.

⁹ Khasikin Sibma grep râng chu Jazer châin châ ki ta; O Hesbon le Elealeh, ki mitrithi leh hin buak ki ta. Ni bu âtna le sûn lumhai hin irdoina thu an tungtir ta.

¹⁰ Irhuanhaia khan a lôma raifân hmêl om ta maka, grep irhuan raifânnahai chu om thei ta maka, grep ra sôm hrang khom om ta mah. A lôma khêk irhâi inlang thei zoi ta mah.

¹¹ Khasikin ki sûnga rîlhai khom Moabhai inrenna sikin perkhuang irhâi angin ar hâi a oma, ki phîng khom Kir-heres inrenna sikin perkhuang irhâi angin a om zoi ta.

¹² Khanchu hiang hin ni a ti, Moab a hor lang tena chu bozôla nuama sôlin chongchai hranga a hmun irthianga a hong tena khom hlochuk no ni.

¹³ Hi hi Moab chungchâng Rengpa’n ki kuanga a insîr chu a ni.

¹⁴ Atûn hin chu Rengpa’n, “Irhloa a kum inkung kum thum sûngin Moab roiinpuina chu om ta no nia. Mi tam zaphai khom sian a thi zoi loi mi tômte an la oma, a la omhai khom ite tho thei ta no nihai,” tiin a hrila.